តារាសម្ដែង Han Go Eun ត្រូវបានមហាជនច្រឡំថាជាតារាដែលមានវ័យខ្ទង់ ២០ ឆ្នាំ ដោយសារសម្រស់ស្រស់ស្អាត មិនចេះចាស់របស់នាង។
ទោះជាយ៉ាងណា តារាស្រីរូបនេះ មានវ័យ ៤៣ ឆ្នាំហើយ ដែលជាហេតុធ្វើឲ្យគ្រប់គ្នាមានការភ្ញាក់ផ្អើលជាមួយនឹងភាពមិនចេះចាស់របស់នាង។ កាលពីមុន Han Go Eun គឺជាតារាម៉ូដែលមួយរូប និងក្លាយជាតារាក្របមុខទស្សនាវដ្ដីជាច្រើន ហើយថែមទាំងមានវត្តមានក្នុងវីដេអូបទចម្រៀងជាច្រើនផងដែរ ក្នុងឆ្នាំ១៩៩០។
ក្នុងឆ្នាំ១៩៩៦ តារាស្រីរូបនេះក៏បានផ្លាស់ប្ដូរអាជីពទៅជាតារាសម្ដែង ដោយរឿងដំបូងដែលនាងសម្ដែងមានចំណងជើងថា “LA Arirang”។ ក្រោយមកក្នុងឆ្នាំ ១៩៩៨ នាងក៏ចាប់យកតែអាជីពតារាសម្ដែងនេះតែម្ដង។
ក្នុងឆ្នាំ ២០០១ នាងមានទំនាក់ទំនងស្នេហាជាមួយតារាចម្រៀង Joon Park (សមាជិកក្រុម G.O.D) ប៉ុន្តែចំណងស្នេហ៍របស់ពួកគេត្រូវបានបញ្ចប់ក្នុងឆ្នាំ ២០០៣។ ក្រោយរក្សាភាពនៅលីវអស់ជាច្រើនឆ្នាំមកនោះ តារាសម្ដែងស្រស់ស្អាតរូបនេះ បានធ្វើឲ្យអ្នកគាំទ្រមានការភ្ញាក់ផ្អើលដោយ នាងបានប្រកាសពីអាពាហ៍ពិពាហ៍របស់នាងក្នុងខែសីហា ឆ្នាំ២០១៥ ជាមួយអ្នកធ្វើការជាមួយគ្នា ដែលមានវ័យក្មេងជាងនាងរហូតដល់ ៤ឆ្នាំ។
Han Go Eun បានចែករំលែកពីវិធីថែរក្សាសម្រស់ឲ្យមានភាពស្រស់ស្អាត និងក្មេងជាងវ័យ។ នាងបាននិយាយក្នុងកិច្ចសម្ភាសមួយថា នាងតែងតែទៅពិនិត្យសុខភាពជាប្រចាំ ញ៉ាំបន្លែឲ្យបានច្រើន និងគេងឲ្យបានគ្រប់គ្រាន់៕
ប្រភព៖ sabay.com.kh