កាលពីពេលថ្មីៗនេះ ប្តីប្រពន្ធពីរនាក់ត្រូវបានតុលាការហាមឃាត់មិនឱ្យចិញ្ចឹមសត្វឡើយ បន្ទាប់ពីពួកគេបានធ្វើឱ្យឆ្មារបស់ខ្លួនរស់នៅក្នុងស្ថានភាពស្មោកគ្រោកគួរឱ្យខ្ពើម។
លោក តូនី ផេក (Tony Peck) អាយុ ៤១ ឆ្នាំ និងប្រពន្ធរបស់គាត់ឈ្មោះ ហេលែន (Helen) អាយុ ៥២ ឆ្នាំបានចិញ្ចឹមឆ្មាចំនួន ៤ ក្បាលក្នុងស្ថានភាពកខ្វក់ និងទីធ្លាតូចចង្អៀត ពេកនៅផ្ទះរបស់ពួកគេក្នុងភូមិក្លីហ្វតុន (Clifton) ក្រុងណតធីងហែម (Nottingham) ប្រទេសអង់គ្លេស។
រូបភាពគួរឱ្យតក់ស្លុតទាំងនេះ បង្ហាញពីទិដ្ឋភាពក្នុងបន្ទប់ដែលប្រឡាក់ប្រឡូសសុទ្ធតែលាមក គួរឱ្យខ្ពើមរអើម ចំណែកឯកំប៉ុងចំណីឆ្មាគរខ្ពស់ស្ទើរដល់ពិដាន។ ដោយសារតែឃើញ អាណិតសត្វ អ្នកជិតខាងម្នាក់បានប្តឹងអង្គការគាំពារសិទ្ធិសត្វ RSPCA ឱ្យជួយអន្តរាគមន៍។ អង្គការនេះបានសុំលិខិតឆែកឆេរពីប៉ូលិស បន្ទាប់ពីខ្លួនមិនអាចចូលទៅពិនិត្យមើល សុខមាលភាពរបស់ឆ្មាទាំងនោះបាន។
ទីបំផុត តុលាការបានសម្រេចហាមប្រាមប្តីប្រពន្ធនេះមិនឱ្យចិញ្ចឹមសត្វ រយៈពេល ៣ ឆ្នាំ កាលពីថ្ងៃសុក្រសប្តាហ៍មុន ពីព្រោះពួកគេមានពិរុទ្ធភាពពីបទល្មើស ៣ ករណីនៃច្បាប់ស្តីពី សុខុមាលភាពសត្វ ប៉ុន្តែមិនធ្ងន់ធ្ងរដល់ថ្នាក់ជាប់ពន្ធនាគារទេ៕
ប្រភព៖ rasmeinews.com