រយៈពេលនៃការជាសះស្បើយនឹងអាស្រ័យទៅតាមភាពធ្ងន់ធ្ងររបស់អ្នកក្នុងថ្ងៃដំបូងនៃការឆ្លងជំងឺនេះដែរ។ អ្នកខ្លះនឹងឆាប់ជាពីជំងឺនេះ ខណៈពេលដែលខ្លះទៀតអាចនឹងមានបញ្ហាយូរ។ អាយុ ភេទ និងបញ្ហាសុខភាពផ្សេងៗទៀតក៏ជាហេតុធ្វើឲ្យប្រឈមនឹងជំងឺកូវីដ១៩កាន់តែធ្ងន់ធ្ងរបាន។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កាលណាអ្នកទទួលបានការព្យាបាលដែលមានការប៉ះពាល់កាន់តែខ្លាំង និងមានរយៈពេលយូរទៀតនោះ ការជាមកវិញក៏ត្រូវការពេលយូរដែរ។
តើមានអ្វីកើតឡើងទៅបើសិនជាខ្ញុំគ្រាន់តែមានអាការៈតិចតួច?
មនុស្សភាគច្រើនដែលមានជំងឺកូវីដ១៩ នឹងគ្រាន់តែមានអាការៈសំខាន់ៗប៉ុណ្ណោះ គឺ ក្តៅខ្លួន ឬក្អក។ ប៉ុន្តែវាអាចនឹងធ្វើឲ្យឈឺខ្លួន អស់កម្លាំង ឈឺបំពង់ក និងឈឺក្បាល។ ការក្អក អាចចាប់ផ្តើមមកជាការក្អកស្ងួត តែអ្នកខ្លះនឹងចាប់ផ្តើមមក្អកមានស្លេស្មដែលផ្ទុកទៅដោយកោសិកាសួតដែលងាប់ៗដោយសារតែវីរុស។ អាការៈទាំងនេះអាចព្យាបាលបានជាមួយនឹងការគេងគ្រប់គ្រាន់ ញ៉ាំទឹកច្រើន និងការលេបថ្នាំបំបាត់ការឈឺចាប់។ អ្នកមានអាការៈតិចតួចគួរតែអាចឆាប់ជាសះស្បើយ។ ការក្តៅខ្លួនគួរតែដោះស្រាយបានមិនដល់មួយសប្តាហ៍ទេ ថ្វីបើការក្អកអាចប្រើពេលយូរបន្តិច។ អង្គការសុខភាពពិភពលោកបានវិភាគទៅលើទិន្នន័យរបស់ប្រទេសចិនបាននិយាយថា វាអាចត្រូវការពេលជាមធ្យម ២សប្តាហ៍ទើបជាមកវិញ។
តើមានអ្វីកើតឡើងទៅបើសិនជាខ្ញុំមានអាការៈកាន់តែធ្ងន់ធ្ងរ?
ជំងឺនេះអាចកាន់តែធ្ងន់ធ្ងរលើមនុស្សមួយចំនួន។ រឿងនេះកើតឡើងប្រហែល ៧ ទៅ ១០ថ្ងៃក្នុងពេលឆ្លងជំងឺ។ ការដកដង្ហើមនឹងកាន់តែពិបាក និងសួតរងការរលាក។ នេះដោយសារតែប្រព័ន្ធភាពស៊ាំកំពុងតែព្យាយាមប្រឆាំងវិញ ដោយវាមានប្រតិកម្មខ្លាំងជ្រុល និងរាងកាយមានការខូចខាតច្រើន។ អ្នកខ្លះត្រូវការសម្រាកក្នុងមន្ទីរពេទ្យដោយត្រូវការអុកស៊ីសែនផង។ វាអាចត្រូវការពេល២ ទៅ ៨សប្តាហ៍ទើបជាសះស្បើយ តែភាពអស់កម្លាំងនៅតែបន្តកើតឡើងយូរទៀត។
តើមានអ្វីកើតឡើងទៅបើសិនជាខ្ញុំត្រូវការព្យាបាលក្នុងបន្ទប់សង្គ្រោះកម្រិតធ្ងន់?
