មូលហេតុដែលយើងត្រូវការផ្លាស់ប្តូររបបអាហារគឺមានច្រើន និងប្រែប្រួលដូចជា សម្រកទម្ងន់ ស្បែកកាន់តែល្អជាងមុន ពង្រឹងដល់ការរំលាយអាហារ ប៉ុន្តែការញ៉ាំអាហារដើម្បីសុខភាពទ្វារមាសទំនងជាមិនត្រូវបានគេគិតគូរច្រើនឡើយ។ ការដែលរក្សាសុខភាពទ្វារមាសកាន់តែល្អ នឹងជួយអ្នកចៀសផុតពីការបង្ករោគ ទប់ស្កាត់បាក់តេរី និងធ្វើការកាន់តែល្អ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)
ករណីមានការបង្ករោគផ្សិតនៅទ្វារមាសជាប្រចាំ
មានហេតុផលច្រើនណាស់ដែលស្រ្តីអាចមានមានការបង្ករោគផ្សិតក្នុងទ្វារមាស ហើយក្នុងនោះក៏មានការធាត់ខ្លាំងផងដែរ។ ការដែលធាត់នាំឲ្យបែកញើសនៅគ្រលាន ដែលជាហេតុនាំឲ្យមេរោគផ្សិតងាយនឹងលូតលាស់ ហើយករណីដែលមានជំងឺទឹកនោមផ្អែមទៀត វាក៏ងាយនឹងធ្វើឲ្យមេរោគនេះលូតលាស់ឡើងវិញផងដែរ។ ប៉ុន្តែការបង្កើនចំនួនបាក់តេរីល្អៗក្នុងពោះវៀនក៏អាចផ្តល់ផលល្អដល់ទ្វារមាសបានដែរ ដូច្នេះការញ៉ាំភេសជ្ជៈមានជាតិប្រូបាយអូទិចរាល់ថ្ងៃ គឺជារឿងដែលត្រូវធ្វើ។ ប្រូបាយអូទិចដែលងាយស្រួលរកក្នុងស្រុកយើងគឺយ៉ាអួ និងគីមឈី។
ករណីរលាកប្លោកនោម ឬមានការបង្ករោគក្នុងផ្លូវទឹកនោម
ទឹកផ្លែ Cranberry ត្រូវបានគេរកឃើញថាអាចទប់ស្កាត់ការបង្ករោគក្នុងផ្លូវទឹកនោមបាន។ ស្រ្តីជាច្រើនក៏បានទទួលស្គាល់ចំពោះវិធីព្យាបាលមួយនេះដែរ ដោយសារតែវាមិនត្រឹមតែជួយព្យាបាលការឈឺចាប់ខ្លាំងក្នុងផ្លូវទឹកម៉ូត្រទេ តែក៏ជួយបង្ការកុំឲ្យវាកើតឡើងវិញដែរ។ ទោះបីជាវាមិនមានអំណះអំណាងខាងវេជ្ជសាស្រ្តក៏ដោយ តែការសាកល្បងញ៉ាំគឺគ្មានគ្រោះថ្នាក់អ្វីឡើយ។
ទ្វារមាសស្ងួត
ខណៈពេលដែលភាពស្ងួររបស់ទ្វារមាសច្រើនតែកើតជាញឹកញាប់បំផុតលើស្រ្តីក្រោយរ៉ាំងរដូវរួច តែវាត្រូវបានគេដឹងថាកើតឡើងលើស្រ្តីប្រមាណ ១៧ភាគរយនៃស្រ្តីវ័យ ១៨ ទៅ ៥០ឆ្នាំមុនពេលចាប់ផ្តើមរ៉ាំងរដូវ។ នេះដោយសារតែមូលហេតុមិនមែនអ័រម៉ូនទេ តែជាការប៉ះពាល់នឹងសារធាតុគីមី និងសាប៊ូមានជាតិកាត់ខ្លាំង។(អាន:ថ្នាំងងុយគេង ពេលអ្នកគួរប្រើ) ជាមួយគ្នានេះដែរ បើសិនជាអ្នកស្គមពេក ក្រពេញអូវ៉ែប្រហែលជាធ្វើការមិនបានល្អទេ ហើយកម្រិតអ័រម៉ូនអេស្រ្តូជែនក៏មានតិច រហូតដល់មុខងារទ្វារមាស និងចំណង់ផ្លូវភេទរងការប៉ះពាល់ផង៕