បញ្ហាគួរឱ្យព្រួយបារម្ភបំផុតនៃសម្ពាធឈាមឡើងខ្ពស់ គឺវាអាចធ្វើឲ្យអ្នកប្រឈមមុខនឹងជំងឺសាហាវៗជាច្រើន រួមទាំងជំងឺសសៃឈាមបេះដូង ខ្សោយតម្រងនោម ដាច់សសៃឈាមខួរក្បាល និងគាំងបេះដូង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហើយបញ្ហាសម្ពាធឈាមឡើងខ្ពស់នេះអាចបណ្ដាលមកពីកត្តាផ្សេងៗរួមបញ្ចូលទាំងរបបអាហារនិងរបៀបរស់នៅប្រចាំថ្ងៃ។ ទោះជាយ៉ាងណាទម្លាប់ទូទៅមួយចំនួនក៏បង្កើនហានិភ័យនៃជំងឺលើសសម្ពាធឈាមផងដែរ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលអ្នកគួរជៀសវាង ឬបញ្ឈប់ភ្លាមដើម្បីទប់ស្កាត់ដោះស្រាយបញ្ហាសម្ពាធឈាមឡើងខ្ពស់ ឬលើសសម្ពាធឈាម ៖
១. ទទួលទានស្ករច្រើនពេក
ភាគច្រើននៃពួកយើងសុទ្ធតែដឹងថាការទទួលទានប្រៃច្រើនអាចបង្កបញ្ហាលើសម្ពាធឈាម។ ប៉ុន្តែថាតើអ្នកធ្លាប់ដឹងទេថាស្ករក៏អាចជះឥទ្ធិពលគួរឱ្យបារម្ភចំពោះសម្ពាធឈាមដែរ? ការទទួលទានស្ករលើសកម្រិតអាចបណ្ដាលឱ្យសម្ពាធឈាមឡើងខ្ពស់ដោយមូលហេតុពីរ។ ទីមួយវាធ្វើឱ្យអ្នកធាត់លើសទម្ងន់។ ហើយមូលហេតុលទីពីរនោះ គឺវាបង្កការរលាកក្នុងរាងកាយ។
២. ការប្រើប្រាស់ថ្នាំមួយចំនួន
ឥទ្ធិពលនៃថ្នាំមួយចំនួនដែលអ្នកទទួលទានអាចជាមូលហេតុពីក្រោយបញ្ហាសម្ពាធឈាមឡើងខ្ពស់។ ឧទាហរណ៍ថ្នាំប្រឆាំងជំងឺធ្លាក់ទឹកចិត្ត ថ្នាំពន្យារកំណើត និងពពួកថ្នាំ NSAIDs ជាដើម។ ថ្នាំរុក្ខជាតិមួយចំនួនក៏អាចបណ្ដាលឱ្យសម្ពាធឈាមរបស់អ្នកឡើងខ្ពស់ផងដែរ ចូរប្រយ័ត្ន។
៣. គេងមិនបានគ្រប់គ្រាន់
យោងតាមការសិក្សាស្រាវជ្រាវមួយនៃវិទ្យាស្ថានសុខភាពជាតិរបស់សហរដ្ឋអាមេរិក NCBI បានឱ្យដឹងថា ប្រមាណជា ៩០ ភាគរយនៃអ្នកដែលគេងមិនគ្រប់ ឬមានជំងឺគេងមិនលក់នឹងអាចជួបប្រទះនូវបញ្ហាសុខភាពគួរអោយបារម្ភជាច្រើន រួមទាំងបញ្ហាសម្ពាធឈាមឡើងខ្ពស់។ ដើម្បីជាការប្រសើរគួរគេងឱ្យបានពី ៧ ទៅ ៩ ម៉ោងក្នុងមួយយប់។
៤. ទទួលទានគ្រឿងស្រវឹងច្រើនពេក
ការទទួលទានគ្រឿងស្រវឹងក្នុងកម្រិតមធ្យម ២ កែវក្នុងមួយថ្ងៃសម្រាប់បុរស និង ១ កែវក្នុងមួយថ្ងៃសម្រាប់នារីពិតជាអាចជួយបញ្ចុះសម្ពាធឈាមរបស់អ្នកបាន ក៏ប៉ុន្តែការទទួលទានច្រើនលើសវិញនឹងបង្កទៅជាបញ្ហាសម្ពាធឈាមឡើងខ្ពស់គួរឱ្យព្រួយបារម្ភ។ ជៀសវាងការទទួលទានគ្រឿងស្រវឹង ប្រសិនបើអ្នកមានជំងឺលើសឈាម ឬកាត់បន្ថយការទទួលទានគ្រឿងស្រវឹងច្រើនលើសប្រសិនបើអ្នកចង់ជៀសផុតពីបញ្ហាសុខភាពនេះ។
៥. ស្ត្រេស
ធ្លាប់ដឹងទេថាស្ត្រេស ឬភាពតានតឹងក្នុងអារម្មណ៍ខ្លាំងជាប្រចាំក៏អាចបណ្ដាលឱ្យសម្ពាធឈាមឡើងខ្ពស់ផងដែរ? ដូច្នេះដើម្បីជាការប្រសើរ ចូរព្យាយាមគ្រប់គ្រង ឬកាត់បន្ថយភាពស្ត្រេសរបស់អ្នក៕