មនុស្សស្រីភាគច្រើនតែងតែមិនចង់មានផ្ទៃពោះនៅឡើយទេ ដោយសារតែចង់បានជីវិតរស់នៅបែបមានសេរីភាពយូរបន្តិច ចង់ពង្រឹងមុខរបរផ្ទាល់ខ្លួន ឬធ្វើដំណើរកម្សាន្តជាមួយគ្រួសារជាដើម។ ដោយយោងទៅតាមហេតុផលទាំងនេះហើយ ទើបក្លាយទៅជាមតិផ្ទុយគ្នានឹងទ្រឹស្តីជាច្រើនដែលនិយាយថា ស្ត្រីគួរយកកូននៅអាយុខ្ទង់ ២០ឆ្នាំ។ ទោះបីជាយ៉ាងណាក៏ដោយ ថ្មីៗនេះ អ្នកវិទ្យាសាស្ត្រជាច្រើននិយាយខុសគ្នាពីអ្វីដែលមនុស្សគ្រប់គ្នាធ្លាប់លឺកាលពីមុនៗទៅវិញ។
តាមការសិក្សាមួយដែលធ្វើឡើងដោយបណ្ឌិត John Mirowsky ដែលជាអ្នកជំនាញខាងសង្គម នៅឯសាកលវិទ្យាល័យ Texas បានឲ្យដឹងថា ពេលវេលាដ៏ល្អបំផុតដែលស្ត្រីគួរមានផ្ទៃពោះគឺអាយុ ៣៤ឆ្នាំ។
ការពិត
អ្នកជំនាញខាងរោគស្ត្រីបាននិយាយថា ស្ត្រីគួរណាតែមានផ្ទៃពោះក្នុងអាយុ ៣៤ ទៅ៣៥ឆ្នាំ ដោយសារតែកន្លែងមួយចំនួននៃរាងកាយអាចនឹងកើតជាជំងឺក្នុងពេលវ័យ ២០ឆ្នាំ។ ដល់ពេលអាយុ ៣៤ឆ្នាំ រាងកាយស្ត្រីគឺមានសុខភាពល្អបរិបូរណ៍ ដែលត្រៀមខ្លួនជាស្រេចសម្រាប់ការពរពោះកូនគ្រប់ខែប្រកបដោយសុខភាពល្អទៀត។
បណ្ឌិត Mirowsky ក៏បានបញ្ជាក់ទៀតថា ស្ត្រីគួរតែមានការប្រុងប្រយ័ត្នផងក្នុងការមានផ្ទៃពោះនៅអាយុខ្ទង់ ៣០ក្រាស ព្រោះកាលណារាងកាយស្ត្រីអាយុកាន់តែច្រើន ឱកាសនៃការឆ្លងជំងឺ និងផលវិបាកទៅលើប្រព័ន្ធប្រដាប់បន្តពូជមានការកើនឡើងខ្ពស់ដែរ។
អ្នកជំនាញខាងចិត្តសាស្ត្រផ្សេងៗទៀតក៏បានយល់ស្របអំពីរឿងនេះដែរថា ស្ត្រីដែលមានអាយុពី ៣៤ ទៅ៣៥ឆ្នាំ ជាទូទៅគឺមានទំនាក់ទំនងស្នេហារឹងមាំជាមួយប្តី ហើយក៏មានកម្លាំងគ្រប់គ្រាន់សម្រាប់រស់នៅជាមួយគ្នា ព្រមទាំងអាចមានលទ្ធភាពចិញ្ចឹមមនុស្សម្នាក់ទៀតប្រកបដោយប្រសិទ្ធភាពខ្ពស់ដែរ។
សរុបសេចក្តីមកគឺថា វាគឺជារឿងធម្មតាទេដែលអ្នកគួរមានកូននៅអាយុ ៣០ឆ្នាំ។ គ្រាន់តែចាំថា ការដែលបង្កើតកូនដែលជាសមាជិកថ្មីនោះ គឺជាការសម្រេចចិត្តមួយសម្រាប់ជីវិត ហើយក៏មិនគួរធ្វើវាដោយមិនបានប្រុងប្រយ័ត្ន ឬគិតវែងឆ្ងាយឡើយ។ ចូររៀបចំគម្រោងជាមុនឲ្យបានល្អសិនមុនសម្រេចចិត្តធ្វើជាម្តាយគេ៕