ដឹងទេ? ក្រៅពីកាហ្វេ ភេសជ្ជៈអ្វីខ្លះជួយទប់ទល់ភាពស្ត្រេស?

ក្រៅពីកាហ្វេក៏នៅមានភេសជ្ជៈមួយចំនួនទៀតអាចជួយបន្ថយស្ត្រេសបានផងដែរ។ ( អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើភេសជ្ជៈទាំងនោះមានអ្វីខ្លះទៅ? ខាងក្រោមវេបសាយសុខភាពHealth.com.kh នឹងបង្ហាញឱ្យដឹងពីភេសជ្ជៈដែលមានប្រសិទ្ធភាពបន្ថយស្ត្រេស ៖

១. តែបៃតង

ភេសជ្ជៈនេះមានផ្ទុកកាហ្វេអ៊ីនតិចជាងកាហ្វេ ប៉ុន្តែជាប្រភពដ៏ប្រសើរនៃសារធាតុដែលជួយសម្រួលដល់អារម្មណ៍។ ការទទួលទានតែបៃតងមួយពែងអាចជួយឱ្យអ្នកមានអារម្មណ៍ស្វាងនិងធូរស្រាលបានយ៉ាងឆាប់រហ័ស។

២. ទឹកដោះគោ

ទឹកដោះគោត្រឹមតែ ១កែវមានផ្ទុកបរិមាណខ្ពស់នៃវីតាមីន ជាតិរ៉ែ ប្រូតេអ៊ីន កាល់ស្យូម និងសារធាតុប្រឆាំងអុកស៊ីតកម្ម។ ហើយសារធាតុទាំងអស់នេះមានប្រសិទ្ធិភាពកម្ចាត់រាល់រ៉ាឌីកាល់សេរីដែលបញ្ចេញដោយភាពតានតឹង ឬស្ត្រេស។

៣. តែខ្មៅ

មានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលប្រយុទ្ធប្រឆាំងជំងឺអារម្មណ៍។ វាមានឥទ្ធិពលលើផ្លូវចិត្តនិងរាងកាយដោយការទទួលទានតែខ្មៅជាប្រចាំអាចផ្ដល់នូវសុខភាពល្អនិងកាត់បន្ថយហានិភ័យនៃភាពតានតឹងក្នុងអារម្មណ៍។ ពិសេសនោះតែខ្មៅមានរសជាតិល្វីងនិងពណ៌ដិតខ្លាំងស្រដៀងកាហ្វេដែរ។

៤. តែជីអង្កាម

ក្នុងករណីអ្នកមិនអាចទទួលទានភេសជ្ជៈមានផ្ទុកជាតិកាហ្វេអ៊ីនបាននោះជំនួសឱ្យកាហ្វេដើម្បីបន្ថយស្ត្រស អ្នកគួរសាកល្បងតែជីអង្កាម។ ជីអង្កាមជួយផ្ដល់ភាពធូរស្រាលដល់សាច់ដុំបន្ថយកម្រិតនៃភាពស្ត្រេស។

៥. តែផ្កា Chamomile

ក្រៅពីជួយបំបាត់បញ្ហាព័ន្ធព័ន្ធនឹងប្រព័ន្ធរំលាយអាហារហើយនោះ តែរុក្ខជាតិនេះក៏មានប្រសិទ្ធភាពទប់ទល់ស្ត្រេសគួរឱ្យកត់សម្គាល់ផងដែរ។ អ្នកអាចទទួលទានតែផ្កា Chamomile នៅមុនពេលចូលគេងដើម្បីឆាប់គេងលក់បានស្កប់។

៦. ទឹកក្រូចឆ្មារ

ជាតិកាហ្វេអ៊ីនក្នុងកាហ្វេពេលខ្លះអាចនឹងបណ្ដាលឱ្យអ្នកមានអារម្មណ៍កាន់តែស្ត្រេសថែម! ដូច្នេះដើម្បីជាការប្រសើរអ្នកអាចទទួលទានទឹកក្រូចឆ្មារក្ដៅឧណ្ហៗជំនួសវិញ។ អ្វីដែលអ្នកត្រូវធ្វើ គឺគ្រាន់តែបន្ថែមទឹកក្រូចឆ្មារម្ខាងក្នុងទឹកក្ដៅឧណ្ហៗ ១ ពែង រួចកូរឱ្យសព្វ សឹមទទួលទាន។ អ្នកក៏អាចបន្ថែមទឹកឃ្មុំបន្តិចចូលដើម្បីបង្កើនរសជាតិផងដែរ។