ជាមួយនឹងការកើនឡើងចំនួនអ្នកជំងឺកូវីដ១៩យ៉ាងច្រើនទៅៗពីមួយថ្ងៃទៅមួយថ្ងៃ វាពិតជាមិនមានអ្វីគួរឲ្យភ្ញាក់ផ្អើលឡើយដែលថា មនុស្សជាច្រើនកំពុងតែភ័យខ្លាំងរហូតដល់អាចមានអាការៈរមាស់ក្នុងបំពង់កថែមទៀត។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ស្ថានភាពនេះមានលក្ខណៈគួរឲ្យខ្លាចខ្លាំងចំពោះអ្នកដែលប្រឈមខ្ពស់តែម្តង នោះគឺមនុស្សចាស់អាយុចាប់ពី ៦០ឆ្នាំឡើងទៅ ស្រ្តីមានផ្ទៃពោះ និងអ្នកមានជំងឺរ៉ាំរ៉ៃក្នុងខ្លួន។
ខណៈពេលដែលអ្នកជំងឺកូវីដ១៩មួយចំនួនមិនកើតជាអាការៈអ្វីទាំងអស់នៅពេលឆ្លងជំងឺនេះ តែអ្នកខ្លះទៀតអាចនឹងមានអាការៈតិចតួចដល់មធ្យមដូចជាក្អកស្ងួត ក្តៅខ្លួន និងឈឺរាងកាយ។ អ្នកខ្លះបាត់បង់ការដឹងក្លិនឬរសជាតិ។
ក្តៅខ្លួន
សេចក្តីរាយការណ៍បានឲ្យដឹងថា ៨៧.៩ភាគរយនៃករណីដែលយកពីមន្ទីរពិសោធន៍ចំនួន ៥៥៩២៤ គឺបញ្ជាក់ថាមានការក្តៅខ្លួន។
ក្អកស្ងួត
សេចក្តីរាយការណ៍បានឲ្យដឹងថា ៦៧.៧ភាគរយនៃករណីដែលយកពីមន្ទីរពិសោធន៍ចំនួន ៥៥៩២៤ គឺបញ្ជាក់ថា មានការក្អកស្ងួតបែបនេះ។
អស់កម្លាំង
សេចក្តីរាយការណ៍បានឲ្យដឹងថា ៣៨.១ភាគរយនៃករណីដែលយកពីមន្ទីរពិសោធន៍ចំនួន ៥៥៩២៤ គឺបញ្ជាក់ថា មានការអស់កម្លាំង។
អាការៈផ្សេងៗទៀតគឺ ការក្អកមានកំហាក (៣៣.៤ភាគរយ) ពិបាកដកដង្ហើម (១៨.៦ភាគរយ) ឈឺបំពង់ក (១៣.៩ភាគរយ) និងឈឺក្បាល (១៣.៦ភាគរយ)។
ធ្វើម៉េចទើបខ្ញុំដឹងថា ការក្តៅខ្លួនរបស់ខ្ញុំបង្កឡើងដោយជំងឺផ្តាសាយធម្មតា ឬជំងឺកូវីដ១៩? រឿងដំបូងគេដែលអ្នកត្រូវធ្វើបើសិនជាសង្ស័យថាអ្នកឆ្លងវីរុសកូវីដ១៩ គឺពិគ្រោះជាមួយគ្រូពេទ្យ។ យកល្អគួរតែកុំទៅគ្លីនីក ឬមន្ទីរពេទ្យដោយផ្ទាល់អីបើសិនជាអ្នកមិនមានអាការៈអ្វីធ្ងន់ធ្ងរ ឬមិនស្ថិតក្នុងក្រុមអ្នកប្រឈមមុខខ្ពស់។ អ្នកក៏អាចទំនាក់ទំនងទៅកាន់ ១១៥ ដើម្បីដឹងអំពីព័ត៌មានកាន់តែច្បាស់ផងដែរ។
សីតុណ្ហភាពធម្មតារបស់រាងកាយមនុស្សយើងគឺចាប់ពី ៣៦.១ ទៅ ៣៧.២អង្សារ។ សីតុណ្ហភាពរាងកាយយើងក៏នៅតែឡើងចុះៗដែរទៅតាមពេលវេលា សកម្មភាពដែលយើងធ្វើ និងអ្វីដែលបានញ៉ាំឬផឹកផង។ ករណីភាគច្រើន ការឡើងកម្តៅរាងកាយ (តិចជាង៣៨អង្សារ) មិនត្រូវបានចាត់ទុកថាជារឿងគួរបារម្ភឡើយ ព្រោះវាគ្រាន់តែជាការក្តៅខ្លួនស្ទិញៗ និងច្រើនតែស្រាកស្រាន្តទៅវិញដោយខ្លួនឯងតាមរយៈការសម្រាក និងញ៉ាំទឹកគ្រប់គ្រាន់។ (អាន:ថ្នាំងងុយគេង ពេលអ្នកគួរប្រើ)
ប៉ុន្តែបើសិនជាអ្នកមានអាការៈក្តៅខ្លួន ជាមួយគ្នានឹងការគ្រុន ញាក់ ឬចាប់ផ្តើមក្អក អ្នកប្រហែលជាត្រូវទៅជួបពេទ្យដើម្បីពិនិត្យបន្ថែមហើយ។ គ្រូពេទ្យនឹងប្រាប់ថា តើអ្នកត្រូវការការព្យាបាលភ្លាមៗ ឬត្រូវការការធ្វើតេស្តអ្វីបន្ថែម៕