ទម្លាប់មួយចំនួនជះឥទ្ធិពលគួរឱ្យព្រួយបារម្ភចំពោះកម្រិតនៃជាតិស្ករក្នុងឈាមបង្កើនហានិភ័យនៃជំងឺទឹកនោមផ្អែម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ថាតើទម្លាប់ទាំងនោះមានអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលបង្កើនហានិភ័យនៃជំងឺទឹកនោមផ្អែម ៖

១. ការទទួលទានមិនទៀងទាត់

អ្នកដែលរំលងម៉ោងអាហារញឹកញាប់ ឬទទួលទានមិនទៀងទាត់សោះ គឺងាយនឹងកើតជំងឺទឹកនោមផ្អែមណាស់។ ការទទួលទានទៀងទាត់នឹងរក្សាកម្រិតនៃអាំងស៊ុយលីនឱ្យមានតុល្យភាព។ ដូច្នេះនៅពេលរំលងអាហារមួយពេល ឬទទួលទានមិនទៀងទាត់ចន្លោះម៉ោងអាហារធំៗអាចរាំងស្ទះដល់ការផលិតអាំងស៊ុយលីន។ ហើយនៅពេលអ្នកត្រឡប់មកទទួលទានតាមទម្លាប់ធម្មតាវិញរាងកាយនឹងមិនអាចបំបែកជាតិស្ករបានត្រឹមត្រូវឡើយដែលជាហានិភ័យនៃជំងឺទឹកនោមផ្អែម។

២. ទទួលទានប្រូតេអ៊ីនច្រើនពេក

ប្រូតេអ៊ីន គឺជាក្រុមនៃអាហារដ៏សំខាន់បំផុតមួយដែលរាងកាយត្រូវការដើម្បីរក្សាបាននូវសុខភាពល្អរឹងមាំ។ ទោះជាយ៉ាងណាមិនមែនមានន័យថាអ្នកអាចទទួលទានបានតាមចិត្តចង់ឡើយ ពិសេសចំពោះអ្នកចូលចិត្តទទួលទានសាច់ក្រហម! នេះក៏ព្រោះតែការទទួលទានច្រើនពេកអាចបង្កើនហានិភ័យនៃជំងឺទឹកនោមផ្អែមនិងមហារីក។ គួរកម្រិតការទទួលទានមិនលើសពី ២ ដងក្នុងមួយសប្តាហ៍ដោយជំនួសមកវិញនូវត្រី សាច់មាន់ និងបន្លែច្រើនដើម្បីទទួលបានប្រូតេអ៊ីនគ្រប់គ្រាន់។

៣. រំលងអាហារពេលព្រឹក

អ្នកដែលចូលចិត្តរំលងមិនទទួលទានអាហារពេលព្រឹកក៏ងាយនឹងកើតជំងឺទឹកនោមផ្អែមគួរឱ្យកត់សម្គាល់។ នេះក៏ព្រោះតែសមត្ថភាពរបស់រាងកាយក្នុងការរក្សាគ្រប់គ្រងជាតិស្ករប្រែជាមិនប្រក្រតី។ ការទទួលទានអាហារពេលព្រឹកជួយជម្រុញការចាប់ផ្ដើមការរំលាយអាហារនិងមុខងាររាងកាយដែលនេះអនុញ្ញាតឱ្យរាងកាយបំបែកជាតិស្ករតាំងពីព្រឹកដើម្បីផ្ដល់ថាមពលនិងបំលែងស្ករ។ ការរំលងអាហារពេលព្រឹករងចាំរហូតដល់ថ្ងៃអាចពន្យឺតការផលិតអាំងស៊ុយលីនបង្កើនហានិភ័យនៃជំងឺទឹកនោមផ្អែម។

៤. គេងមិនគ្រប់

អតុល្យភាពនៃអ័រម៉ូនដោយសារការគេងមិនគ្រប់ក៏អាចជះឥទ្ធិពលលើការផលិតអាំងស៊ុយលីនផងដែរ។ បញ្ហាផ្សេងៗពាក់ព័ន្ធជាមួយអាំងស៊ុយលីអាចបណ្ដាលអោយកម្រិតនៃជាតិស្ករក្នុងឈាមនៅតែខ្ពស់គ្រប់ពេល ហើយអ្នកប្រាកដជាប្រឈមមុខនឹងហានិភ័យនៃជំងឺទឹកនោមផ្អែមមិនខាន។

៥. កង្វះសកម្មភាពរាងកាយ

ភាពធាត់ជ្រុលជាមូលហេតុចម្បងបំផុតមួយនៃជំងឺទឹកនោមផ្អែមនិងជំងឺបេះដូង។ ហើយភាពធាត់ជ្រុលនេះងាយនឹងកើតឡើងដោយសារតែកង្វះនៃសកម្មភាពរាងកាយ។ អ្នកមិនចាំបាច់តែធ្វើសកម្មភាពរាងកាយ ឬធ្វើលំហាត់ប្រាណខ្លាំងក្លាឡើយ ត្រឹមតែការដើរ រត់ ឬជិះកង់ គឺអាចប្រយុទ្ធប្រឆាំងនឹងជំងឺទឹកនោមផ្អែមបានហើយ។ សកម្មភាពរាងកាយជួយឱ្យកម្រិតនៃជាតិស្ករក្នុងឈាមមានតុល្យភាពដែលនេះជាមូលហេតុដែលអ្នកគួរព្យាយាមធ្វើលំហាត់ប្រាណជាប្រចាំដើម្បីចៀសផុត ឬកាត់បន្ថយហានិភ័យនៃជំងឺទឹកនោមផ្អែម។

៦. ស្ត្រេស

កម្រិតនៃជាតិស្ករក្នុងឈាមអាចកើនឡើងប្រសិនបើរាងកាយស្ថិតក្នុងស្ថានភាពស្ត្រេសជាប្រចាំដែលនេះបង្កើនហានិភ័យនៃជំងឺទឹកនោមផ្អែមបានយ៉ាងងាយ។ ដូច្នេះដើម្បីជាការប្រសើរចូរព្យាយាមគ្រប់គ្រងកម្រិតនៃភាពស្ត្រេសរបស់អ្នក៕