គួរអាន! មិនចេះក៏គួររៀនញ៊ាំខ្លះ អាហារហឹរល្អណាស់ចំពោះសុខភាព

ការទទួលទានអាហារហឹរអាចបណ្ដាលឱ្យមានអារម្មណ៍ក្ដៅនិងក្រហាយលើអណ្ដាត ប៉ុន្តែអាហារប្រភេទនេះអាចផ្ដល់អត្ថប្រយោជន៍ស្មានមិនដល់ជាច្រើនចំពោះសុខភាព។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ចង់ដឹងឬអត់ថាតើអាហារហឹរល្អយ៉ាងណាខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីឥទ្ធិពលវិជ្ជមាននៃការទទួលទានអាហារហឹរ ៖

១. វាជួយពង្រឹងសុខភាពបេះដូង

នេះក៏ព្រោះតែវត្តមានរបស់ម្ទេសដែលមានក្នុងអាហារហឹរជួយបន្ថយកម្រិតកូឡេស្តេរ៉ូលមិនល្អ ព្រមទាំងប្រឆាំងការរលាកទប់ស្កាត់ហានិភ័យនៃបញ្ហាបេះដូង។

២. វាជួយឱ្យស្រកទម្ងន់

ការទទួលទានអាហារហឹរមានប្រយោជន៍ណាស់សម្រាប់អ្នកដែលចង់ស្រកទម្ងន់។ ភាពហឹរក្ដៅបង្កើនការដុតរំលាយអាហារក្នុងរាងកាយ ព្រមទាំងសមត្ថភាពនៃការដុតបំផ្លាញជាតិខ្លាញ់គួរឱ្យកត់សម្គាល់។ អាហារហឹរក៏ជួយបន្ថយចំណង់អាហារ ឬភាពឃ្លានផងដែរ។

៣. វាជួយបញ្ចុះសម្ពាធឈាម

អត្ថប្រយោជន៍សុខភាពមួយទៀតដែលអ្នកអាចទទួលបានពីការទទួលទានអាហារហឹរ គឺវាជួយបញ្ចុះសម្ពាធឈាម។ អាហារហឹរភាគច្រើនមានផ្ទុកវីតាមីន A និងវីតាមីន C ដែលជួយពង្រឹងជញ្ចាំងនៃបេះដូង ខណៈដែលកម្ដៅពីម្ទេសបង្កើនលំហូរឈាមដូច្នេះសម្ពាធឈាមអ្នកនឹងប្រក្រតី។ ការទទួលទានអាហារហឹរជួយឱ្យបេះដូងដំណើរការត្រឹមត្រូវកាត់បន្ថយហានិភ័យនៃបញ្ហាសម្ពាធឈាមឡើងខ្ពស់។

៤. វាអាចកាត់បន្ថយហានិភ័យនៃជំងឺដាច់សសៃឈាមខួរក្បាល

ដូចបានរៀបរាប់ខាងលើអាហារហឹរជួយបញ្ចុះសម្ពាធឈាមមិនឱ្យឡើងខ្ពស់ខុសប្រក្រតី ហើយអ្នកនឹងអាចចៀសផុតពីហានិភ័យនៃជំងឺដាច់សសៃឈាមខួរក្បាលជាមិនខាន។

៥. វាជួយឱ្យអារម្មណ៍ល្អប្រសើរ

ប្រសិនបើអ្នកឧស្សាហ៍ជួបប្រទះបញ្ហាអារម្មណ៍ឆាប់ប្រែប្រួល ចូរសាកល្បងទទួលទានអាហារហឹរ។ អាហារប្រភេទនេះជួយបង្កើនការបញ្ចេញអ័រម៉ូនអារម្មណ៍ល្អ ដូច្នេះអ្នកនឹងមានអារម្មណ៍ប្រសើរជាងមុន៕