គួរអាន! កត្តាអ្វីខ្លះបង្កើនហានិភ័យនៃបញ្ហាចង្វាក់បេះដូងលោតខុសប្រក្រតី?

ក្រៅពីបញ្ហានៃជំងឺបេះដូងហើយនោះ ចង្វាក់បេះដូងប្រែជាលោតមិនទៀតទាត់ ឬខុសប្រក្រតីអាចបណ្ដាលមកពីកត្តាស្មានមិនដល់មួយចំនួន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើកត្តាទាំងនោះមានអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីកត្តាដែលបង្កើនហានិភ័យនៃបញ្ហាចង្វាក់បេះដូងលោតខុសប្រក្រតី ៖

១. ការទទួលទានកាហ្វេច្រើនពេក

នេះក៏ព្រោះតែកាហ្វេមានផ្ទុកជាតិកាហ្វេអ៊ីន! ប្រសិនបើអ្នកទទួលទានកាហ្វេ ឬភេសជ្ជៈដែលមានផ្ទុកកាហ្វេអ៊ីនផ្សេងទៀតច្រើនពេកនោះអ្នកប្រាកដជាជួបប្រទះអាការៈបេះដូងលោតមិនទៀងជាមិនខាន។

២. ការទទួលទានគ្រឿងស្រវឹងច្រើន

ការទទួល​ទាន​គ្រឿង​ស្រវឹង​អាច​បង្ក​អាកា​រៈ​ញ័រ​ទ្រូង​ចំពោះ​អ្នក​ដែលមាន​ចង្វាក់បេះដូង​ធម្មតា​។ ហើយចំពោះអ្នក​ដែល​ទទួលទាន​គ្រឿង​ស្រវឹង​ជាប្រចាំ​នោះបេះដូង​របស់​ពួកគេ​ងាយនឹងចុះខ្សោយ​ដោយ​ចង្វាក់បេះដូង​លោត​មិន​ទៀង ឬ​លោត​ញាប់​បង្ក​ជា​ជំងឺ Atrial fibrillation (​បេះដូង​លោត​មិន​ប្រក្រតី​)​។​

៣. ការជក់បារី

ការជក់បារីមិនត្រឹមតែជះឥទ្ធិពលដល់សុខភាពសួតប៉ុណ្ណោះទេ ប៉ុន្តែក៏បង្កផលប៉ះពាល់ដល់ចង្វាក់បេះដូងផងដែរ។ នេះក៏ព្រោះតែបារីមានផ្ទុកជាតិនីកូទីនខ្ពស់។ វាក៏អាចបំផ្លាញសុខភាពបេះដូងគួរឱ្យបារម្ភ។

៤. ថ្នាំមួយចំនួន

ថ្នាំមួយចំនួនអាចចំនួនជះឥទ្ធិពលលើចង្វាក់បេះដូងគួរឱ្យកត់សម្គាល់។

៥. អតុល្យភាពនៃអេឡិចត្រូលីត្រក្នុងរាងកាយ

ត្រូវប្រាកដថាអ្នកបានទទួលទានសារធាតុរាវបានច្រើនគ្រប់គ្រាន់ក្នុងមួយថ្ងៃៗ! ក៏ព្រោះកង្វះជាតិទឹកក្នុងរាងកាយអាចបង្កបញ្ហាចង្វាក់បេះដូងលោតមិនទៀងទាត់ ជាពិសេសប្រសិនបើអ្នកជួបប្រទះបញ្ហាអតុល្យភាពអេឡិចត្រូលីតដូចជាសូដ្យូម ប៉ូតាស្យូម ម៉ាញ៉េស្យូម និងកាល់ស្យូម។

៦. សម្ពាធឈាមឡើងខ្ពស់

ត្រូវប្រាកដថាអ្នករក្សាសម្ពាធឈាមឱ្យស្ថិតក្នុងកម្រិតធម្មតាដោយជ្រើសរើសទម្លាប់នៃការទទួលទានអាហារដែលមានសុខភាពល្អ ធ្វើលំហាត់ប្រាណឱ្យបានទៀងទាត់ ចៀសវាងការជក់បារី និងទទួលទានគ្រឿងស្រវឹងច្រើនពេកហើយព្យាយាមកាត់បន្ថយស្ត្រេសផង។

៧. ជំងឺទឹកនោមផ្អែម

មានបញ្ហាសុខភាពច្រើនផ្សេងទៀតដែលអាចលេចឡើងប្រសិនបើអ្នកមានជំងឺទឹកនោមផ្អែម។ មួយក្នុងចំនោមនោះ គឺសម្ពាធឈាមឡើងខ្ពស់ដែលជាកត្តាហានិភ័យនៃបញ្ហាចង្វាក់បេះដូងខុសប្រក្រតី។

៨. ជំងឺសសៃឈាមបេះដូង

ជំងឺផ្សេងៗដែលពាក់ព័ន្ធនឹងបេះដូង រួមទាំងសសៃឈាមបេះដូងអាចបង្កបញ្ហាចង្វាក់បេះដូងលោតខុសប្រក្រតី ឬធ្វើឱ្យស្ថានភាពនៃអាការៈនេះកាន់តែអាក្រក់ឡើង។

៩. ជំងឺពាក់ព័ន្ធក្រពេញទីរ៉ូអ៊ីត

បញ្ហាមិនប្រក្រតីនៃក្រពេញទីរ៉ូអ៊ីតក៏ជាអ្វីមួយដែលអាចបង្កអាការៈចង្វាក់បេះដូងលោតមិនទៀងផងដែរ៕