សាច់កែច្នៃរួមមានសាច់ក្រក ហតដក និង​សាច់ដែលគេកែ​ច្នៃទុកឱ្យបានយូរ​ត្រូវបាន​បន្ថែម​សារធាតុ​គីមី​ផ្សេងៗ​រួមនឹងអំបិលជាដើម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) សាច់ប្រភេទនេះអាចមានរសជាតិឆ្ងាញ់និងងាយរកទិញបាន ប៉ុន្តែមិនល្អសោះឡើយចំពោះសុខភាពនិងសម្រស់។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលល្អៗដែលអាចកើតឡើងនៅពេលអ្នកឈប់ញ៊ាំសាច់កែច្នៃ ៖

១. សម្ពាធឈាមប្រក្រតី

សាច់កែច្នៃមានផ្ទុកសម្បូរទៅដោយជាតិសូដ្យូម ឬអំបិលដែលបង្កើនហានិភ័យនៃបញ្ហាលើសសម្ពាធឈាមនៅពេលទទួលទានច្រើន ហើយជាប្រចាំ។ អ្នកជំងឺលើសសម្ពាធឈាមមិនគួរទទួលទានអាហារមានជាតិសូដ្យូមលើសពី ១៥០០មីលីក្រាមក្នុងមួយថ្ងៃឡើយ ប្រសិនបើមិនចង់ឱ្យស្ថានភាពនៃជំងឺកាន់តែអាក្រក់ឡើង។ ក្រៅពីកម្រិត ឬឈប់ទទួលទានសាច់កែច្នៃនិងអាហារផ្សេងទៀតដែលមានផ្ទុកជាតិសូដ្យូមខ្ពស់នោះអ្វីផ្សេងទៀតដែលអ្នកអាចធ្វើបានដើម្បីរក្សាសម្ពាធឈាមប្រក្រតី គឺការជ្រើសរើសរបបអាហារសុខភាពល្អនិងព្យាយាមធ្វើលំហាត់ប្រាណជាប្រចាំ។

២. ហានិភ័យនៃជំងឺបេះដូងនឹងត្រូវថយចុះ

ក្រៅពីមានផ្ទុកសារធាតុ nitrates ដែលបង្កបញ្ហានៃជំងឺមហារីកហើយនោះសាច់កែច្នៃជាប្រភពនៃជាតិខ្លាញ់មិនល្អនិងជាតិប្រៃខ្ពស់ដែលមិនល្អសោះឡើយចំពោះសុខភាពបេះដូង។ ម្យ៉ាងវិញទៀតដូចបានលើកឡើងក្នុងចំណុចខាងលើ គឺសាច់កែច្នៃអាចបណ្ដាលឱ្យសម្ពាធឈាមឡើងខ្ពស់ដែលជាកត្តាចម្បងមួយដែលបង្កបញ្ហាជំងឺបេះដូង។ ដូច្នេះហើយទើបការកម្រិត ឬឈប់ទទួលទានសាច់កែច្នៃតែម្ដងអាចជួយកាត់បន្ថយហានិភ័យនៃជំងឺបេះដូង។

៣. ហានិភ័យនៃជំងឺមហារីកក៏ត្រូវបានកាត់បន្ថយ

តើអ្នកធ្លាប់ដឹងទេថាសាច់កែច្នៃច្រើនមានផ្ទុកសម្បូរទៅដោយជាតិប្រៃ ឬអំបិល ខ្លាញ់មិនល្អ និងសារធាតុរក្សាទុកបានយូរដែលសុទ្ធសឹងតែអាចបង្កើនហានិភ័យនៃជំងឺមហារីក ក៏ដូចជាបញ្ហាសុខភាពផ្សេងៗទៀតគួរឱ្យបារម្ភ? ដូច្នេះការកម្រិត ឬឈប់ទទួលទានសាច់កែច្នៃក៏អាចជួយកាត់បន្ថយហានិភ័យនៃជំងឺមហារីកបានដែរ ពិសេស គឺជំងឺមហារីកពោះវៀនធំ។

៤. សុខភាពខួរក្បាលល្អប្រសើរ

ពិតណាស់ជាតិប្រូតេអ៊ីន គឺចាំបាច់សម្រាប់រក្សាសុខភាពកោសិកាខួរក្បាល ប៉ុន្តែមិនល្អសោះឡើយប្រសិនបើវាមានប្រភពចេញពីអាហារ ឬសាច់កែច្នៃ។ អាហារកែច្នៃច្រើនតែមានផ្ទុកនូវសារធាតុគីមីដែលអាចបង្កការរលាកនិងបំផ្លាញដល់កោសិកាខួរក្បាល។ ដូច្នេះការកម្រិត ឬបញ្ឈប់ការទទួលទានសាច់កែច្នៃពិតជាអាចផ្ដល់ផលល្អចំពោះសុខភាពខួរក្បាល៕