រមាស់ក្រហាយក្នុងបំពង់កមែនទេ? មិនពិបាកដោះស្រាយឡើយ! អានអត្ថបទនេះ

អាការៈរមាស់ក្នុងបំពង់កអាចផ្ដល់ភាពរំខាននិងមិនស្រួលជាខ្លាំង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាកុំបារម្ភ ក៏ព្រោះមានគន្លឹះមួយចំនួនអាចដោះស្រាយបញ្ហានេះបានយ៉ាងប្រសើរ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗបំបាត់អាការៈរមាស់បំពង់ក ៖

១. ចៀសវាងការជក់បារី

មួយក្នុងចំណោមមូលហេតុដែលធ្វើឱ្យអាការៈរមាស់បំពង់កកាន់តែខ្លាំងក្លាឡើង គឺដោយសារសារធាតុនីកូទីនពីក្នុងបារីដែលអ្នកជក់ ឬស្រូបផ្សែងចូល។ ដូច្នេះដើម្បីជាការប្រសើរចូរកុំជក់បារីនិងចៀសពីកន្លែងដែលពោពេញដោយផ្សែងបារី។

២. ទទួលទានទឹកឃ្មុំ

ដើម្បីបំបាត់អាការៈរមាស់ក្នុងបំពង់កអ្វីដែលអ្នកត្រូវធ្វើ គឺគ្រាន់តែទទួលទានទឹកឃ្មុំពី ២ ទៅ ៣ ស្លាបព្រាបាយក្នុងមួយថ្ងៃ។ អ្នកក៏អាចលាយទឹកឃ្មុំក្នុងទឹកតែ ឬទឹកក្ដៅឧណ្ហៗដើម្បីទទួលទានផងដែរ។

៣. ទឹកខ្មេះផ្លែប៉ោម

ជាតិអាស៊ីតក្នុងទឹកខ្មេះផ្លែប៉ោមជួយកម្ចាត់បាក់តេរីក្នុងបំពង់កហើយអ្នកនឹងធូរស្រាលពីអាការៈរមាស់បានយ៉ាងឆាប់រហ័ស។ អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោម ១ ស្លាបព្រាបាយក្នុងទឹកក្ដៅឧណ្ហៗ ១ កែវ។ កូរឱ្យសព្វសឹមទទួលទានដោយក្រេបម្ដងបន្តិចៗ។ បើមិនចង់ទទួលទានអ្នកក៏អាចប្រើប្រាស់ទឹកខ្មេះផ្លែប៉ោមមកខ្ពុរមាត់ជំនួសវិញ។ អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោម កន្លះពែង ជាមួយអំបិល ១ ស្លាបព្រាកាហ្វេ។ កូររហូតដល់អំបិលរលាយ សឹមបន្ថែមទឹកក្ដៅឧណ្ហៗ ១ ពែងចូល។ កូរអោយសព្វម្ដងទៀត សឹមខ្ពុរមាត់ជាមួយទឹកល្បាយនេះរៀងរាល់ ១៥ នាទី ម្ដង។

៤. ស​ម្អាតក្នុងផ្ទះ

ធូលីនិងកំទេចកំទីតូចៗក៏អាចបណ្ដាលឱ្យបំពង់កប្រែជារលាកនិងហើមរមាស់ ពិសេសនៅពេលអ្នកអាឡែកស៊ីប្រតិកម្មនឹងពួកវា។ ដូច្នេះដើម្បីជាការប្រសើរចូរព្យាយាមសម្អាតសព្វកន្លែងក្នុងផ្ទះដើម្បីកាត់បន្ថយបរិមាណនៃធូលីនិងកំទេចកំទីកខ្វក់។ កុំភ្លេចពាក់ម៉ាសនៅពេលសម្អាត។

៥. ទឹកអំបិល

អ្វីដែលអ្នកត្រូវធ្វើ គឺគ្រាន់តែលាយអំបិលក្នុងទឹកក្ដៅឧណ្ហៗកន្លះកែវ។ កូរឱ្យសព្វសឹមខ្ពុរមាត់ជាមួយទឹកល្បាយនេះ៕