ងាយៗ! ក្លិនផោមនឹងលែងសូវធុំស្អុយ ជាមួយគន្លឹះទាំងនេះ

ការផោម ឬដើរខ្យល់ ជារបៀបធម្មតាមួយដែលរាងកាយបញ្ចេញជាតិហ្គាសមកក្រៅយ៉ាងហោចណាស់ចន្លោះពី ១០ ទៅ ២០ ដងក្នុងមួយថ្ងៃ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ពេលខ្លះក្លិនផោមមានលក្ខណៈស្អុយខ្លាំង ប៉ុន្តែជួនកាលគ្មានក្លិនឡើយ។ ថ្ងៃនេះវេបសាយសុខភាព Health.com.kh នឹងបង្ហាញពីគន្លឹះងាយៗជួយឱ្យផោមមិនសូវមានក្លិនស្អុយ ៖

១. ចៀសវាងទទួលទានបន្លែឆៅ

ប្រព័ន្ធរំលាយអាហារពិបាកនឹងរំលាយបន្លែឆៅដូចជាការ៉ុត ផ្កាខាត់ណាខៀវ ខ្ទឹមបារាំង ម្ទេសផ្លោក ស្ពៃក្ដោប និងបន្លែផ្សេងទៀត។ នៅពេលប្រព័ន្ធរំលាយអាហារត្រូវធ្វើការកាន់តែខ្លាំងនិងច្រើនប៉ុណ្ណា អ្នកក៏នឹងផោមញឹកប៉ុននោះដែរ។ ហើយថែមទាំងមានក្លិនមិនល្អទៀតផង!

២. ចៀសវាងភេសជ្ជៈមានជាតិហ្គាស

ការទទួលទានភេសជ្ជៈមានជាតិហ្គាស ឬផ្ទុកកាបូណាតមិនត្រឹមតែបណ្ដាលឱ្យផោមញឹកប៉ុណ្ណោះទេ ប៉ុន្តែថែមទាំងមានក្លិនស្អុយខ្លាំងទៀត។

៣. កាត់បន្ថយការទទួលទានអាហារផ្សំឡើងពីទឹកដោះគោ

ឡាក់តូស គឺជាជាតិស្ករម្យ៉ាងក្នុងទឹកដោះគោ និងភាគច្រើននៃផលិតផលអាហារផ្សំឡើងពីទឹកដោះគោដូចជា ការ៉ែម និងឈីស។ ចំពោះអ្នកដែលគ្មានអង់ស៊ីម lactase ក្នុងរាងកាយគ្រប់គ្រាន់អាចនឹងពិបាកក្នុងការរំលាយឡាក់តូស ឬហៅថាបានចាញ់ឡាក់តូស។ ការកើនឡើងនូវជាតិហ្គាស ហើយផោមញឹកមានក្លិនអាក្រក់ខ្លាំង គឺជារោគសញ្ញាមួយនៃការចាញ់ឡាក់តូស។ ប្រសិនបើអ្នកសង្ស័យថាខ្លួនឯងចាញ់ឡាក់តូស ចូរកាត់បន្ថយការទទួលអាហារផ្សំឡើងពីទឹកដោះគោ ឬទទួលទានថ្នាំ lactase មុននឹងទទួលទានអាហារដែលមានជាតិឡាក់តូស។

៤. កម្រិតការទទួលទានអាហារសម្បូរខ្លាញ់ឆ្អែត

ភាគច្រើននៃពួកយើងសុទ្ធតែដឹងហើយថាការរួមបញ្ចូលអាហារសម្បូរខ្លាញ់ឆ្អែតក្នុងរបបអាហារ គឺមិនល្អសោះឡើយចំពោះសុខភាព។ ក្រៅពីអាចបណ្ដាលឱ្យស្ទះសសៃឈាមនិងបង្កើនទម្ងន់ហើយនោះ អាហារប្រភេទនេះក៏បង្កើនការផលិតជាតិហ្គាសលើសកម្រិតនិងមានក្លិនមិនល្អខ្លាំងផងដែរ។

៥. ទទួលទានអាហារដែលបំបាត់ក្លិន

ក្រៅពីបន្ថយការទទួលទានអាហារដែលអាចបណ្ដាលឱ្យផោមរបស់អ្នកមានក្លិនអាក្រក់ខ្លាំងហើយនោះ អ្នកក៏គួររួមបញ្ចូលអាហារដែលមានប្រសិទ្ធភាពជួយបំបាត់ក្លិនស្អុយជំនួសវិញផង។ អាហារទាំងនោះរួមមានដំឡូងផ្អែម យ៉ាអួរ និងតែបៃតងជាដើម។

៦. ទំពារអាហារឱ្យបានត្រឹមត្រូវ

ក្រៅពីជួយសម្រួលដល់ប្រព័ន្ធរំលាយអាហារហើយនោះ ការទំពារអាហារឱ្យម៉ដ្ឋល្អក៏អាចជួយបន្ថយក្លិនស្អុយនៃផោមផងដែរ៕