ត្រឹមតែការដុសសម្អាតធ្មេញ ២ ដងក្នុងមួយថ្ងៃនិងទៅជួបពេទ្យធ្មេញ ២ ដងក្នុងមួយឆ្នាំ គឺមិនគ្រប់គ្រាន់ឡើយដើម្បីរក្សាបាននូវសុខភាពមាត់ធ្មេញល្អប្រសើរស្នាមញញឹកស្រស់ស្អាត។ ( អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នេះក៏ព្រោះតែការទទួលទានអាហារគ្រប់ប្រភេទតាមចិត្តអាចជះឥទ្ធិពលគួរឱ្យព្រួយបារម្ភលើសុខភាពមាត់ធ្មេញ! ថាតើអាហារអ្វីខ្លះអាចបំផ្លាញស្នាមញញឹមរបស់អ្នក? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរចៀសវាង ឬកុំទទួលទានច្រើនពេកដើម្បីគេចផុតពីហានិភ័យនៃបញ្ហាសុខភាពមាត់ធ្មេញ ៖
១. ស្ករគ្រាប់រឹង
មូលហេតុនោះ គឺស្ករគ្រាប់ភាគច្រើនមានរសជាតិផ្អែមណាស់ដោយមានផ្ទុកជាតិស្ករខ្ពស់ដែលបង្កើនការលូតលាស់នៃបាក់តេរីនិងកំណកកំបោរបង្កជាបញ្ហាមាត់ធ្មេញគួរឱ្យបារម្ភពិសេសប្រសិនបើអ្នកមានអនាម័យមាត់ធ្មេញមិនល្អ ហើយមិនព្រមទៅជួបពេទ្យធ្មេញទៀងទាត់។ លើសពីនេះទៅទៀតធ្មេញក៏ងាយនឹងមានបញ្ហាប្រេះ ឬបែកនៅពេលខាំអ្វីដែលរឹង។
២. ដុំទឹកក
ការទំពារទឹកកកក៏មិនល្អសម្រាប់សុខភាពមាត់ធ្មេញផងដែរ! នេះក៏ព្រោះតែដុំទឹកកកមានសភាពរឹងដែលមិនល្អសម្រាប់ធ្មេញឡើយ។ អ្នកអាចជំនួសការទំពារស្ករកៅស៊ូគ្មានជាតិស្ករជំនួសដុំទឹកកទើបប្រសើរ។
៣. ផ្លែឈើមានរសជាតិជូរ
ទោះបីជាផ្លែឈើប្រភេទនេះមានផ្ទុកសម្បូរទៅដោយវីតាមីន C ដែលជួយពង្រឹងប្រព័ន្ធភាពស៊ាំរាងកាយនិងល្អសម្រាប់សុខភាពអញ្ចាញក៏ពិតមែន ប៉ុន្តែការទទួលទានច្រើនពេកអាចបណ្ដាលឱ្យស្នាមញញឹមរបស់អ្នកត្រូវបានបំផ្លាញ។ ក្រៅពីជះឥទ្ធិពលលើកាចាធ្មេញហើយនោះជាតិអាស៊ីតដែលផ្លែឈើរសជាតិជូរមានផ្ទុកអាចបង្កើតជាបរិយាកាសល្អមួយសម្រាប់ពពួកបាក់តេរីលូតលាស់។ នេះមិនមែនមានន័យថាអ្នកត្រូវឈប់ញ៊ាំផ្លែឈើរសជាតិជូរដទៃទៀតតែម្ដងឡើយ។ អ្វីដែលអ្នកត្រូវធ្វើ គឺគ្រាន់តែទទួលទានក្នុងកម្រិតមធ្យម ហើយខ្ពុរសម្អាតមាត់ជាមួយទឹកក្រោយពេលទទួលទានដើម្បីកម្ចាត់ជាតិអាស៊ីត។
៤. ផ្លែឈើក្រៀម
ផ្លែឈើប្រភេទនេះអាចជាប់ស្អិតនឹងផ្ទៃធ្មេញរយៈពេលយូរ។ ហើយការដែលអ្នកធ្វេសប្រហែសមិនបានដុសសម្អាតធ្មេញក្រោយទទួលទានរួចនោះហានិភ័យនៃបញ្ហាដង្កូវស៊ីធ្មេញ គឺងាយនឹងកើតឡើងណាស់។ ដូច្នេះដើម្បីជាការប្រសើរក្រៅពីកម្រិតការទទួលទានហើយនោះ អ្នកក៏គួរកុំភ្លេចដុសសម្អាតធ្មេញចេញផងដែរ។
៥. អាហារមានផ្ទុកជាតិស្ករខ្ពស់
ជាតិស្ករអាចបង្កើនការលូតលាស់នៃបាក់តេរីនិងកំណកកំបោរដែលបណ្ដាលឱ្យកើតជំងឺអញ្ចាញធ្មេញនិងបញ្ហាដង្កូវស៊ីធ្មេញ! ហានិភ័យនៃបញ្ហាសុខភាពមាត់ធ្មេញនឹងកាន់តែកើនឡើងខ្ពស់ថែមទៀតប្រសិនបើអ្នកមានអនាម័យមាត់ធ្មេញមិនល្អ ហើយមិនព្រមទៅជួបពេទ្យធ្មេញទៀងទាត់៕