Apple បានចេញលក់ iPad ៤ ម៉ូដែល មាន iPad Mini 4, The iPad និង iPad Pro ពីរជំនាន់។ លើកលែងតែអ្នកចូលចិត្តរាងរបស់ Mini តែអ្នកប្រើប្រាស់ភាគច្រើននឹងជ្រើសរើសរវាង iPad និង ម៉ូដែលពីររបស់ iPad Pro។
តើ iPad និង iPad Pro មានចំណុចខុសគ្នាយ៉ាងណា?
១) តម្លៃ
iPad មានតម្លៃស្ទើរតែពាក់កណ្ដាលនៃ iPad Pro ដោយ៖
iPad ទំហំ ៩.៧ អ៊ីង តម្លៃចាប់ពី ៣២៩ ដុល្លារ ទៅ ៥៥៩ ដុល្លារ
iPad Pro ទំហំ ១០.៥ អ៊ីង តម្លៃចាប់ពី ៦៤៩ ទៅ ១ ១២៩ ដុល្លារ
iPad Pro ទំហំ ១២.៩ អ៊ីង តម្លៃចាប់ពី ៧៩៩ ទៅ ១ ២៧៩ ដុល្លារ
២) iPad Pro មានបច្ចេកវិទ្យាថ្មី តែស្តង់ដារអេក្រង់របស់ iPad នៅតែមានគុណភាពខ្ពស់
ចំណុចខុសគ្នាធំបំផុតរវាង iPad និង iPad Pro គឺអេក្រង់។ ម៉ូដែល iPad Pro ប្រើបច្ចេកវិទ្យា ProMotion មានកម្រិត Refresh ១២០ Hz ជួយឲ្យការប្រើប្រាស់ដូចជាអូសមើលវេបសាយ ឬមើលវីដេអូបានរលូនល្អ។ ជាពិសេស ពេលប្រើជាមួយ Apple Pencil កម្រិត Refresh បែបនេះ ជួយឲ្យការសរសេរលើ iPad មើលទៅដូចសរសេរលើក្រដាសអីចឹង។
iPad ទំហំ ៩.៧ អ៊ីងថ្មីអាចប្រើ Apple Pencil ដូចគ្នា ហើយគ្រប់យ៉ាងមើលទៅនៅល្អលើអេក្រង់ប្រភេទ Retina។ ពេលកាន់ iPad និង iPad Pro ប្រាកដជាសម្គាល់ឃើញចំណុចខុសគ្នា តែមិនជាខកចិត្តច្រើននោះទេ បើ iPad មិនប្រើ ProMotion។
៣) iPad ទំហំ ៩.៧ អ៊ីង មិនអាចភ្ជាប់ប្រើមុខងារ Smart Keyboard របស់ Apple
iPad អាចភ្ជាប់ប្រើស្ទើរតែគ្រប់យ៉ាងដូចម៉ូដែល iPad Pro ដោយសារប្រើបច្ចេកវិទ្យា Bluetooth និង WiFi ដូចគ្នា រួមទាំងអាចប្រើ Apple Pencil បានដូចគ្នា។
ឧបករណ៍មួយប៉ុណ្ណោះប្រើបានតែលើម៉ូដែល iPad Pro គឺ Smart Keyboard របស់ Apple។ ដោយ Smart Connectors បំពាក់ក្នុង iPad Pro អាចភ្ជាប់ប្រើ Smart Keyboard ដោយស្វ័យប្រវត្តិ ក្នុងការបញ្ជូនទិន្នន័យ និងថាមពល។ រីឯតម្លៃ Smart Keyboard មានជិត ២០០ ដុល្លារ។
៤) អេក្រង់ធំ មិនតែងតែល្អនោះទេ
iPad រចនាដំបូង ពីឆ្នាំ ២០១០ មានទំហំអេក្រង់ ៩.៧ អ៊ីង ហើយតាំងពីនោះមក Apple នៅរក្សាទំហំនៅដដែល ត្បិតបន្ថែមជម្រើសទំហំផ្សេងទៀត ដូចជា iPad Mini និង iPad Pro។
iPad ៩.៧ អ៊ីង នៅតែជាទំហំអ្នកប្រើប្រាស់ភាគច្រើនចូលចិត្ត ដោយមានភាពងាយស្រួលក្នុងការប្រើប្រាស់តាមខ្លួន។
៥) iPad Pro មានកាមេរ៉ាល្អ អាចថតវីដេអូកម្រិត 4K និងថត Super slow motion ក្នុងល្បឿន ២៤០ Frames ក្នុងមួយវិនាទី តែអ្នកពិតទេយកវាផលិតខ្សែភាពយន្ត
អ្នកប្រហែលមិនត្រូវការគុណភាពកម្រិត 4K សម្រាប់ថតវីដេអូនៅផ្ទះនោះទេ ហើយក៏ប្រហែលមិនយក iPad ទៅថតវីដេអូនៅសាធារណៈដែរ ព្រោះមើលទៅដូចមិនសូវសម។
៦) ម៉ូដែល iPad Pro កាមេរ៉ា FaceTime ល្អប្រសើរ តែត្រឹមគុណភាព HD ល្មមអាចប្រើបាន
ម៉ូដែល iPad Pro អាចថតវីដេអូកម្រិត ១០៨០p HD ខណៈ iPad អាចថតកម្រិត ៧២០p HD។ លុះត្រាតែ អ្នកប្រើថតផលិតវីដេអូខ្លួនឯង កម្រិតត្រឹម ៧២០p HD នៅតែល្អ ល្មមអាចប្រើបាន។
៧) iPad ទំហំ ៩.៧ អ៊ីង និង iPad Pro ទំហំ ១០.៥ អ៊ីងមានទម្ងន់ដូចគ្នា ខណៈ iPad Pro ទំហំ ១២.៩ អ៊ីង ធ្ងន់ជាង
iPad Pro ១២.៩ អ៊ីង មានទម្ងន់ប្រហែល ០.៦ គីឡូក្រាម ខណៈ Device ពីរផ្សេងទៀតមានត្រឹម ០.៤ គីឡូក្រាម។ មើលទៅមិនប៉ុន្មាននោះទេ តែពេលកាន់ប្រើយូរៗ នឹងមានអារម្មណ៍ពិបាកកាន់ប្រើ។
៨) iPad Pro មិនមានកម្មវិធីអ្វីប្លែកលើ iPad នោះទេ
ទាំង iPad និង iPad Pro ប្រើ iOS មានកម្មវិធីនានាដូចគ្នា តែគ្រាន់ម៉ូដែល iPad Pro អាចប្រើកម្មវិធីច្រើនក្នុងពេលតែមួយ (៣ កម្មវិធី) ខណៈលើ iPad ប្រើបានកម្មវិធីពីរក្នុងពេលតែមួយ៕
ប្រភព៖ sabay.com.kh