ងាយណាស់! ចង់បង្កើនកោសិកាគ្រាប់ឈាមក្រហម កុំរំលងគន្លឹះទាំងនេះ

កំពុងជួបប្រទះបញ្ហាខ្វះគ្រាប់ឈាមក្រហមដោយសារកង្វះជាតិដែកក្នុងរាងកាយមែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ក្រៅពីប្រើប្រាស់ថ្នាំគ្រាប់តាមវេជ្ជបញ្ជាហើយនោះ ក៏នៅមានគន្លឹះមួយចំនួនទៀតអាចជួយបង្កើនគ្រាប់ឈាមក្រហមតាមបែបធម្មជាតិ។ ខាងក្រោម Health.com.kh នឹងបង្ហាញឱ្យដឹងពីគន្លឹះទាំងនោះ ៖

១. រួមបញ្ចូលអាហារសម្បូរជាតិដែកក្នុងរបបអាហារប្រចាំថ្ងៃ

ជាតិដែក គឺចាំបាច់ណាស់សម្រាប់បង្កើតកោសិកាគ្រាប់ឈាមក្រហម។ ប្រភពដ៏ប្រសើរបំផុតនៃជាតិដែករួមមានថ្លើមសត្វ សាច់ក្រហម ស៊ុត បន្លែបៃតង សណ្ដែក តៅហ៊ូ គ្រាប់ធញ្ញជាតិ គ្រាប់ពូជ និងបាយអង្ករសម្រូបជាដើម។

២. កុំភ្លេចទទួលទានអាហារមានផ្ទុកជាតិទង់ដែង

ជាតិទង់ដែងក៏សំខាន់សម្រាប់ការផលិតជាតិដែកដែលជួយដល់ការបង្កើនកោសិកាគ្រាប់ឈាមក្រហមផងដែរ។ ប្រភពដ៏ប្រសើរបំផុតនៃជាតិទង់ដែងរួមមានសូកូឡាខ្មៅ គ្រាប់អាល់ម៉ុន គ្រាប់ផ្កាឈូករ័ត្ន ទំពាំងបារាំង និងសាច់បក្សី។

៣. ទទួលទានអាហារមានផ្ទុកសម្បូរដោយវីតាមីន B

ការទទួលទានអាហារដែលផ្ដល់ឱ្យរាងកាយនូវវីតាមីន B ពិសេស គឺវីតាមីន B2 វីតាមីន B3 វីតាមីន B9 និងវីតាមីន B12 ក៏ចាំបាច់ដើម្បីបង្កើនកោសិកាគ្រាប់ឈាមក្រហមតាមបែបធម្មជាតិ។ អ្នកអាចទទួលបានវីតាមីននេះពីស៊ុត សាច់មាន់ សាច់ក្រហម គ្រាប់ពូជ គ្រាប់ធញ្ញជាតិ ប​ន្លែបៃតង ​និងផលិតផលអាហារផ្សំឡើងពីទឹកដោះគោជាដើម។

៤. ទទួលទានអាហារសម្បូរដោយវីតាមីន E

ដើម្បីអាចផលិតកោសិកាគ្រាប់ឈាមក្រហមរាងកាយក៏ត្រូវការវីតាមីន E គ្រប់គ្រាន់ផងដែរ។ ប្រភពដ៏ល្អបំផុតនៃវីតាមីន E រួមមានផ្លែបឺរ គ្រាប់ធញ្ញជាតិ និងផ្សិតជាដើម។

៥. កុំភ្លេចធ្វើលំហាត់ប្រាណជាប្រចាំផង

ការធ្វើលំហាត់ប្រាណក៏ជួយផ្ដល់សញ្ញាឱ្យរាងកាយបង្កើនការផលិតកោសិកាគ្រាប់ឈាមក្រហមគួរឱ្យកត់សម្គាល់។ អ្នកមិនចាំបាច់ទាល់តែធ្វើលំហាត់ប្រាណខ្លាំងក្លាឡើយត្រឹមការដើរ រត់ ឬឡើងចុះជណ្ដើរក៏ប្រសើរហើយ៕