ការមានផ្ទៃពោះរហូតដល់ពោះធំទៅៗ ជាពិសេសក្នុងត្រីមាសទី៣ មិនត្រឹមតែប្រៀបបាននឹងការស្ពាយដុំសាច់មួយទម្ងន់ពីរបីគីឡូក្រាមតាមខ្លួននោះទេ តែការរីកធំរបស់ស្បូនបែបនេះក៏ធ្វើឲ្យសរីរាង្គផ្សេងៗក្នុងពោះខុសរបៀបរៀបរយ ដែលជាហេតុនាំឲ្យដាក់សម្ពាធទៅលើសរីរាង្គទាំងនោះកាន់តែខ្លាំងដែរ។
ដូច្នេះហើយ វាពិតជាគ្រប់គ្រាន់នឹងធ្វើឲ្យពេលវេលានៃការមានផ្ទៃពោះដំណាក់កាលនេះឆាប់រងភាពអស់កម្លាំងណាស់ ប៉ុន្តែកុំបារម្ភអី បើសិនជាអ្នកអាចធ្វើទៅតាមគន្លឹះងាយៗដូចខាងក្រោមនេះ ព្រោះវាជាវិធីដែលជួយឲ្យឆាប់មានកម្លាំងឡើងវិញ។
ហាត់ប្រាណតិចៗ
ការដើរតិចៗក្នុងរយៈពេលខ្លីៗក៏អាចជួយឲ្យមានអារម្មណ៍ល្អបានដែរ។ ការហែលទឹក និងការហាត់ក្បាច់យូហ្គាចំពោះការមានផ្ទៃពោះក៏ជាជម្រើសល្អមួយដែរ ប៉ុន្តែបើសិនជាធ្វើទៅហត់ពេក ចូរឈប់សិនទៅ។ បើសិនជាអ្នកធ្វើឆាប់ហត់ ចូរធ្វើវាបន្តិចម្តងៗ។ គ្រាន់តែអង្គុយលើកៅអីហើយជ្រាត់ដៃដើម្បីឈរក៏ជាលំហាត់ប្រាណមួយដែរ។
ឧស្សាហ៍សម្រាកពីការងារ
ការងារទាំងអស់ដែលស្ត្រីមានផ្ទៃពោះធ្វើមិនប្រាកដថាត្រូវការធ្វើឲ្យខ្លាំងក្លាទេ ដូច្នេះយកល្អគួរតែឧស្សាហ៍សម្រាក និងគេងឲ្យបានច្រើនវិញទៅ។
ការញ៉ាំអាហារ គួរតែញ៉ាំតិចៗ តែច្រើនដង
អ្នកមិនចាំបាច់ញ៉ាំអាហារមានជាតិកាបូអ៊ីដ្រាត និងប្រូតេអ៊ីនច្រើនចូលគ្នាទេ។ អ្វីដែលសំខាន់គឺញ៉ាំវាបន្តិចៗ គ្រាន់តែទ្រាប់ពោះ ឬល្មមៗបានហើយ។ បើសិនជាឃ្លានចាំញ៉ាំទៀត។
បើសិនជាអស់កម្លាំងជាប់ យកល្អគួរតែពិគ្រោះជាមួយគ្រូពេទ្យ
ការដែលមានអារម្មណ៍អស់កម្លាំងជាប់ វាអាចជាសញ្ញាមួយនៃការកង្វះគ្រាប់ឈាមហើយ ដូច្នេះត្រូវតែឲ្យពេទ្យពិនិត្យដើម្បីព្យាបាល៕
