អនាម័យផ្ទាល់ខ្លួនគឺជារឿងសំខាន់បំផុត ជាពិសេសក្នុងពេលមានផ្ទៃពោះ។ ការដែលមានអនាម័យល្អនឹងជួយថែរក្សាអ្នក និងទារកក្នុងផ្ទៃចៀសផុតពីការបង្ករោគ មិនស្រួលខ្លួន និងស្រស់ស្រាយក្នុងអារម្មណ៍ថែមទៀត។ ការដែលគ្មានអនាម័យអាចនឹងប៉ះពាល់ដល់សុខភាពទារកដោយផ្ទាល់បាន។ វាក៏អាចបណ្តាលឲ្យមានជំងឺធ្ងន់ធ្ងរថែមទៀតផង។
បម្រែបម្រួលអ័រម៉ូនដើរតួនាទីដ៏សំខាន់មួយក្នុងពេលមានផ្ទៃពោះ។ ការដែលធំក្លិនខ្លួនខ្លាំង ទ្វារមាសស្ងួត ស្បែកស្ងួត សុទ្ធតែបណ្តាលមកពីការបម្រែបម្រួលអ័រម៉ូននេះឯង។
អនាម័យទ្វារមាស
ការបង្ករោគដោយបាក់តេរីនៅទ្វារមាស (Bacterial Vaginiosis, BV) ច្រើនតែកើតមានជាញឹកញ៉ាប់ចំពោះមនុស្សស្រី។ តែបើសិនជាកើតលើស្ត្រីមានផ្ទៃពោះវិញ វាអាចនឹងបណ្តាលឲ្យកូនកើតមិនគ្រប់ខែ កូនកើតមិនគ្រប់ទម្ងន់ និងរលូត។ ការនោមញឹក ចេញទឹករំអិលពីទ្វារមាស និងការបែកញើសអាចបណ្តាលមកពីកត្តាច្រើនយ៉ាង។ ការបែកញើសច្រើនក៏ធ្វើឲ្យស្បែកទៅជាមានកន្ទួលរមាស់ ដែលបណ្តាលឲ្យមានការបង្ករោគជាច្រើនផងដែរ។ ការនោមញឹកគឺជារឿងធម្មតារបស់ស្ត្រីមានផ្ទៃពោះ។ ការថែរក្សាអនាម័យទ្វារមាសក្រោយពីចេញពីបន្ទប់ទឹករួចគឺជារឿងដែលត្រូវតែធ្វើដើម្បីចៀសវាងការបង្ករោគ។ ចូរកុំប្រើផលិតផលអ្វីដើម្បីសម្អាតឲ្យសោះ។ អ្នកគ្រាន់តែប្រើសាប៊ូធម្មតាៗទៅបានហើយ។ កុំភ្លេចលាងសម្អាតដៃជានិច្ចជាមួយនឹងក្តៅឧណ្ឌៗផង។
អនាម័យមាត់ធ្មេញ
ខណៈពេលដែលអ្នកប្រហែលជាមិនមានឃើញនូវការប្រែប្រួលចំពោះសុខភាពមាត់ធ្មេញក្នុងត្រីមាសដំបូងក៏ដោយ តែក៏កុំភ្លេចប្រើអំបោះរូសធ្មេញ ដុសធ្មេញ និងខ្ពុរមាត់ជាប្រចាំឲ្យសោះ។ ការថែរក្សាមាត់ធ្មេញដោយផ្ទាល់គឺមានឥទ្ធិពលចំពោះសុខភាពទារកដែរ។ ការពិគ្រោះជាមួយពេទ្យធ្មេញជាប្រចាំក៏ជាអ្វីដែលត្រូវធ្វើដែរ។ យ៉ាងណាមិញ ការប្រែប្រួលរបស់អ័រម៉ូនក្នុងខ្លួនអាចបណ្តាលឲ្យមាត់ងាយនឹងមានបាក់តេរីរស់នៅច្រើន ព្រមទាំងកំណកជាច្រើននាំឲ្យហើមអញ្ចាញធ្មេញបាន។ ករណីបែបនេះក៏ងាយនឹងប៉ះពាល់ដល់ទារកក្នុងផ្ទៃដែរ។
អនាម័យសុដន់
ការលេចទឹករំអិលចេញពីក្បាលសុដន់គឺជាអ្វីដែលអ្នកមិនចង់ឲ្យកើតឡើងទេ ប៉ុន្តែវាទំនងជារឿងដែលមិនអាចចៀសផុតឡើយ។ ដោយសារតែបម្រែបម្រួលអ័រម៉ូន ការចេញទឹកដោះដំបូងទំនងជាកើតឡើងនៅត្រីមាសចុងក្រោយ ដែលជាហេតុនាំឲ្យអ្នកងាយនឹងមានការរមាស់ ហើយអ្វីដែលកម្រនោះគឺឡើងកន្ទួលរមាស់តេម្តង។ យ៉ាងណាមិញ ចូរកុំប្រើផលិតផលលាងសម្អាតណាដែលមានជាតិគីមីច្រើនឲ្យសោះ។ អ្នកគ្រាន់តែលាងសម្អាតសុដន់ជាមួយនឹងទឹកក្តៅឧណ្ហៗ និងសម្ងួតវាជាមួយនឹងកន្សែងទន់ទៅបានហើយ។ ការដែលចេះថែរក្សាសុដន់បានល្អនឹងជំរុញដល់ការមានសុខភាពល្អ៕
