ផ្សិតជាបន្លែមួយប្រភេទដែលមានរសជាតិឆ្ងាញ់និងត្រូវបានគេយកមកចម្អិនទទួលទានយូរណាស់មកហើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះបីជាភាគច្រើននៃពួកយើងស្គាល់និងឧស្សាហ៍ញ៊ាំបន្លែនេះ ប៉ុន្តែប្រហែលជាមិនធ្លាប់ចាប់អារម្មណ៍ពីអត្ថប្រយោជន៍ដ៏ប្រសើររបស់វាចំពោះសុខភាពឡើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលគួររួមបញ្ចូលផ្សិតក្នុងរបបអាហារប្រចាំថ្ងៃ ៖

១. មានផ្ទុកសម្បូរទៅដោយសារធាតុប្រឆាំងអុកស៊ីតកម្ម

ផ្សិតក៏ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដូចបន្លែដទៃទៀតដែរ។ សារធាតុប្រឆាំងអុកស៊ីតកម្មជួយទប់ស្កាត់រ៉ាឌីកាល់សេរីមិនឱ្យបង្កការបំផ្លាញកោសិកាសុខភាពល្អកាត់បន្ថយហានិភ័យនៃជំងឺមហារីក ជំងឺបេះដូង និងបញ្ហាសុខភាពធ្ងន់ធ្ងរផ្សេងៗ។

២. ទប់ស្កាត់ជំងឺខ្វះគ្រាប់ឈាមក្រហម

នេះក៏ព្រោះតែផ្សិតជាប្រភពដ៏ប្រសើរនៃជាតិដែកដែលចាំបាច់ក្នុងដំណើរការបង្កើតកោសិកាគ្រាប់ឈាមក្រហម។

៣. សុខភាពឆ្អឹង

ផ្សិតមានផ្ទុកសម្បូរទៅដោយជាតិកាល់ស្យូមដែលជាសារធាតុចិញ្ចឹមចាំបាច់សម្រាប់ពង្រឹងនិងរក្សាសុខភាពឆ្អឹង។ របបអាហារមានជាតិកាល់ស្យូមគ្រប់គ្រាន់ជាប្រចាំជួយទប់ស្កាត់ហានិភ័យនៃជំងឺពុកឆ្អឹងបានយ៉ាងប្រសើរ។ វាក៏ជួយកាត់បន្ថយអាការៈឈឺចាប់សន្លាក់ រួមទាំងបញ្ហាដែលពាក់ព័ន្ធនឹងការចុះខ្សោយនៃសុខភាពឆ្អឹង។

៤. កាត់បន្ថយហានិភ័យនៃជំងឺមហារីកសុដន់និងក្រពេញប្រូតេអ៊ីន

នេះក៏ព្រោះតែផ្សិតមានផ្ទុកសារធាតុ Beta-Glucans និង Linoleic Acid ដែលអាចទប់ស្កាត់ឥទ្ធិពលគ្រោះថ្នាក់នៃការលើសអ័រម៉ូន estrogen ព្រមទាំងរារាំងការលូតលាស់នៃកោសិកាមហារីក។

៥. កាត់បន្ថយកូឡេស្តេរ៉ូលមិនល្អ

ផ្សិតជួយផ្ដល់ឱ្យរាងកាយនូវប្រូតេអ៊ីនគ្មានខ្លាញ់ដោយវាគ្មានផ្ទុកជាតិខ្លាញ់ ឬកូឡេស្តេរ៉ូលនិងកាបូអ៊ីដ្រាតទាបបំផុត។ ម្យ៉ាងវិញទៀតផ្សិតមានផ្ទុកសម្បូរទៅដោយជាតិសសៃនិងអង់ស៊ីមដែលជួយបញ្ចុះកម្រិតកូឡេស្តេរ៉ូលមិនល្អទប់ស្កាត់ហានិភ័យនៃជំងឺសសៃឈាមបេះដូង ដាច់សសៃឈាមខួរក្បាល គាំងបេះដូង។

៦. គ្រប់គ្រងជាតិស្ករក្នុងឈាម

ផ្សិតមានផ្ទុកអង់ស៊ីមធម្មជាតោដែលជួយរាងកាយបំបែកជាតិម្សៅនិងស្ករក្នុងអាហារផ្សេងៗដែលអ្នកទទួលទាន។

៧.​ ពង្រឹងប្រព័ន្ធភាពស៊ាំរាងកាយ

នេះក៏ព្រោះតែផ្សិតភាគច្រើនមានលក្ខណៈសម្បត្តិប្រឆាំងមេរោគនិងការរលាក ព្រមទាំងជាប្រភពដ៏ប្រសើរនៃអាស៊ីតអាមីណូដែលជួយពង្រឹង ក៏ដូចជារក្សាសុខភាពប្រព័ន្ធភាពស៊ាំរាងកាយ៕