ប្រយ័ត្ន! ធ្វើការលើស ១០ ម៉ោងក្នុងមួយថ្ងៃ អាចបង្កើនហានិភ័យនៃបញ្ហាគួរឱ្យបារម្ភទាំងនេះ

តើអ្នកកំពុងចំណាយពេលធ្វើការលើសពី ១០ ម៉ោងក្នុងមួយថ្ងៃៗមែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នោះអ្នកកំពុងប្រឈមមុខនឹងហានិភ័យនៃបញ្ហាសុខភាពជាច្រើនហើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលប៉ះពាល់នៃការធ្វើការច្រើនម៉ោងពេកក្នុងមួយថ្ងៃៗ ៖

១. ជំងឺធ្លាក់ទឹកចិត្ត (Depression)

ការធ្វើការច្រើនជាងពី ៧ ឬ ៨ ម៉ោងក្នុងមួយថ្ងៃអាចបង្កើនហានភ័យនៃបញ្ហាជំងឺធ្លាក់ទឹកចិត្តគួរឱ្យបារម្ភ។ អ្នកជំនាញជាច្រើននិយាយថាបញ្ហានេះអាចកើតឡើងដោយសារការបាត់បង់ពេលវេលាដើម្បីចំណាយជាមួយនឹងមនុស្សដែលអ្នកស្រឡាញ់ ក៏ដូចជាមិនបានការធ្វើលំហាត់ប្រាណផងដែរ។

២. ជំងឺគេងមិនលក់

ការស្ទង់មតិមួយដែលធ្វើឡើងដោយអង្គការ National Sleep Foundation បានបង្ហាញថាច្រើនជាង ២០ ភាគរយនៃអ្នកដែលចំណាយពេលច្រើនជាង ៥០ ម៉ោងក្នុងមួយសប្តាហ៍នៅកន្លែងធ្វើការពិបាកគេងបានដល់ ៦ ម៉ោងណាស់នៅពេលយប់។ អ្វីដែលគួរឱ្យបារម្ភនោះ គឺការគេងមិនគ្រប់អាចបង្កបញ្ហាសុខភាពផ្សេងៗចាប់ពីភាពប្រែប្រួលនៃអារម្មណ៍ ធាត់ជ្រុលដល់ជំងឺបេះដូង។

៣. ស្ត្រេស

ការងារច្រើន រួមផ្សំនឹងកត្តាផ្សេងទៀតដូចជាគូប្រជែងនៅកន្លែងធ្វើការ ព្រមទាំងការកកស្ទះចរាចរណ៍សឹងរាល់ថ្ងៃអាចបណ្ដាលឱ្យអ្នកមានអារម្មណ៍តានតឹងខ្លាំង។ ស្ត្រេស ឬភាពតានតឹងក្នុងអារម្មណ៍រ៉ាំរ៉ៃអាចបណ្ដាលឱ្យរាងកាយមានផ្ទុកពោរពេញទៅដោយអ័រម៉ូនដែលជះផលប៉ះពាល់ដល់ទម្ងន់ សម្ពាធឈាម អារម្មណ៍ រូបរាង និងសុខភាពបេះដូង។

៤. បញ្ហាភ្នែក

ភ្នែករបស់អ្នកប្រាកដជាងាយនឹងអស់កម្លាំងណាស់ក្រោយពេលសម្លឹងមើលអេក្រង់កុំព្យូទ័ររាប់ម៉ោងក្នុងមួយថ្ងៃៗ។ ការអានរបាយការណ៍ ការទទួលនិងផ្ញើសារ ឬអ៊ីម៉ែលឆ្លើយឆ្លងតាមរយៈទូរសព្ទក៏ដាក់សម្ពាធខ្លាំងដល់ភ្នែករបស់អ្នកផងដែរ។

៥. បញ្ហាសុខភាពច្រើនផ្សេងទៀតដែលផ្សារភ្ជាប់នឹងការអង្គុយច្រើនពេក

ការចំណាយពេលច្រើនរាប់ម៉ោងជា​ប្រចាំក្នុងការិយាល័យ ឬកន្លែងធ្វើការអាចបណ្ដាលឱ្យអ្នកអង្គុយច្រើនជាងធ្វើលំហាត់ប្រាណ។ ហើយនេះជាមូលហេតុដែលបង្កើនហានិភ័យនៃបញ្ហាសុខភាពជាច្រើន៕