ការលេបថ្នាំបំបាត់ការឈឺចាប់នៅរាល់ពេលឈឺក្បាល គឺមិនមែនជាគំនិតល្អសោះឡើយ! ក្រៅពីជះឥទ្ធិពលអវិជ្ជមានផ្សេងៗហើយនោះ ថ្នាំបំបាត់ការឈឺចាប់ក៏បង្កើនហានិភ័យនៃបញ្ហាសុខភាពគួរអោយព្រួយបារម្ភជាច្រើនផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាកុំបារម្ភ! ខាងក្រោមវេបសាយ Health.com.kh នឹងបង្ហាញឱ្យដឹងពីអាហារមួយចំនួនដែលជួយប្រយុទ្ធប្រឆាំងអាការៈឈឺក្បាល ៖

១. ទឹកដោះគោមានផ្ទុកជាតិខ្លាញ់ទាប

មួយក្នុងចំណោមមូលហេតុទូទៅបំផុតនៃអាការៈឈឺក្បាល គឺកង្វះជាតិទឹកក្នុងរាងកាយ។ ដូច្នេះការចៀសវាងអាហារប្រៃនិងគ្រឿងស្រវឹងជាដើម គឺសំខាន់ណាស់ដើម្បីទប់ស្កាត់បញ្ហាខ្សោះជាតិទឹក។ ទឹកដោះគោមិនត្រឹមតែជាសារធាតុរាវជួយផ្ដល់ជាតិទឹកដល់រាងកាយប៉ុណ្ណោះទេ ប៉ុន្តែភេសជ្ជៈនេះក៏ជាប្រភពដ៏ប្រសើរនៃជាតិរ៉ែសំខាន់ៗដូចជាកាល់ស្យូមនិងប៉ូតាស្យូមដែលបន្ថយឥទ្ធិពលនៃរបបអាហារមានផ្ទុកសូដ្យូមខ្ពស់ផងដែរ។

២. យ៉ាអួរ

ភាគច្រើននៃពួកយើងប្រហែលជាមិនដឹងទេថាក្រៅពីល្អសម្រាប់សុខភាពប្រព័ន្ធរំលាយអាហារ ការទទួលទានយ៉ាអួរក៏ជួយបំបាត់អាការៈឈឺក្បាលបានយ៉ាងឆាប់រហ័សផងដែរ។ នោះក៏ព្រោះតែក្នុងករណីខ្លះការឈឺក្បាលបណ្ដាលមកពីកង្វះជាតិកាល់ស្យូមក្នុងរាងកាយ ហើយយ៉ាអួរជាប្រភពដ៏ល្អបំផុតមួយនៃជាតិរ៉ែនេះ។ ទោះជាយ៉ាងណាត្រូវប្រាកដថាអ្នកបានជ្រើសរើសទទួលទានយ៉ាអួរសុទ្ធគ្មានជាតិស្ករ ឬគ្រឿងផ្សំបន្ថែមរសជាតិ។

៣. ត្រសក់ផ្អែម

ផ្លែឈើនេះមានផ្ទុកសម្បូរទៅដោយប៉ូតាស្យូមនិងជាតិទឹក ព្រមទាំងម៉ាញ៉េស្យូមដែលជួយទប់ទល់អាការៈឈឺក្បាលបានយ៉ាងប្រសើរ។ ជាតិស្ករក្នុងឈាមទាបក៏ជាកត្តាមួយដែលនាំឱ្យអាការៈឈឺក្បាលលេចឡើងផងដែរ។ ហើយការទទួលទានអាហារមានផ្ទុកម៉ាញ៉េស្យូមខ្ពស់អាចជួយគ្រប់គ្រងកម្រិតនៃជាតិស្ករក្នុងឈាមគួរឱ្យកត់សម្គាល់។

៤. ត្រីសម្បូរខ្លាញ់

ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣, វីតាមីន B6, វីតាមីន B12 និងអាស៊ីតហ្វូលិកដែលមានប្រសិទ្ធភាពព្យាបាលទប់ស្កាត់អាការៈឈឺក្បាលគ្រប់ប្រភេទ។

៥. ផ្លែចេក

ក្នុងករណីខ្លះអាការៈឈឺក្បាលអាចបណ្ដាលមកពីកង្វះនៃជាតិម៉ាញ៉េស្យូមក្នុងរាងកាយ។ ហើយចេក គឺជាជម្រើសនៃផ្លែឈើដ៏ប្រសើរដែលមានផ្ទុកសម្បូរទៅដោយជាតិម៉ាញ៉េស្យូមជួយបំបាត់អាការៈឈឺក្បាលបានយ៉ាងឆាប់រហ័ស។ 

៦. ទឹក

ប្រសិនបើមិនទទួលទានទឹកប្រមាណ ២ លីត្រក្នុងមួយថ្ងៃជាប្រចាំទេនោះអ្នកប្រាកដជាងាយនឹងជួយប្រទះអាការៈឈឺក្បាលគួរឱ្យរំខាន។ នេះក៏ព្រោះតែខួរក្បាលត្រូវការជាតិទឹកដល់ទៅ ៧៥ ភាគរយ! ដូច្នេះប្រសិនបើអ្នកទទួលទានទឹកមិនបានច្រើនគ្រប់គ្រាន់ ខួរក្បាលអាចនឹងប្រែជារួមតូចហើយត្រូវធ្វើការខ្លាំងច្រើនជាងមុខបង្កជាបញ្ហាឈឺក្បាលគួរឱ្យបារម្ភ។ ម្យ៉ាងវិញទៀតកង្វះជាតិទឹកក្នុងរាងកាយ គឺជាមូលហេតុទូទៅបំផុតមួយនៃអាការៈឈឺក្បាល។ ដូច្នេះដើម្បីជៀសផុតពីបញ្ហានេះចូរទទួលទានទឹកឱ្យបានគ្រប់គ្រាន់ជាប្រចាំ៕