របបអាហារផ្តល់សុខភាពសម្បូរទៅដោយបន្លែ និងផ្លែឈើត្រូវបានគេស្គាល់ថា មានប្រយោជន៍ចំពោះរាងកាយមនុស្សច្រើនយ៉ាង ហើយយោងទៅតាមអ្នកស្រាវជ្រាវនាពេលបច្ចុប្បន្ននេះបានរកឃើញថា វាក៏ប្រហែលជាដើរតួនាទីមួយក្នុងការបន្ថយអាការៈជាច្រើននៃការរ៉ាំងរដូវលើមនុស្សស្រីថែមទៀត។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)
ថ្វីបើការព្យាបាលដោយប្រើអ័រម៉ូនត្រូវបានគេអះអាងថា ជាវិធីសាស្រ្តព្យាបាលអាការៈពេលរ៉ាំងរដូវអាចទទួលយកបានសម្រាប់ស្រ្តីភាគច្រើនក៏ដោយ តែការស្រាវជ្រាវសម្រាប់ជម្រើសព្យាបាលដោយមិនប្រើថ្នាំកំពុងតែធ្វើហើយ ជាពិសេសសម្រាប់ស្រ្តីដែលមានការប្រឈមមុខ និងអ្នកដែលមិនស័ក្តិសមសម្រាប់ព្យាបាលដោយប្រើអ័រម៉ូន។
អ្វីដែលពិសេសនោះគឺថា វាមានការផ្តោតអារម្មណ៍មួយទៅលើកត្តារបៀបរស់នៅដែលអាចផ្លាស់ប្តូរបាន ហើយអាចបង្ការ ឬសម្រួលដល់អាការៈនៃការរ៉ាំងរដូវបានទៀត ដែលរឿងនេះត្រូវបានចុះផ្សាយក្នុងសារព័ត៌មាន Menopaus: The Journal of the North American Menopause Society។ យោងទៅតាមអ្នកស្រាវជ្រាវបានឲ្យដឹងថា តាមការសិក្សាមុនៗបានណែនាំថា កត្តារបបអាហារប្រហែលជាដើរតួនាទីដ៏សំខាន់ក្នុងការផលិតអ័រម៉ូនអេស្រ្តូជែន ការរំលាយអាហារ និងអាការៈពេលរ៉ាំងរដូវ។ ការញ៉ាំផ្លែឈើ ឬរបបអាហារបែបប្រជាជនរស់នៅតាមតំបន់សមុទ្រមីឌីទែរ៉ាណែ ដែលយើងអាចសម្គាល់ដឹងតាមរយៈរបបអាហារមានបន្លែ ផ្លែឈើ និងគ្រាប់ធុញ្ញជាតិខ្ពស់នោះ គឺមានជាប់ទាក់ទងនឹងការថយចុះអាការៈនៃការរ៉ាំងរដូវតែម្តង។
ការសិក្សាបានរកឃើញថា មួយថ្ងៃញ៉ាំផ្លែប៉ោមមួយផ្លែប្រហែលជាអាចការពារកុំឲ្យកើតអាការៈនៃការរ៉ាំងរដូវបាន។ ប៉ុន្តែអ្នកស្រាវជ្រាវនិយាយថា ថ្វីបើការញ៉ាំបន្លែ និងផ្លែឈើមានជាប់ទាក់ទងនឹងការថយចុះអាការៈនៃការរ៉ាំងរដូវក៏ដោយ តែការដែលញ៉ាំច្រើនពេកអាចធ្វើឲ្យមានបញ្ហាផ្លូវទឹកម៉ូត្របាន។ (អាន:ថ្នាំងងុយគេង ពេលអ្នកគួរប្រើ)
ឧទាហរណ៍ ផ្លែឈើជូរៗត្រូវបានគេរកឃើញថាមានផលរំខានទៅលើប្រព័ន្ធទឹកម៉ូត្រជាងផ្លែឈើផ្សេងៗទៀត ខណៈពេលដែលបន្លែពណ៌បៃតង ឬលឿងចាស់ល្អជាងបន្លែប្រភេទផ្សេងទៀត។ មានអំណះអំណាងគ្រប់គ្រាន់ដែលរបបអាហារផ្តល់សុខភាព ឬសម្បូរបន្លែ និងផ្លែឈើមានប្រយោជន៍ចំពោះសុខភាពមនុស្សយើង ប៉ុន្តែវាក៏ត្រូវការការសិក្សាបន្ថែមទៀតដើម្បីកំណត់ថាជម្រើសអាហារបែបណាដែលមានឥទិ្ធពលលើអាការៈនៃការរ៉ាំងរដូវខុសៗគ្នា៕