ក្រៅពីទទួលទានទឹកយ៉ាងហោចណាស់ ២ លីត្រក្នុងមួយថ្ងៃហើយនោះ ការជ្រើសរើសអាហារបានត្រឹមត្រូវក៏ចាំបាច់ណាស់ដែរដើម្បីដោះស្រាយបញ្ហាស្បែកស្ងួត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារអ្វីខ្លះទៅដែលអ្នកគួរទទួលទានជាប្រចាំដើម្បីរក្សាសំណើមនៃស្បែក? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអាចជួយដោះស្រាយទប់ស្កាត់បញ្ហាស្បែកស្ងួត ៖
១. ត្រីសម្បូរខ្លាញ់
អ្វីដែលធ្វើឱ្យត្រីសម្បូរខ្លាញ់ល្អបំផុតសម្រាប់រក្សាសំណើមស្បែកនោះ គឺអាស៊ីតខ្លាញ់អូមេហ្កា ៣។ ក្រៅពីល្អសម្រាប់សុខភាពស្បែកការរួមបញ្ចូលត្រីសម្បូរខ្លាញ់ក្នុងរបបអាហារក៏ផ្ដល់អត្ថប្រយោជន៍ប្រសើរជាច្រើនចំពោះសុខភាពរាងកាយទាំងមូលផងដែរ។
២. គ្រាប់ពូជនិងគ្រាប់ធញ្ញជាតិ
សុទ្ធតែជាប្រភពដ៏ប្រសើរនៃអាស៊ីតខ្លាញ់អូមេហ្កា ៣ ដែលប្រសើរសម្រាប់សុខភាពស្បែកជួយទប់ស្កាត់បញ្ហានៃភាពស្ងួត។ ដូច្នេះដើម្បីរក្សាជាតិសំណើមនៃស្បែកអ្វីដែលអ្នកត្រូវធ្វើ គឺគ្រាន់តែទទួលទានគ្រាប់ធញ្ញជាតិ ឬគ្រាប់ពូជមួយក្ដាប់ដៃពេញក្នុងមួយថ្ងៃ។
៣. ផ្លែបឺរ
អ្នកក៏អាចទទួលបានបរិមាណខ្ពស់នៃអាស៊ីតខ្លាញ់អូមេហ្កា ៣ ពីផ្លែបឺរផងដែរ។ ម្យ៉ាងវិញទៀតផ្លែឈើនេះក៏ជាប្រភពដ៏ល្អបំផុតមួយនៃវីតាមីន E ដែលចាំបាច់សម្រាប់សុខភាពស្បែក។
៤. ប្រេងអូលីវ
មានផ្ទុកសម្បូរទៅដោយវីតាមីន E ដែលជួយរក្សាសំណើមនៃស្បែកទប់ស្កាត់បញ្ហាស្បែកស្ងួតបានយ៉ាងប្រសើរ។
៥. ត្រសក់
ជាប្រភពដ៏ប្រសើរនៃជាតិទឹកនិងវីតាមីន C ដែលចាំបាច់សម្រាប់ការផលិតកូឡាជែនជួយរក្សាសុខភាពស្បែកនិងផ្ដល់សំណើម។ ដូច្នេះអ្នកដែលមានបញ្ហាស្បែកស្ងួត ចូរព្យាយាមទទួលទានត្រសក់ជាប្រចាំ។
៦. អយស្ទ័រ
មានផ្ទុកសម្បូរទៅដោយជាតិស័ង្កសីដែលជួយជួសជុលស្បែកឡើងវិញដោយបង្កើតកូឡាជែន។
៧. ដំឡូងផ្អែម
ជាប្រភពនៃសារធាតុ beta-carotene ដែលរាងកាយបំលែងទៅជាវីតាមីន A ជួយរក្សាសំណើមស្បែកទប់ស្កាត់ភាពស្ងួតរបក។
៨. ម្ទេសផ្លោក
ម្ទេសផ្លោកមានផ្ទុកសម្បូរទៅដោយសារធាតុ beta-carotene និងវីតាមីន C ដែលសុទ្ធតែចាំបាច់សម្រាប់សុខភាពស្បែកល្អប្រសើរ៕