ជាមួយនឹងការកើនឡើង និងរាលដាលយ៉ាងខ្លាំងនៃវីរុសកូរ៉ូណាថ្មី បានធ្វើឲ្យមនុស្សជុំវិញពិភពលោកមានភាពភ័យខ្លាច ស្រ្តេស និងថប់អារម្មណ៍ជាខ្លាំង។ បើសិនជាអ្នកជាមនុស្សម្នាក់ក្នុងនោះដែរ ដែលច្រើនតែមានអារម្មណ៍តក់ស្លុត ឬបាក់ទឹកចិត្តដោយគ្មានហេតុផល អ្នកប្រហែលជាមានការថប់អារម្មណ៍ខុសធម្មតា បាក់ទឹកចិត្ត ឬទាំងពីរតែម្តង។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ការបាក់ទឹកចិត្ត និងថប់អារម្មណ៍គឺជាជំងឺផ្លូវចិត្តដ៏ធ្ងន់ធ្ងរ តែអាចព្យាបាលបាន ហើយការប្រើប្រាស់ថ្នាំក៏មិនខុសគ្នាដែរ។ អាការៈរបស់ជំងឺទាំងពីរនេះមានលក្ខណៈស្រដៀងគ្នាដូចជា ភ័យ ឆេវឆាវ គេងមិនលក់ និងមិនអាចផ្ចង់អារម្មណ៍បាន ប៉ុន្តែវាបង្កឡើងដោយមូលហេតុរៀងៗខ្លួន។ ការថប់អារម្មណ៍ មានលក្ខណៈរបស់វា (បារម្ភ) និងការឆ្លើយតបរបស់រាងកាយ (ស្រ្តេស) ដូច្នេះយើងនឹងមានអាការៈថប់អារម្មណ៍ទាំងផ្លូវចិត្ត និងកាយ។
ជំងឺថប់អារម្មណ៍
ការថប់អារម្មណ៍គឺជាការឆ្លើយតបបែបធម្មជាតិរបស់រាងកាយចំពោះភាពស្រ្តេស។ វាគឺជាអារម្មណ៍ភ័យខ្លាចអំពីអ្វីដែលបានកើតឡើង។ បើសិនជាអ្នកមានជំងឺថប់អារម្មណ៍ អ្នកនឹងមានអារម្មណ៍ភ័យ ខ្លាច ឬថប់ៗក្នុងស្ថានភាពដែលមនុស្សភាគច្រើនមិនមែនមានអារម្មណ៍ដូចអ្នក និងខ្លាចភ្លាមៗដោយមិនមានមូលហេតុច្បាស់លាស់។
បាក់ទឹកចិត្ត
ការបាក់ទឹកចិត្តគឺជាជំងឺផ្លូវចិត្តដែលកើតឡើងជាញឹកញាប់។ វាមានលក្ខណៈខុសគ្នាពីអារម្មណ៍ឡើងចុះៗធម្មតា និងការឆ្លើយតបផ្លូវចិត្តចំពោះភាពលំបាកក្នុងជីវិតប្រចាំថ្ងៃរយៈពេលខ្លី។ នៅពេលបាក់ទឹកចិត្ត វាអាចប៉ះពាល់ទៅលើអ្វីគ្រប់យ៉ាងក្នុងជីវិតដូចជា របៀបនៃការគិត អារម្មណ៍ អាកប្បកិរិយា លែងចាប់អារម្មណ៍អ្វីដែលធ្លាប់ចូលចិត្តរាល់ថ្ងៃ។ អាការៈនៃការបាក់ទឹកចិត្តមានដូចជា មិនចាប់អារម្មណ៍អ្វីទាំងអស់ ពិបាកចិត្ត អស់សង្ឃឹម ខឹង មិនចូលចិត្តអ្វីគ្រប់យ៉ាង អស់កម្លាំង គេងមិនលក់ និងមានអារម្មណ៍ថាខួរក្បាលកំពុងតែរញ៉េរញ៉ៃ និងមិនអាចធ្វើទំនាក់ទំនងជាមួយអ្នកដទៃបាន។ បើសិនជាអ្នកមានអារម្មណ៍បែបនេះយូរជាងពីរសប្តាហ៍ និងរំខានដល់ជីវិតរស់នៅប្រចាំថ្ងៃដូចជា ការចំណាយពេលជាមួយមិត្តភក្តិ ការថែទាំក្រុមគ្រួសារ ឬទៅធ្វើការ មានន័យថាអ្នកកំពុងតែជួបបញ្ហាបាក់ទឹកចិត្តខ្លាំងហើយ។
ស្រ្តេស
ស្រ្តេស និងថប់អារម្មណ៍ប្រហែលជាមានលក្ខណៈស្រដៀងគ្នា តែវាមិនដូចគ្នាឡើយ។ ស្រ្តេសគឺជាការឆ្លើយតបនឹងសម្ពាធប្រចាំថ្ងៃ ឬស្ថានភាពដែលគម្រាមគំហែង ខណៈពេលដែលថប់អារម្មណ៍គឺជាប្រតិកម្មចំពោះស្រ្តេស។ ការថប់អារម្មណ៍ដែលមិនមានមូលហេតុច្បាស់លាស់ ងាយនឹងកើតឡើងយូរជាងធម្មតា និងអាចពិបាកព្យាបាលជាង។ អាការៈរបស់ជំងឺនេះមានដូចជា ឈឺក្បាល លើសសម្ពាធឈាម ឈឺទ្រូង ញ័រដើមទ្រូង កន្ទួលរមាស់លើស្បែក និងគេងមិនលក់។(អាន:ថ្នាំងងុយគេង ពេលអ្នកគួរប្រើ) ស្រ្តេសច្រើនតែបាត់វិញនៅពេលមូលហេតុរបស់វាត្រូវបានបញ្ចប់។ យ៉ាងណាមិញ ស្រ្តេសរ៉ាំរ៉ៃអាចកើតឡើងយ៉ាងលឿនក្នុងស្ថានភាពថប់អារម្មណ៍ ឬបាក់ទឹកចិត្ត ដូច្នេះយកល្អគួរតែបន្ថយស្រ្តេសឲ្យបានច្រើនវិញ៕
