​ជាធម្មតា ស្ត្រី​ត្រូវ​មក​រដូវ​ជា​រៀងរាល់ ២១ ទៅ​៣៥​ថ្ងៃ​ម្តង​។ ស្ត្រី​ម្នាក់ៗ​សុទ្ធតែ​មាន​លក្ខណៈ​នៃ​ការ​មក​រដូវ​ខុសៗ​គ្នា និង​រៀងៗ​ខ្លួន​ទាំងអស់​។ ក្នុង​ករណី​ខ្លះ ការប្រែប្រួល​តិចតួច​ក៏​អាច​ធ្វើឲ្យប៉ះពាល់​ដល់​វដ្តរ​ដូវ​បាន​ដែ​រ​។ ខណៈពេលដែល ការធ្លាក់​ឈាមរដូវ​ច្រើនៗ​អាច​ធ្វើឲ្យ​អ្នក​បារម្ភ​ខ្លាំង តែ​ការ​មក​រដូវ​តិច​ជាង​ធម្មតា​វិញ ក៏​អាច​ធ្វើឲ្យ​អ្នក​មាន​អារម្មណ៍​មិន​ល្អ​បណ្តោះអាសន្ន​បានដែរ​។ យ៉ាងណាមិញ វា​អាច​បញ្ជាក់​ថា មាន​បញ្ហា​សុខភាព​ណាមួយ​កើតឡើង​ហើយ​ទើប​ធ្វើឲ្យ​មាន​ការមក​រដូវ​តិច​ជាង​ធម្មតា​បែបនេះ​។

​រោគ​សញ្ញា​មួយ​ចំនួន​ដែល​ធ្វើឲ្យ​ស្ត្រី​មក​រដូវ​តិចជាងធ​ម្មតា​នោះ​គឺ តិចជាង ២​ថ្ងៃ មាន​ឡើង​ស្នាម​អ៊ុចៗ​លើ​ស្បែក និង​ឧស្សាហ៍​មក​រដូវ​រឹមៗ​។ ទោះបីជា​យ៉ាងណា​ក៏ដោយ មាន​មូលហេតុ​មួយចំនួន​ដែល​អាច​ធ្វើឲ្យ​ស្ត្រី​មក​រដូវ​តិចជាងធ​ម្មតា​បែបនេះ ដូចជា​៖

  • ​ទម្ងន់​រាងកាយ​៖ បើសិន​ជា​អ្នក​ជា​មនុស្ស​ដែល​ស្គម នោះ​ការ​មក​រដូវ​ក៏​តិចជាង​ធម្មតា​បាន​ដែរ​។
  • ​មាន​ផ្ទៃពោះ​៖ ថ្វីត្បិតតែ ការបាត់​រដូវ​គឺជា​សញ្ញា​ចំបង​មួយ​នៃ​ការ​មាន​ផ្ទៃពោះ​ក៏ដោយ តែ​ស្ត្រី​ខ្លះ​អាច​នឹង​ជួប​បញ្ហា​រដូវ​មក​តិច​ទៅៗ​ដែរ​។​
  • ​ប្រើ​ថ្នាំ​ពន្យា​កំណើត​៖ ថ្នាំ​ពន្យា​កំណើត​ខ្លះ​ធ្វើការ​ដោយ ធ្វើ​ឲ្យ​ស្ទះ​ដល់​ដំណើ​ការណ៍​ជ្រុះ​អូ​វ៉ុល ដូច្នេះ​វា​អាច​នឹង​បណ្តាលឲ្យ​មក​ឈាមរដូ​វ​រឹមៗ​ដែរ​។
  • ​អាយុ​៖ ការ​ដែល​ស្ថិត​ក្នុង​វ័យ​ជំទង់ ស្ត្រី​អាច​នឹង​មាន​ការប្រែប្រួល​លំហូរ​ឈាមរដូវ​ដែរ ប៉ុន្តែ​ដល់​ពេល​ជិត​រ៉ាំ​ង​រដូវ ក៏​អាច​បណ្តាលឲ្យរ​ដូវ​មក​តិចៗ​ដែរ​។
  • ​ការ​បំបៅ​ដោះកូន​៖ ក្នុងពេល​បំបៅ​ដោះកូន រាងកាយ​ស្ត្រី​នឹង​បញ្ចេញ​អ័រម៉ូន​ប្រូឡាក់ទី​ន ដែល​វា​មិន​ត្រឹមតែ​ជំរុញ​ដល់​ការចេញ​ទឹកដោះ​ទេ តែ​ក៏​ពន្យា​ពេល​ការ​មក​រដូវ​ដែរ​។
  • ​ស្ត្រេ​ស​៖ ស្ត្រេ​ស​គឺជា​មូលហេតុ​ចំបង​មួយ​នៃ​បញ្ហា​សុខភាព​ជា​ច្រើន​ចាប់ពី ជំងឺ​បេះដូង បាក់​ទឹកចិត្ត រហូត​ដល់​ទឹកនោម ហើយ​ក្នុងនោះ​ការប៉ះពាល់​ដល់​វដ្ត​រដូវ​ក៏​មិន​លើកលែង​ដែរ​។
  • ​ចង្កោម​រោគសញ្ញា​ពង​គីស​ច្រើន​ក្នុង​ក្រពេញ​អូ​វ៉ែ​៖ វា​គឺជា​ជំងឺ​ទាក់ទង​នឹង​ក្រពេញ​បញ្ចេញ​ក្នុង ដែល​បណ្តាល​ឲ្យ​អតុល្យភាពអ័​រ​ម៉ូន ដូច្នេះ​ការ​មក​រដូវ​ក៏​រង​ផលប៉ះពាល់​ដែរ​។
  • ​លើស​អ័រម៉ូន​ក្រពេញ​ទី​រ៉ូ​អ៊ីត​៖ នៅពេល​រាងកាយ​ផលិត​អ័រម៉ូន​នេះ​ច្រើន​ជ្រុល វា​នឹង​នាំ​ឲ្យមាន​ភាពភ័យខ្លាច ថប់​អារម្មណ៍ បេះដូង​ដើរ​ញ៉ាប់ បែកញើស​ខ្លាំង និង​គេង​មិន​លក់ ព្រមទាំង​ធ្លាក់​ឈាមរដូវ​រឹមៗ​ដែរ​។

​សរុបមក រាល់​ការប្រែប្រួល​លំហូរ​វដ្ត​រដូវ គួរតែ​ជា​រឿង​ដែល​ត្រូវ​ប្រុងប្រយ័ត្ន​ផង​។ ព្រោះ​វា​អាច​ជា​សញ្ញា​មួយ​នៃ​ជំងឺ​ធ្ងន់ធ្ងរ​មួយ​ចំនួន​តូច​ដែរ​៕