ភាគច្រើននៃពួកយើងប្រហែលជាមិនធ្លាប់ដឹងទេថារាងកាយនឹងបញ្ចេញអាការៈអ្វីខ្លះនៅពេលត្រូវការជាតិសសៃបន្ថែម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាការៈដែលអ្នកដល់ពេលគួររួមបញ្ចូលជាតិសសៃបន្ថែមក្នុងរបបអាហារប្រចាំថ្ងៃ ៖

១. អ្នកឈឺបត់ជើងធំតិចជាង ៣ ដងក្នុងមួយសប្តាហ៍

ធ្លាប់ដឹងទេថាអ្នកកំពុងទល់លាមកហើយប្រសិនបើឈឺបត់ជើងធំបានតិចជាង ៣ ដងក្នុងមួយសប្តាហ៍? ជាធម្មតាបញ្ហាទល់លាមកច្រើនតែកើតឡើងដោយសារកង្វះជាតិសសៃដើម្បីសម្រួលដល់ចលនាពោះវៀននិងការរំលាយអាហារ។ ដូច្នេះវាដល់ពេលដែលអ្នកគួរចាប់ផ្ដើមបង្កើនការញ៊ាំអាហារសម្បូរជាតិសសៃនិងទទួលទានទឹកឱ្យបានច្រើនគ្រប់គ្រាន់ដើម្បីដោះស្រាយ ព្រមទាំងទប់ស្កាត់បញ្ហាទល់លាមកហើយ។

២. ឡើងជាតិហ្គាសច្រើនក្នុងពោះ

អាការៈនេះច្រើនតែអមមកជាមួយបញ្ហាទល់លាមក។ ទោះជាយ៉ាងណាបញ្ហាផ្សេងទៀតពាក់ព័ន្ធនឹងប្រព័ន្ធរំលាយអាហារក៏បង្កបញ្ហាឡើងហ្គាសច្រើនលើសផងដែរ។ ដូច្នេះប្រសិនបើអាការៈហាក់ដូចជាមិនប្រសើរសោះ ឬអមមកជាមួយរោគសញ្ញាមិនប្រក្រតីផ្សេងៗចូរកុំស្ទាក់ស្ទើនឹងទៅពិគ្រោះជាមួយគ្រូពេទ្យ។

៣. ឃ្លានសឹងគ្រប់ពេល

ជាតិសសៃអាចធ្វើឱ្យអ្នកមានអារម្មណ៍ឆាប់ឆ្អែតនិងបានយូរ។ ដូច្នេះហើយទើបរបបអាហារដែលមានផ្ទុកជាតិសសៃទាបអាចបណ្ដាលឱ្យអ្នកឆាប់ឃ្លានវិញ ឬឃ្លានមិនឈប់។

៤. កូឡេស្តេរ៉ូលនិងសម្ពាធឈាមឡើងខ្ពស់

មួយក្នុងចំណោមបញ្ហាសុខភាពគួរឱ្យបារម្ភដែលបណ្ដាលមកពីកង្វះជាតិសសៃក្នុងរាងកាយ គឺកូឡេស្តេរ៉ូលឡើងខ្ពស់។ អ្នកឯកទេសសុខភាពបេះដូងនិយាយថាជាតិសសៃជួយកម្ចាត់កូឡេស្តេរ៉ូលដែលលើសចេញពីក្នុងរាងកាយ។ ប្រសិនបើរបបអាហារគ្មានផ្ទុកជាតិសសៃគ្រប់គ្រាន់ទេនោះកម្រិតនៃកូឡេស្តេរ៉ូលមិនល្អប្រាកដជាអាចនឹងឡើងខ្ពស់ ហើយបង្កើនហានិភ័យនៃបញ្ហាសម្ពាធឈាម។ អ្វីដែលកាន់តែគួរឱ្យបារម្ភទៀតនោះ គឺកម្រិតនៃកូឡេស្តេរ៉ូលនិងសម្ពាធឈាមខ្ពស់អាចបង្កើនហានិភ័យនៃជំងឺបេះដូង។

៥. ជាតិស្ករក្នុងឈាមឡើងខ្ពស់

ជាតិសសៃរលាយអាចជួយពន្យឺតការស្រូបយកជាតិស្កររបស់រាងកាយ ហើយគ្រប់គ្រងកម្រិតនៃជាតិស្ករក្នុងឈាម។ ដូច្នេះហើយទើបជាតិស្ករក្នុងឈាមអាចនឹងឡើងខ្ពស់ ប្រសិនបើរបបអាហាររបស់អ្នកមានផ្ទុកជាតិសសៃទាប។ ដើម្បីជាការប្រសើរអ្នកគួរចាប់ផ្ដើមបង្កើនការទទួលទានជាតិសសៃនៅពេលជាតិស្ករក្នុងឈាមឡើងខ្ពស់៕