ការឈឺអញ្ចាញធ្មេញគឺជាបញ្ហាដ៏គួរឲ្យរំខានមួយហើយក៏កើតឡើងដោយសារតែហេតុផលច្រើនដែរ។ វាអាចបង្កឡើងដោយរឿងធម្មតាៗដូចជា ការដុសធ្មេញខ្លាំងពេក មានពងបែកក្នុងមាត់ ឬពាក់ធ្មេញ ឬប្រើដែករឹតធ្មេញ។ សម្រាប់ស្រ្តីវិញ វាអាចបណ្តាលមកពីការប្រែប្រួលអ័រម៉ូន ការមានផ្ទៃពោះ ឬរ៉ាំងរដូវ ហើយក៏កើតឡើងជុំវិញពេលមករដូវផងដែរ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)រយៈពេលយូរៗទៅ ការឈឺអញ្ចាញធ្មេញប្រហែលជាអាការៈមួយនៃបញ្ហាមាត់ធ្មេញធ្ងន់ធ្ងរជានេះទៀតក៏មានដែរ។ បើសិនជាអាការៈដែលអ្នកមាន គ្រាន់តែជាការឈឺចាប់នៅអញ្ចាញធ្មេញទេ អ្នកអាចសាកល្បងវិធីព្យាបាលទាំងអស់នេះបាន៖
ខ្ពុរទឹកអំបិល
ចូរលាយទឹកក្តៅឧណ្ហៗមួយកូនពែងជាមួយនឹងអំបិលមួយស្លាបព្រាកាហ្វេ ហើយកូរវាឲ្យសព្វ។ ចូរយកវាខ្ពុរក្នុងមាត់ពីរទៅបីនាទីចាំខ្ជាក់មកវិញ។ ទឹកអំបិលនេះនឹងជួយបង្ការការលូតលាស់បាក់តេរីក្នុងមាត់ និងកាត់បន្ថយបាក់តេរីលើអញ្ចាញធ្មេញ ដែលធ្វើឲ្យហើម។ ចូរធ្វើបែបនេះមួយថ្ងៃពីរដង។
ស្អំទឹកក្តៅ ឬទឹកត្រជាក់
យកល្អគួរតែស្អំទឹកក្តៅបើសិនជាអ្នកមិនចូលចិត្តទឹកត្រជាក់។ ចូរយកទឹកក្តៅនោះទឺស្អំនៅផ្នែកថ្ពាល់ដែលជាការឈឺអញ្ចាញធ្មេញនោះ តែមិនត្រូវប៉ះនឹងសាច់ផ្ទាល់ឡើយ។ ចំពោះទឹកត្រជាក់វិញ អ្នកអាចប្រើក្រណាត់រុំពីលើហើយស្អំបានដូចគ្នា។ វិធីសាស្រ្តទាំងពីរនេះនឹងជួយបន្ថយការឈឺចាប់បន្តិចម្តងៗ។
ថង់តែ
ចូរយកថង់តែធ្មីមួយ ហើយដាក់វាក្នុងទឹកក្តៅដាំពុះប្រមាណ ៥នាទីដូចពេលអ្នកឆុងតែញ៉ាំដែរ។ នៅពេលថង់តែនេះត្រជាក់ល្មមហើយ ចូរយកវាទៅស្អំនៅលើអញ្ចាញធ្មេញដែលកំពុងតែឈឺនោះដោយផ្ទាល់យ៉ាងហោចណាស់ ៥នាទី។ ចូរជ្រើសរើសតែណាដែលសម្បូរទៅដោយសារធាតុ Astringent Tannins ដូចជា តែខ្មៅ តែបៃតង ឬតែផ្ការំយោល។ ឬអ្នកអាចជ្រើសរើសតែដែលផ្ទុកសារធាតុប្រឆាំងការរលាកដូចជា តែខ្ញី។
ថ្នាំបំបាត់ការឈឺ
ថ្នាំបំបាត់ការឈឺចាប់ធម្មតាៗនិងពពួកថ្នាំ NSAIDs ដូចជា អាស្ពីរីន, Acetaminophen (Tylenol) និង Ibuprofen (Advil) អាចជួយបំបាត់ការឈឺចាប់បាន។
ពេលដែលត្រូវទៅជួបពេទ្យ
ការឈឺចាប់នៅអញ្ចាញធ្មេញច្រើនតែអាចងាយស្រួលព្យាបាល។ ប៉ុន្តែករណីខ្លះ ការឈឺចាប់នេះក៏អាចអាការៈមួយនៃបញ្ហាសុខភាពធំៗដែរ។ (អាន:ថ្នាំងងុយគេង ពេលអ្នកគួរប្រើ)ដូច្នេះចូរទៅជួបពេទ្យធ្មេញបើសិនជាការឈឺចាប់នៅអញ្ចាញធ្មេញរបស់អ្នកមានកល្ខណៈដូចខាងក្រោមនេះ៖
- កើតឡើងជាប់រហូត ឬខ្លាំងទៅៗ
- រំខានដល់ការគេង ឬញ៉ាំអាហារ
- ជាប់ទាក់ទងនឹងអាការៈផ្សេងៗទៀត៕