Join with Health.com.kh on Telegram

ជំងឺទឹកនោមផ្អែមប្រភេទទី២គឺជាជំងឺរ៉ាំរ៉ៃមួយប្រភែទដែលកើតឡើងលើមនុស្សទូទាំងពិភពលោក។ ករណីដែលជំងឺនេះមិនបានគ្រប់គ្រងល្អ វាអាចបណ្តាលឲ្យខ្វាក់ភ្នែក ខ្សោយតម្រងនោម ជំងឺបេះដូង និងជំងឺធ្ងន់ធ្ងរផ្សេងៗទៀត។ មុនជំងឺទឹកនោមផ្អែមត្រូវបានកំណត់ដឹង វាមានពេលវេលាមួយដែលជាតិស្ករក្នុងឈាមឡើងខ្ពស់ ប៉ុន្តែមិនមែនខ្ពស់គ្រប់គ្រាន់ក្នុងការកំណត់ថាមានជំងឺនេះឡើយ តែគេហៅថាត្រៀមជំងឺទឹកនោមផ្អែម។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) សំណាងដែរ ការវិវត្តន៍មកជាការត្រៀមជំងឺទឹកនោមផ្អែមមិនមែនមានន័យថាអ្នកនឹងត្រូវកើតជំងឺទឹកនោមផ្អែម ១០០ភាគរយឡើយ។ ថ្វីបើមានកត្តាជាច្រើនដែលអ្នកមិនអាចផ្លាស់ប្តូរបានដូចជា ហ្សែន អាយុ ឬការរស់នៅពីមុនៗ តែមានរឿងច្រើនណាស់ដែលអ្នកអាចធ្វើបានដើម្បីបន្ថយការប្រឈមមុខនឹងជំងឺនេះបានដូចជា៖

  • កាត់បន្ថយការញ៉ាំផ្អែម និងកាបូអ៊ីដ្រាតពីរបបអាហារ៖ ការសិក្សាជាច្រើនបានបង្ហាញថាទំនាក់ទំនងមួយរវាង ការញ៉ាំផ្អែម ឬកាបូអ៊ីដ្រាត  និងការប្រឈមនឹងជំងឺទឹកនោមផ្អែម។ ក្រៅពីនេះ ការជំនួវិញជាមួយអាហារដែលមិនសូវមានឥទ្ធិពលលើជាតិស្ករក្នុងឈាមប្រហែលជាអាចជួយបន្ថយការប្រឈមមុខបាន។ 
  • ហាត់ប្រាណជាទៀងទាត់៖ សកម្មភាពរាងកាយប្រចាំថ្ងៃប្រហែលជាជួយបង្ការជំងឺទឹកនោមផ្អែមបាន តាមរយៈបង្កើនភាពស៊ាំនឹងអាំងស៊ុយលីនចំពោះកោសិកា។ ដូច្នេះនៅពេលអ្នកហាត់ប្រាណអាំងស៊ុយលីននឹងមិនសូវត្រូវការច្រើនដើម្បីគ្រប់គ្រងជាតិស្ករក្នុងឈាមឡើយ។ ការហាត់ប្រាណគួរតែជា លំហាត់ប្រាណអ៊ែរ៉ូបិក ហាត់ប្រាណបែបខ្លាំងក្លា និងពង្រឹងដល់ភាពរឹងមាំរបស់រាងកាយ។ 
  • ជ្រើសរើសការញ៉ាំទឹកដំបូងគេបំផុត៖ ទឹកគឺជាភេសជ្ជៈធម្មជាតិសុទ្ធសាទដែលរាងកាយត្រូវការជាចាំបាច់។ ការដែលមានទម្លាប់ញ៉ាំតែទឹកនឹងធ្វើឲ្យអ្នកចៀសផុតពីការញ៉ាំភេសជ្ជៈមានជាតិផ្អែមច្រើន ហើយក៏បន្ថយការប្រឈមនឹងការកើតជំងឺទឹកនោមផ្អែមបានដែរ។ 
