ពពាយជាបន្លែមួយប្រភេទដែលមានរសជាតិឆ្ងាញ់អាចយកមកចម្អិនធ្វើម្ហូបបាន ឬទទួលទានទាំងឆៅបែបបន្លែអន្លក់ ហើយសម្បូរណាស់ក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បើទោះជាភាគច្រើននៃពួកយើងសុទ្ធតែស្គាល់និងធ្លាប់ទទួលទានបន្លែនេះ ប៉ុន្តែប្រហែលមិនចាប់អារម្មណ៍គិតដល់ទេថា ពពាយអាចផ្ដល់អត្ថប្រយោជន៍គួរឱ្យភ្ញាក់ផ្អើលជាច្រើនចំពោះសុខភាពរាងកាយនិងសម្រស់បាន! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីផលល្អៗនៃការទទួលទានបន្លែពពាយ ៖

១. ធ្វើឱ្យប្រព័ន្ធរំលាយអាហារកាន់តែមានលក្ខណៈប្រសើរឡើង

នេះក៏ព្រោះតែពពាយជាប្រភពដ៏ប្រសើរនៃជាតិសសៃ។ ជាតិសសៃដែលមានប្រសិទ្ធិភាពជួយសម្អាតកំទេចកំទីអាហារដែលជាប់គាំង ឬទាក់ក្នុងពោះវៀនធំ។ វាក៏ជួយសម្របសម្រួលដំណើរការនៃប្រព័ន្ធរំលាយអាហារនិងទប់ស្កាត់បញ្ហាទល់លាមកគួរឱ្យកត់សម្គាល់។

២. ពង្រឹងសុខភាពភ្នែក

ពពាយក៏មានផ្ទុកវីតាមីន A ដែលជាសារធាតុចិញ្ចឹមចាំបាច់សម្រាប់រក្សាសុខភាពភ្នែកល្អប្រសើរ។ ដូច្នេះក្រៅពីការ៉ុត អ្នកក៏គួររួមបញ្ចូលពពាយក្នុងរបបអាហារប្រចាំថ្ងៃផងដែរ។

៣. ពង្រឹងប្រព័ន្ធភាពស៊ាំរាងកាយ

បរិមាណនៃវីតាមីន C ក្នុងពពាយនឹងជួយពង្រឹងប្រព័ន្ធភាពស៊ាំរាងកាយគួរឱ្យកត់សម្គាល់។ វីតាមីន C រំញោចការផលិតកោសិកាឈាមសដែលប្រយុទ្ធប្រឆាំងជំងឺឆ្លង។ ប្រសិនបើអ្នកឧស្សាហ៍ផ្ដាសាយ ឬងាយឆ្លងជំងឺ ចូរបង្កើនការទទួលទានអាហារមានផ្ទុកសម្បូរទៅដោយវីតាមីន C។

៤. សុខភាពសាច់ដុំ

ពពាយជាប្រភពដ៏ល្អនៃប្រូតេអ៊ីនដែលចាំបាច់សម្រាប់រក្សាភាពរឹងមាំនិងការលូតលាស់នៃសាច់ដុំ។ ដូច្នេះប្រសិនបើអ្នកចង់ឱ្យសាច់ដុំរឹងមាំនិងធំជាងមុន ចូរកុំស្ទាក់ស្ទើនឹងរួមបញ្ចូលពពាយក្នុងរបបអាហារប្រចាំថ្ងៃ។

៥. ល្អសម្រាប់ស្ត្រីមានផ្ទៃពោះ

ពពាយជាប្រភពសម្បូរបែបនៃជាតិ Folate ដែលចាំបាច់សម្រាប់ដំណើរការសំយោគ DNA និងការបែងចែកកោសិកា។ ចំពោះស្ត្រីការទទួលទានជាតិ Folate គ្រប់គ្រាន់កំឡុងពេលមានផ្ទៃពោះអាចជួយទប់ស្កាត់បញ្ហាខូចខាតសសៃប្រសាទនៃទារកទើបនឹងកើត។

៦. កាត់បន្ថយការរលាកក្នុងរាងកាយ

ពពាយមានផ្ទុកជាតិខ្លាញ់ល្អដែលជួយកាត់បន្ថយការរលាកក្នុងរាងកាយទប់ស្កាត់ហានិភ័យនៃជំងឺជាច្រើនរួមទាំងជំងឺបេះដូង ហើមរលាកសន្លាក់ និងមហារីក។

៧. កាត់បន្ថយហានិភ័យនៃជំងឺពុកឆ្អឹង

មួយក្នុងចំណោមសារធាតុចិញ្ចឹមជាច្រើនដែលមានផ្ទុកក្នុងពពាយ គឺកាល់ស្យូម។ ហើយភាគច្រើននៃពួកយើងសុទ្ធតែដឹងហើយថាកាល់ស្យូមសំខាន់យ៉ាងណាចំពោះសុខភាពឆ្អឹងនិងធ្មេញ។ ការរក្សាបានសុខភាពឆ្អឹងរឹងមាំនឹងជួយឱ្យអ្នកចៀសផុតហានិភ័យនៃជំងឺពុកឆ្អឹង។

៨. ទប់ស្កាត់ភាពចាស់មុនអាយុ

ពពាយ មានផ្ទុកសម្បូរទៅដោយវីតាមីន C និងវីតាមីន A។ វីតាមីនទាំងពីរនេះដើរតួជាសារធាតុប្រឆាំងអុកស៊ីតកម្មដ៏មានឥទ្ធិពល។ ហើយក៏ជួយទប់ស្កាត់សញ្ញានៃភាពចាស់មុនអាយុដូចជាស្នាមជ្រីវជ្រួញ និងស្នាមខ្សែលើស្បែកផងដែរ។

៩. រក្សាភាពបន់បែននៃស្បែក

សារធាតុប្រឆាំងអុកស៊ីតកម្មខ្ពស់ដែលមានវត្តមានក្នុងពពាយជួយធានាដល់ការរក្សាបាននូវភាពបន់បែនតឹងណែននៃស្បែកនិងថែមទាំងធ្វើឱ្យស្បែកមើលទៅក្មេងជាងវ័យទៀតផង៕