ខណៈពេលដែលការញ៉ាំគ្រឿងស្រវឹងម្តងម្កាលមិនទំនងជាបង្កគ្រោះថ្នាក់ដល់សុខភាព តែការញ៉ាំច្រើនពេកអាចបង្កជាផលអវិជ្ជមានដល់រាងកាយ និងសុខភាពទូទៅបាន។ យ៉ាងណាមិញ អ្នកប្រហែលជាឆ្ងល់ថាតើការញ៉ាំគ្រឿងស្រវឹងច្រើនអាចបង្កគ្រោះថ្នាក់ដល់សុខភាពដូចម្តេចហើយ។ ការញ៉ាំគ្រឿងស្រវឹងច្រើនពេកអាចប៉ះពាល់ដល់សុខភាព និងផ្នែកជាច្រើននៃរាងកាយ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)វាមិនគ្រាន់តែបំផ្លាញសរីរាង្គសំខាន់ៗទេ តែក៏អាចប៉ះពាល់ដល់អារម្មណ៍ និងអាកប្បកិរិយាផងដែរ។
ខួរក្បាល
ការញ៉ាំគ្រឿងស្រវឹងច្រើនពេកអាចមានឥទ្ធិពលខូចខាតខ្លាំងដល់ប្រព័ន្ធសរសៃប្រសាទកណ្តាល។ កត្តាជាច្រើនដែលប៉ះពាល់ដល់ខួរក្បាលនេះមានដូចជា ការញ៉ាំច្រើន និងភាពញឹកញាប់នៃការញ៉ាំ អាយុដែលអ្នកចាប់ផ្តើមញ៉ាំ ភេទ និងច្រើនទៀត។ ឥទ្ធិពលដំបូងនៃគ្រឿងស្រវឹងចំពោះប្រព័ន្ធសរសៃប្រសាទកណ្តាលមានដូចជា និយាយឡុលៗ ខូចខាតការចងចាំ និងភ្នែកនិងដៃធ្វើការមិនបានត្រឹមត្រូវ។ ការញ៉ាំគ្រឿងស្រវឹងខ្លាំងពេកគឺជាកត្តាដ៏សំខាន់មួយនៃជំងឺភ្លេចភ្លាំងពេលចាស់ជរា ជាពិសេសស្រ្តីតែម្តង។ ថ្វីបើការខូចខាតខួរក្បាលអាចត្រឡប់មកធម្មតាវិញក្រោយពីឈប់ញ៉ាំរយៈពេលយូរ តែការញ៉ាំគ្រឿងស្រវឹងច្រើនៗ និងរ៉ាំរ៉ៃអាចបង្កជាការខូចខាតដល់មុខងារខួរក្បាលជាប់រហូតបាន។
ថ្លើម
ការខូចថ្លើមគឺជាផលវិបាកផ្សេងមួយទៀតនៃការញ៉ាំគ្រឿងស្រវឹងច្រើនៗ។ គ្រឿងស្រវឹងដែលអ្នកញ៉ាំភាគច្រើនត្រូវរំលាយក្នុងថ្លើម។ រឿងនេះនឹងបង្កើតជាផលិតផលគ្រោះថ្នាក់ដែលអាចបំផ្លាញកោសិកាថ្លើមបាន។ នៅពេលអ្នកបន្តញ៉ាំគ្រឿងស្រវឹងយូរទៀត សុខភាពថ្លើមនឹងធ្លាក់ចុះ។ ជំងឺខ្លាញ់រុំថ្លើមដោយសារតែគ្រឿងស្រវឹងគឺជាដំណាក់កាលដំបូងគេបំផុតនៃការខូចខាតថ្លើមដោយសារតែគ្រឿងស្រវឹង។ កាលណាការញ៉ាំគ្រឿងស្រវឹងច្រើនៗនៅតែបន្ត ជំងឺខ្លាញ់រុំថ្លើមអាចវិវត្តទៅជាកម្រិតធ្ងន់ រលាកថ្លើម ក្រិនថ្លើម និងខ្សោយថ្លើមដែលគម្រាមគំហែងដល់អាយុជីវិតបាន។
ការញៀន
ឥទ្ធិពលនៃគ្រឿងស្រវឹងអាចបណ្តាលឲ្យខូចខាតទាំងផ្លូវកាយ និងចិត្ត។ ការដែលមានអារម្មណ៍ញៀននឹងការញ៉ាំគ្រឿងស្រវឹង បារម្ភអំពីកន្លែង ឬពេលវេលាដែលអ្នកនឹងត្រូវញ៉ាំគ្រឿងស្រវឹងបន្ទាប់ និងការពិបាកធ្វើឲ្យខ្លួនឯងរីករាយដោយគ្មានការផឹកគ្រឿងស្រវឹងគឺជាអាការៈញឹកញាប់នៃការញៀនគ្រឿងស្រវឹងហើយ។ (អាន:ថ្នាំងងុយគេង ពេលអ្នកគួរប្រើ)មូលហេតុនៃការញៀននេះអាចមានលក្ខណៈស្មុគស្មាញ។ វាប្រហែលជាបង្កឡើងដោយហ្សែន និងប្រវត្តិគ្រួសារ ប៉ុន្តែមជ្ឈដ្ឋានជុំវិញខ្លួនក៏អាចដើរតួនាទីដ៏សំខាន់មួយដែរ៕