ស្រ្តីមានលក្ខណៈពិសេសជាងបុរសដោយសារតែ មានការមករដូវក្នុងពេលពេញវ័យ ហើយក៏ជារឿងមួយផ្តល់ជារឿងមិនមានផាសុកភាពជារៀងរាល់ខែដែរ។ ទោះបីជាវាផ្តល់អារម្មណ៍មិនស្រួលបែបនេះក៏ដោយ តែការមករដូវគឺជារបៀបដែលរាងកាយប្រាប់អ្នកថា ប្រព័ន្ធប្រដាប់បន្តពូជរបស់អ្នកកំពុងតែធ្វើការបានត្រឹមត្រូវឬអត់ដែរ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ជាធម្មតា វដ្តរដូវរបស់ស្រ្តីជាមធ្យមមានរយៈពពេល ២៨ថ្ងៃ ដែលវាអាចយូរជាងនេះ៣ ទៅ ៥ថ្ងៃ ទៅតាមការប្រែប្រួលរបស់សុខភាពស្រ្តីម្នាក់ៗ។ អ្នកជំនាញនិយាយថា ការលើស៣ថ្ងៃគឺជារឿងធម្មតា ហើយលើសដល់ ៧ថ្ងៃក៏នៅតែជារឿងធម្មតាដែរ។ ប៉ុន្តែសញ្ញាខាងក្រោមនេះបញ្ជាក់ថា រដូវអ្នកកំពុងតែបង្កបញ្ហាហើយ។
រដូវមកយឺត ឬឈប់មក
សម្រាប់ស្រ្តីវ័យ ២០ ទៅ៣០ឆ្នាំ ដែលមានភាពសកម្មខាងផ្លូវភេទ ការមានផ្ទៃពោះតែងតែជាដើមហេតុនាំឲ្យមិនឃើញមករដូវ។ ទោះបីជាពួកគេគិតថា បានការពារហើយក៏ដោយ ក៏វាមិនអាចធានាបាន ១០០ភាគរយដែរ។ ម៉្យាងវិញទៀត ស្រ្តីវ័យ ៤០ ទៅ៥០ឆ្នាំ អាចនឹងជិតរ៉ាំងរដូវ ដូច្នេះការមករដូវក៏តិចជាងធម្មតាដែរ។ ប៉ុន្តែបើសិនជាអ្នកលែងមករដូវរយៈពេល ១២ខែជាប់គ្នាពេញ នោះមានន័យថា អ្នកកំពុងតែរ៉ាំងរដូវហើយ ដែលជាធម្មតាច្រើនតែកើតឡើងលើស្រ្តីវ័យ ៥១ឆ្នាំឡើង។ មូលហេតុផ្សេងៗទៀតដែលអាចឲ្យបាត់រដូវដែរនោះមានដូចជា៖
- ជំងឺក្រពេញទីរ៉ូអ៊ីត ឬ ក្រពេញ Pituitary Gland
- បំបៅដោះកូន
- ធាត់ជ្រុល
- លេបថ្នាំគ្រាប់ពន្យាកំណើត
- ស្រ្តេស
- ចង្កោមរោគសញ្ញាគីសច្រើនគ្រាប់ក្នុងក្រពេញអូវ៉ែ
- ខ្សោយក្រពេញអូវ៉ែ
- ជំងឺស្បូន
រដូវមកច្រើនជាងធម្មតា
ស្រ្តីភាគច្រើនអាចធ្លាក់ឈាមរដូវប្រហែល ២ ទៅ ៣ស្លាបព្រាបាយប៉ុណ្ណោះជារៀងរាល់ខែ។ ស្រ្តីដែលមករដូវច្រើនៗអាចធ្លាក់ឈាមរដូវច្រើនជាង ៥ស្លាបព្រាបាយឯណោះ។ នៅពេលធ្លាក់ឈាមច្រើនបែបនេះ អ្នកនឹងបាត់បង់ជាតិដែកសម្រាប់ផលិតគ្រាប់ឈាមក្រហម និងដឹកនាំអុកស៊ីសែនចិញ្ចឹមរាងកាយ។ បើគ្មានជាតិដែកគ្រប់គ្រាន់តែ កោសិកាគ្រាប់ឈាមក្រហមនឹងចុះទាប និងបង្កជាភាពស្លេកស្លាំង និងងស់កម្លាំង។ ជំងឺដែលអាចឲ្យធ្លាក់ឈាមរដូវច្រើនៗមានដូចជា៖
- ដុំសាច់ក្នុងស្បូន
- រលូតកូន ឬកូនក្រៅស្បូន
- កំពុងតែប្រើប្រាស់ថ្នាំព្យាបាលជំងឺ (ថ្នាំរលាយឈាម ឬថ្នាំ Steroids)
- ផ្លាស់ប្តូរថ្នាំគ្រាប់ពន្យាកំណើត
- ជំងឺកំណកឈាម
- មហារីកស្បូន។
ធ្លាក់ឈាមចន្លោះពេលមករដូវ
បើសិនជាអ្នកធ្លាក់ឈាមចន្លោះពេលមករដូវ វាគួរតែជារឿងដែលត្រូវស្រាវជ្រាវ។ មូលហេតុវាអាចមានចាប់ពីតិចតួចដូចជា ដំបៅរលាកក្នុងទ្វារមាស ឬភ្លេចលេបថ្នាំពន្យាកំណើត ហើយបើករណីធ្ងន់ធ្ងរវិញអាចជាកូនក្រៅស្បូន ឬមហារីក។
មានការឈឺចាប់ខ្លាំងក្នុងពេលមករដូវ
ជាធម្មតារដូវមិនធ្វើមានផាសុកភាពក្នុងខ្លួនទេ ដោយស្រ្តីភាគច្រើនអាចឈឺចាប់បែបរមួលៗ ដោយសារតែស្បូនព្យាយាមកន្ត្រាក់ដើម្បីជម្រុះភ្នាស់របស់វាចេញមកខាងក្រៅ។ ជាធម្មតាមានលក្ខណៈតិចតួចទេ ហើយក៏ស្រាកស្រាន្តទៅវិញរយៈពេលមួយទៅពីថ្ងៃក្រោយ។ ប៉ុន្តែករណីដែលស្រ្តីមានការឈឺចាប់ខ្លាំងរហូតដល់គេងមិនកើត នោះគឺជាបញ្ហាហើយ ជាពិសេសនៅពេលមានអាការៈពាក់ព័ន្ធបន្ថែមដូចជា រាក់រូស ចង្អោ ក្អួត ឈឺគ្បាល ឬមិនមានផាសុកភាពនៅចង្កេះ។
ចូរទៅជួបគ្រូពេទ្យបើសិនជា៖
- ការមករដូវធ្លាប់តែមកទៀង តែប្រែជាមិនទៀងវិញ
- រដូវកើតឡើងយូរជាង២១ថ្ងៃ ឬតិចជាង ៣៥ថ្ងៃ រយៈពេលច្រើនខែ
- ឈាមរដូវធ្លាក់ច្រើនជាង ៧ថ្ងៃជាប់គ្នា
- ឈប់មករដូវរយៈពេល ១៣ខែជាប់គ្នាហើយ ស្រាប់តែធ្លាក់ឈាមរដូវម្តងទៀត
- ជោគសម្លីអណាម័យជារៀងរាល់ម៉ោង និងច្រើនម៉ោងជាប់គ្នា
- ធ្លាក់ឈាមចន្លោះពេលមករដូវ(អាន:ថ្នាំងងុយគេង ពេលអ្នកគួរប្រើ)
- ការមករដូវមានការឈឺចាប់ខ្លាំង៕