  • សម្រកទម្ងន់បើសិនជាអ្នកកំពុងតែធាត់ជ្រុល៖ ថ្វីបើមនុស្សធាត់ទាំងអស់មិនសុទ្ធតែនឹងកើតទឹកនោមផ្អែមក៏ដោយ តែភាគច្រើននៃអ្នកជំងឺទឹកនោមផ្អែមគឺជាមនុស្សធាត់ ជាពិសេសអ្នកធាត់ដុះក្បាលពោះតែម្តង។ ភាពធាត់នេះនឹងជំរុញដល់ការរលាក និង Insuline Resistance ដែលបង្កើនការប្រឈមកាន់តែខ្លាំងនឹងជំងឺទឹកនោមផ្អែម។ 
  • ឈប់ជក់បារី៖ ការជក់បារីត្រូវបានគេបង្ហាញថា ជាមូលហេតុនាំឲ្យកើតជំងឺធ្ងន់ធ្ងរជាច្រើនដូចជា ជំងឺបេះដូង ជំងឺសួត មហារីកសួត សុដន់ ក្រពេញប្រូស្តាត និងផ្លូវរំលាយអាហារ។ ការជក់បារីក៏ត្រូវបានអ្នកស្រាវជ្រាវរកឃើញថាប្រឈមនឹងជំងឺទឹកនោមផ្អែមប្រភេទទី២ដែរ រួមទាំងអ្នកស្រួបផ្សែងបារីពីគេតែម្តង។ 
  • ចៀសវាងការរស់នៅបែបស៊ីដេក៖ វាគឺជារឿងសំខាន់ដែលត្រូវចៀសវាងការរស់នៅបែបស៊ីដេកៗបើសិនជាអ្នកចង់បង្ការជំងឺទឹកនោមផ្អែមប្រភេទទី២។ បើសិនជាអ្នកមានសកម្មភាពរាងកាយតិចតួចបំផុត ឬគ្មាន ហើយអង្គុយច្រើនជាងដើរជារៀងរាល់ថ្ងៃនោះ អ្នកពិតជាប្រឈមនឹងជំងឺទឹកនោមផ្អែមប្រភេទទី២មិនខាន។
  • ចូរញ៉ាំអាហារសម្បូរជាតិសរសៃ៖ ការទទួលបានជាតិសរសៃច្រើនគឺជាប្រយោជន៍ធំមួយសម្រាប់សុខភាពពោះវៀន និងគ្រប់គ្រងទម្ងន់។ ការសិក្សាលើមនុស្សធាត់ជ្រុល មនុស្សចាស់ និងអ្នកត្រៀមជំងឺទឹកនោមផ្អែមបានបង្ហាញថា ជាតិសរសៃអាចជួយថែរក្សាជាតិស្ករក្នុងឈាមឲ្យនៅទាបបាន។ 
  • បង្កើនការទទួលបានវីតាមីន D៖ វីតាមីន D ក៏សំខាន់សម្រាប់គ្រប់គ្រងជាតិស្ករក្នុងឈាមដែរ។ តាមពិតទៅ ការសិក្សាបានរកឃើញថា អ្នកដែលមិនទទួលបានវីតាមីន D គ្រប់គ្រាន់ ឬក្នុងឈាមមានវីតាមីន D ទាប មានការប្រឈមកាន់តែខ្លាំងនឹងជំងឺតឹកនោមផ្អែមគ្រប់ប្រភេទ។ 
  • ញ៉ាំកាហ្វេ ឬតែ៖ ថ្វីបើទឹកគួរតែជាភេសជ្ជៈដំបូងគេដែលអ្នកគួរតែញ៉ាំឲ្យបានច្រើន តែការស្រាវជ្រាវបានណែនាំថា ការបញ្ចូលកាហ្វេ ឬតែក្នុងរបបអាហារទៀតប្រហែលជាអាចជួយអ្នកចៀសផុតពីជំងឺទឹកនោមផ្អែមបាន។(អាន:ថ្នាំងងុយគេង ពេលអ្នកគួរប្រើ) ការសិក្សាបានឲ្យដឹងថា ការញ៉ាំកាហ្វេជាប្រចាំថ្ងៃ អាចបន្ថយការកើតជំងឺទឹកនោមផ្អែមប្រភេទទី២បានពី ៨ ទៅ៥៤ភាគរយ៕