ប្រព័ន្ធសសៃប្រសាទដើរតួនាទីយ៉ាងចាំបាច់ក្នុងរាងកាយដោយវាទទួលខុសត្រូវសម្រាប់មុខងារផ្សេងៗគ្នានៃរាងកាយចាប់ពីការរំលាយអាហារដល់ប្រតិកម្មតបតនឹងស្ថានភាពផ្សេងៗដែលអ្នកជួបប្រទះ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រព័ន្ធសសៃប្រសាទក៏ទទួលទានខុសត្រូវចំពោះកម្រិតនៃភាពស្ត្រេសដែលមានន័យថាប្រសិនបើអ្នកថែរក្សាវាមិនបានត្រឹមត្រូវ ឬនៅពេលប្រព័ន្ធសសៃប្រសាទមានបញ្ហាវាអាចបង្កជំងឺផ្សេងៗ រួមទាំងជំងឺផ្លូវចិត្តផងដែរ។ ទោះជាយ៉ាងណាកុំបារម្ភពេក! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗរក្សាប្រព័ន្ធសសៃប្រសាទ ៖

១. គ្រប់គ្រងជំងឹទឹកនោមផ្អែម

អ្នកជំងឺទឹកនោមផ្អែមងាយនឹងជួបប្រទះបញ្ហាខូចសសៃប្រសាទណាស់ដោយសារកម្រិតនៃជាតិស្ករក្នុងឈាមគើងខ្ពស់។ ភាគច្រើនបញ្ហាខូចសសៃប្រសាទចំពោះអ្នកជំងឺទឹកនោមផ្អែមច្រើនកើតឡើងត្រង់ប្រអប់ជើង ប៉ុន្តែវាក៏អាចបង្កផលប៉ះពាល់ដល់ជើង ដៃ និងប្រអប់ដៃផងដែរ។ ដើម្បីជាការប្រសើរចូរជួបពិនិត្យជាមួយគ្រូពេទ្យជំនាញឱ្យបានទៀងទាត់និងអនុវត្តតាមការណែនាំ ឬវេជ្ជបញ្ជា។

២. ទទួលទានអាហារមានផ្ទុកសម្បូរទៅដោយវីតាមីន B

វីតាមីន B គឺជាសារធាតុចិញ្ចឹមដែលចាំបាច់សម្រាប់រក្សាសុខភាពសសៃប្រសាទនិងដើម្បីដំណើរការមុខងារបានយ៉ាងល្អ។ នេះហើយជាមូលហេតុដែលអ្នកគួររួមបញ្ចូលអាហារមានផ្ទុកសម្បូរទៅដោយវីតាមីន B ក្នុងរបបអាហរប្រចាំថ្ងៃ។

៣. រក្សាទម្ងន់ត្រឹមត្រូវមួយ

ភាពធាត់ជ្រុលអាចជះឥទ្ធិពលគួរឱ្យព្រួយបារម្ភលើសុខភាពរាងកាយទាំងមូល ក៏ដូចជាសសៃប្រសាទ។ ដូច្នេះដើម្បីជាការប្រសើរចូររក្សាឱ្យបាននូវទម្ងន់ត្រឹមត្រូវមួយតាមរយៈជម្រើសនៃរបបអាហារនិងការធ្វើលំហាត់ប្រាណ។

៤. ធ្វើលំហាត់ប្រាណជាប្រចាំ

ដើម្បីរក្សាបាននូវសុខភាពប្រព័ន្ធសសៃប្រសាទល្អប្រសើរ ចូរព្យាយាមធ្វើលំហាត់ប្រាណទៀងទាត់ជាប្រចាំ។ នេះក៏ព្រោះតែការធ្វើលំហាត់ប្រាណជួយទប់ស្កាត់ភាពធាត់ជ្រុលនិងបញ្ហាជាតិស្ករក្នុងឈាមឡើងខ្ពស់។

៥. ចៀសវាងការជក់បារីនិងទទួលទានគ្រឿងស្រវឹងច្រើនពេក

ជាតិពុលក្នុងបារីដែលជ្រាបចូលក្នុងរាងកាយអាចបង្កការបំផ្លាញសសៃប្រសាទគួរឱ្យបារម្ភ។ អ្នកក៏គួរចៀសវាងទទួលទានគ្រឿងស្រវឹងច្រើនពេកដែរ ក៏ព្រោះវាអាចជះផលប៉ះពាល់ដូចទៅនឹងបារី៕