អង្គការសុខភាពពិភពលោកបានប៉ាន់ស្មានឃើញថា ក្នុងចំណោមអ្នកជំងឺ ២០នាក់ មានម្នាក់ត្រូវការព្យាបាលក្នុងបន្ទប់សង្គ្រោះកម្រិតធ្ងន់ ដែលអាចត្រូវការចាក់ថ្នាំងងុយគេង និងត្រូវការដាក់ម៉ាស៊ីនជំនួយដល់ការដកដង្ហើម។ ករណីបែបនេះគឺពិតជាត្រូវការពេលវេលាយូរណាស់ទើបជាមកវិញដោយមិនខ្វល់ថាមានជំងឺអ្វីឡើយបើសិនជាស្ថិតក្នុងបន្ទប់សង្គ្រោះកម្រិតធ្ងន់។ អ្នកជំងឺក៏ត្រូវតែបញ្ជូនទៅក្នុងសាលធម្មតាសិនដែរមុនពេលចេញទៅផ្ទះ។ សរុបមក វាអាចត្រូវការពេល ១២ ទៅ ១៨ខែឯណោះទើបអ្នកជំងឺអាចវិលមកធម្មតាវិញក្រោយពីព្យាបាលកម្រិតធ្ងន់រួច។
ការចំណាយពេលវេលាយូរលើការគេងក្នុងមន្ទីរពេទ្យ នឹងនាំឲ្យស្រកសាច់។ អ្នកជំងឺនឹងមានភាពចុះខ្សោយ ហើយសាច់ដុំក៏នឹងត្រូវការពេលវេលាយូរដែរទើបឡើងសាច់មកវិញ។ អ្នកជំងឺខ្លះទាល់តែត្រូវការព្យាបាលដោយចលនាផងទើបអាចដើរវិញបាន។
តើវីរុសកូរ៉ូណាប៉ះពាល់ដល់សុខភាពរយៈពេលយូរដែរទេ?
យើងមិនបានដឹងច្បាស់ថា មានបញ្ហាកើតឡើងរយៈពេលយូរឬអត់ទេ តែយើងអាចពិនិត្យទៅលើស្ថានភាពជំងឺផ្សេងៗបាន។ ចង្កោមរោគសញ្ញាថប់ដង្ហើមស្រួចស្រាវ កើតឡើងលើអ្នកជំងឺដែលមានប្រព័ន្ធភាពស៊ាំដែលធ្វើការខ្លាំងជ្រុល ដែលជាហេតុធ្វើឲ្យខូចខាតដល់សួតបាន។ អ្នកជំងឺក៏ប្រហែលជាត្រូវការការគាំទ្រខាងផ្លូវចិត្តដែរដើម្បីឆាប់ជាវិញ។ ហើយអ្វីដែលជាបញ្ហាសុខភាពរយៈពេលយូរនោះគឺការអស់កម្លាំងតែម្តង។
សម្រាប់អ្នកដែលជាហើយ តើអាចនឹងឆ្លងជំងឺកូវី១៩ ឡើងវិញដែរទេ?
រឿងនេះមានការប៉ាន់ស្មានច្រើនណាស់ ប៉ុន្តែមានអំណះអំណាងគាំទ្រតែបន្តិចបន្តួចប៉ុណ្ណោះចំពោះរយៈពេលដែលរាងកាយមានប្រព័ន្ធភាពស៊ាំការពារខ្លួន។ បើសិនជាអ្នកជំងឺប្រឆាំងនឹងវីរុសឈ្នះយ៉ាងជោគជ័យ ពួកគេត្រូវតែមានការកើនឡើងប្រព័ន្ធភាពស៊ាំដើម្បីឆ្លើយតបពិសេសនឹងវីរុសនេះ។ សេចក្តីរាយការណ៍ជាច្រើនរបស់អ្នកជំងឺដែលកំពុងតែឆ្លងឡើងវិញជាលើកទីពីរនេះប្រហែលជាធ្វើតេស្តមិនបានត្រឹមត្រូវដែលបញ្ជាក់ថាពួកគេលែងមានវីរុសក្នុងខ្លួនទៀត។ (អាន:ថ្នាំងងុយគេង ពេលអ្នកគួរប្រើ)
ដូច្នេះសំណួរទាក់ទងនឹងប្រព័ន្ធភាពស៊ាំនេះគឺជារឿងសំខាន់ណាស់សម្រាប់យល់ដឹងថាតើមនុស្សយើងអាចឆ្លងឡើងវិញឬអត់ និងតើវ៉ាក់សាំងបង្ការជំងឺណេះមានប្រសិទ្ធភាពដូចម្តេច៕