​ស្ត្រី​មាន​ផ្ទៃពោះ​តែងតែ​ត្រូវបាន​គេ​រំពឹងថា ពួកគេ​ត្រូវ​មាន​អារម្មណ៍​សប្បាយចិត្ត​គ្រប់ពេល​។ ម្យ៉ាងវិញទៀត ការ​ដែល​មាន​អារម្មណ៍​មិន​ល្អ ចាញ់​កូន ឈឺ​ខ្នង និង​អស់កម្លាំង​គឺជា​អាការៈ​មួយចំនួន​ប៉ុណ្ណោះ​របស់​ស្ត្រី​មាន​ផ្ទៃពោះ​ក្នុង​រយៈពេល​ពេល ៩​ខែ ១០​ថ្ងៃនេះ​។ យ៉ាងណាមិញ តើ​អ្នក​មាន​ដឹង​ទេ​ថា បើសិន​ជា​ស្ត្រី​មាន​ផ្ទៃពោះ​មាន​បញ្ហា​ស្ត្រេ​សជាប់​រហូត វា​នឹង​ប៉ះពាល់​ដល់​សុខភាព​ទារក​ក្នុង​ផ្ទៃ​ដូចម្តេច​ដែរ​ទេ​?

ការលូតលាស់​ខួរក្បាល​
ក្នុងករណី​ដែល​ម្តាយ​រង​ភាព​ស្ត្រេ​ស​ច្រើន ឬ​ជាប់​រហូត ការលូតលាស់​របស់​ទា​រក​អាច​នឹង​ប៉ះពាល់​ផង​ដែរ​ខណៈ​ពេល​ដែល​គេ​កំពុងតែ​ស្ថិត​ក្នុង​ដំណាក់កាល​លូតលាស់​។

ពិបាក​គេង​
ទារក​ដែល​មាន​ម្តាយ​កើត​ជំងឺស្ត្រេស​រ៉ាំរ៉ៃ គេ​អាច​នឹង​ប្រឈម​ខ្ពស់​នឹង​ជំងឺ​ទាក់ទង​នឹង​ការ​គេង​នៅ​ពេល​កើត​។

កើត​មិន​គ្រប់​ខែ​
ការ​ដែល​ស្ត្រេ​ស​ខ្លាំងពេក ឬ​ជាប់​រយៈពេល​យូរ​ក៏​អាច​ធ្វើឲ្យ​ប្រឈម​កាន់តែ​ខ្លាំង​នឹង​ការ​សម្រាលកូន​មិន​គ្រប់​ខែ​ដែរ​។

កូន​កើត​មិន​គ្រប់​ទម្ងន់​
ទម្ងន់​របស់​ទារក​ទើប​នឹង​កើត​ក៏​ប្រហែលជា​មិន​គ្រប់​ទេ បើសិន​ជា​ម្តាយ​មាន​ភាព​ស្ត្រេ​ស និង​មាន​សម្ពាធ​ផ្លូវចិត្ត​ច្រើន​ពេក​ក្នុង​ពេល​មាន​ផ្ទៃពោះ​។

កូន​ធំ​ឡើង​អាច​នឹង​មាន​បញ្ហា​ទាក់ទង​នឹង​អាកប្បកិរិយា​
ក្មេង​ដែល​ធំ​ឡើង​មាន​បញ្ហា​ទាក់ទង​នឹង​អាកប្បកិរិយា​អាច​នឹង​កើតឡើង​បាន​បើសិនជា​ម្តាយ​ចេះតែមាន​ជំងឺស្ត្រេស​រ៉ាំរ៉ៃ និង​ខ្លាំងក្លា​រាល់​ថ្ងៃ​ក្នុង​ពេល​មាន​ផ្ទៃពោះ​។

គន្លឹះ​ដើម្បី​បំបាត់​ស្ត្រេ​ស​ដែល​ស្ត្រី​មាន​ផ្ទៃពោះ​គ្រប់រូប​គួរតែ​ធ្វើឲ្យបាន​៖

  • ​ញ៉ាំ​អាហារ​ដែល​ត្រឹមត្រូវ និង​ទៀងពេល​
  • សម្រាល​គ្រប់គ្រាន់​ឲ្យបាន​យូរ​បើសិនជា​មាន​អារម្មណ៍​ថា​គេង​ពី​យប់​មិន​គ្រប់​
  • ​ហាត់ប្រាណ​ទៀងទាត់​ដើម្បី​បំបាត់​ស្ត្រេ​ស​ក្នុង​អារម្មណ៍ និង​រាងកាយ​
  • ​ការអនុវត្ត​ហាត់​ក្បាច់​យូ​ហ្គា តាំង​សមាធិ និង​ដកដង្ហើម​ជ្រៅៗ​ក៏​អាច​ជួយ​ដោះស្រាយ​រឿង​នេះ​បានដែរ​
  • ​កុំ​មាន​ការអៀនខ្មាស់​ឲ្យសោះ​ក្នុង​ការស្នើ​សុំ​ការគាំទ្រ​ពី​ប្តី គ្រួសារ ឬ​មិត្តភក្តិ​៕