ធ្លាប់ទទួលទាន “កាហ្វេទឹកសណ្ដែក” អត់? ល្អណាស់ចំពោះសុខភាព

ភាគច្រើននៃពួកយើងប្រហែលជាធ្លាប់ទទួលទានកាហ្វេដាក់ទឹកដោះគោ ប៉ុន្តែបែបមិនដែលសាកកាហ្វេលាយទឹកសណ្ដែកឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើកាហ្វេទឹកសណ្ដែកល្អយ៉ាងណាខ្លះចំពោះសុខភាព? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរទទួលទានកាហ្វេលាយទឹកសណ្ដែកជំនួសទឹកដោះគោ ៖

១. វាជួយសម្រួលនិងជម្រុញដំណើរការនៃការរំលាយអាហារ

នេះក៏ព្រោះតែជាតិសសៃក្នុងទឹកសណ្ដែកដែលអ្នកបានបន្ថែមក្នុងកាហ្វេ។ ជាតិសសៃចាំបាច់ណាស់សម្រាប់ការរំលាយអាហារជួយទប់ស្កាត់កាត់បន្ថយហានិភ័យនៃបញ្ហាពិបាករំលាយអាហារនិងទល់លាមក។

២. វាជួយគ្រប់គ្រងកម្រិតនៃជាតិស្ករក្នុងឈាម

ជាតិសសៃក្នុងមួយពែងនៃកាហ្វេទឹកសណ្ដែកក៏ជួយគ្រប់គ្រងបរិមាណជាតិស្ករដែលបញ្ចេញទៅក្នុងឈាមដែលមានន័យថាការទទួលទានកាហ្វេលាយទឹកសណ្ដែកអាចជួយទប់ស្កាត់បញ្ហាជាតិស្ករក្នុងឈាមឡើងខ្ពស់បាន។ ទោះជាយ៉ាងណាត្រូវប្រាកដថាអ្នកមិនប​ន្ថែមស្ករច្រើនក្នុងកាហ្វេ។

៣. វាជួយបញ្ចុះកូឡេស្តេរ៉ូលមិនល្អ

ខុសពីផលិតផលទឹកដោះគោស្រស់មួយចំនួនដែលមានផ្ទុកជាតិខ្លាញ់និងកូឡេស្តេរ៉ូលខ្ពស់ ទឹកសណ្ដែកគ្មានផ្ទុកជាតិខ្លាញ់ឆ្អែតនិងកូឡេស្តេរ៉លឡើយ។ អ្វីដែលគួរឱ្យកត់សម្គាល់នោះ គឺទឹកសណ្ដែកមានផ្ទុកជាតិសសៃ ព្រមទាំងអាស៊ីតខ្លាញ់ល្អ monounsaturated និង polyunsaturated ដែលជួយបង្អាក់ការដឹកជញ្ជូនកូឡេស្តេរ៉ូលទៅក្នុងឈាម។ ដូច្នេះការទទួលទានកាហ្វេលាយទឹកសណ្ដែកអាចជួយកាត់បន្ថយហានិភ័យនៃជំងឺបេះដូងបានយ៉ាងប្រសើរ។

៤. ទប់ស្កាត់បញ្ហាសម្ពាធឈាមឡើងខ្ពស់

ក្រៅពីកាត់បន្ថយកូឡេស្តេរ៉ូលមិនល្អហើយនោះ កាហ្វេទឹកសណ្ដែក៏ជួយបញ្ចុះសម្ពាធឈាមដែលឡើងខ្ពស់ផងដែរ។ នេះក៏ព្រោះតែទឹកសណ្ដែកដែលលាយក្នុងកាហ្វេមានផ្ទុកជាតិប៉ូតាស្យូមដែលជួយទបស្កាត់ជំងឺលើសឈាម ឬបញ្ហាសម្ពាធឈាមឡើងខ្ពស់។

៥. វាជួយបង្កើនម៉ាសសាច់ដុំ

នេះក៏ព្រោះតែកាហ្វេទឹកសណ្ដែកមានផ្ទុកប្រូតេអ៊ីនដែលចាំបាច់សម្រាប់សុខភាពសាច់ដុំ។ ទោះបីទឹកដោះគោដែលត្រូវបានគេបន្ថែមជាទូទៅក្នុងកាហ្វេក៏មានផ្ទុកប្រូតេអ៊ីន ប៉ុន្តែមិនមែនគ្រប់គ្នាសុទ្ធតែទទួលទានដោយគ្មានបញ្ហាឡើយដោយអ្នកខ្លះចាញ់ឡាក់តូសមិនអាចទទួលទានទឹកដោះគោបាន។ ដូច្នេះអ្នកអាចលាយទឹកសណ្ដែកក្នុងកាហ្វេជំនួសវិញ។

៦. ជួយឱ្យស្រកទម្ងន់

មិនដូចទឹកដោះគោឡើយ ទឹកសណ្ដែកធម្មជាតិដែលអ្នកបន្ថែមជំនួសក្នុងកាហ្វេមានផ្ទុកជាតិខ្លាញ់និងជាតិស្ករទាប។ មួយពែងនៃទឹកសណ្ដែកសុទ្ធមានផ្ទុកត្រឹមតែ ៨០ កាឡូរីប៉ុណ្ណោះ។ ទោះជាយ៉ាងណាទឹកសណ្ដែកមានផ្ទុកសម្បូរទៅដោយជាតិសសៃដែលជួយឱ្យឆាប់ឆ្អែតនិងឆ្អែតបានយូរ។ លើសពីនេះទៅទៀតអាស៊ីតខ្លាញ់ monounsaturated ក្នុងទឹកសណ្ដែកជួយរារាំងការស្រូបយកជាតិខ្លាញ់នៃពោះវៀនដែលផ្ដល់អត្ថប្រយោជន៍ជួយឱ្យស្រកទម្ងន់៕