ការបំពុលបរិយាកាសបានក្លាយទៅជាបញ្ហាដ៏ខ្លាំងមួយនៅតាមទីក្រុង ជាពិសេសរាជធានីធំៗតែម្តង។ ខណៈពេលដែលកម្រិតការបំពុលបរិយាកាសបានកើនឡើងយ៉ាងខ្លាំងក្នុងរដូវរងា តែកម្រិតបំពុលបានចាប់ផ្តើមឡើងកាន់តែខ្ពស់ខ្លាំងបន្ថែមទៀតដែរ។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដោយសារតែកម្រិតបំពុលបរិយាកាសមានកម្រិតខ្ពស់ ដូច្នេះមនុស្សទាំងអស់តម្រូវឲ្យនៅក្នុងផ្ទះ និងចៀសជាងចេញទៅខាងក្រៅផ្ទះដើម្បីហាត់ប្រាណ ដើរលេង និងសកម្មភាពផ្សេងៗ។ សម្រាប់អ្នកដែលប្រឈមខ្ពស់នឹងបញ្ហាផ្លូវដង្ហើម ឬអ្នកមានជំងឺស្រាប់ដូចជា ជំងឺហឺតត្រូវបានណែនាំឲ្យដាក់ថ្នាំតាមខ្លួន។ ទោះបីជាយ៉ាងណាក៏ដោយ តើនឹងមានអ្វីកើតឡើងក្នុងរាងកាយទៅបើសិនជាយើងស្រូបខ្យល់បំពុលបរិយាកាសចូលទៅក្នុងសួត?
ប៉ះពាល់ដល់ច្រមុះ និងប្រព័ន្ធស្រង់ក្លិន
នៅពេលយើងដកដង្ហើម ការប៉ះពាល់ដំបូងគេគឺច្រមុះតែម្តង។ នៅពេលយើងស្រូបយកខ្យល់កខ្វក់ មានជាតិពុល កោសិកាទទួលដឹងក្នុងច្រមុះអាចនឹងរងការរលាក ហើយយើងអាចនឹងកណ្តាស ឬក្អកដើម្បីបញ្ចេញសារធាតុពុលនោះចេញ។
ប៉ះពាល់ដល់សួត
សួតគឺជាសរីរាង្គដំបូងគេដែលរងការប៉ះពាល់ពីខ្យល់បំពុល។ នៅពេលអ្នកដង្ហើមចូល សារធាតុបំពុលក្នុងខ្យល់នោះនឹងធ្វើឲ្យរលាកផ្លូវដង្ហើម។ នៅពេលរឿងនេះកើតឡើង សាច់ដុំនៅជុំវិញទងសួតនឹងរឹងតឹង។ នៅពេលសាច់ដុំនេះរឹតតឹង ភ្នាស់កម្រាលរបស់ទងសួតអាចទៅជាហើម និងបង្កើតបានជាស្លេស្ម។ នៅពេលផ្លូវដង្ហើមរួមតូចដោយសារតែរឿងនេះ វានឹងធ្វើឲ្យកាន់តែពិបាកដកដង្ហើម។ យន្តការណ៍ជំងឺនេះមានលក្ខណៈដូចគ្នានឹងការធ្វើទុក្ខរបស់ជំងឺហឺតដែរ។
ការដែលផ្លូវដង្ហើមមានការរួមតូចបែបនេះវាប្រហែលជាធ្វើឲ្យសួតកាន់តែពិបាកច្រោះវីរុស និងមេរោគផ្សេងៗទៀត ដូច្នេះប្រឈមកាន់តែខ្លាំងនឹងការបង្ករោគ។
ប៉ះពាល់ដល់បេះដូង
ខ្យល់បំពុលមានច្រើនប្រភេទខុសៗគ្នា។ ខណៈពេលដែលខ្យល់បំពុលខ្លះមានលក្ខណៈក្រាស និងអាចនៅក្នុងសួតបាន ខ្លះទៀតគឺជាឧស្ម័ន ដែលអាចចូលទៅក្នុងរាងកាយដូចគ្នានឹងអុកស៊ីសែនដែរ។ ឧស្ម័នទាំងនេះក៏អាចចម្លងចូលទៅក្នុងចរន្តឈាម និងបង្កការប៉ះពាល់ដល់បេះដូងថែមទៀត។ បេះដូងលោតមិនទៀងទាត់ សរសៃឈាមរួមតូច លើសសម្ពាធឈាម ។ល។ សុទ្ធតែបណ្តាលមកពីខ្យល់បំពុលតែម្តង។
នៅពេលជាតិពុលចូលទៅក្នុងឈាមតាមរយៈសួត វានឹងធ្វើឲ្យមានការរលាកក្នុងសរសៃឈាម។ រឿងនេះអាចធ្វើឲ្យលំហូរឈាមថយចុះ ព្រមទាំងប្រឈមកាន់តែខ្ពស់នឹងជំងឺគាំងបេះដូងទៀត។
ប៉ះពាល់ដល់ខួរក្បាល
កម្រិតដ៏ខ្ពស់នៃការបំពុលបិរយាកាសក៏ត្រូវបានជាប់ទាក់ទងនឹងសុខភាពខួរក្បាល និងផ្លូវចិត្តមិនល្អដែរ។ សារធាតុបំផុតអាចធ្វើឲ្យប្រឈមកាន់តែខ្លាំងនឹងកំណកឈាម និងបង្កជាជំងឺដាច់សរសៃឈាមខួរក្បាល។ យោងទៅតាមសេចក្តីរាយការណ៍បានឲ្យដឹងថា សារធាតុបំពុលអាចចូលទៅក្នុងខួរក្បាលបាននៅពេលវាចូលដល់ចរន្តឈាម។ (អាន:ថ្នាំងងុយគេង ពេលអ្នកគួរប្រើ)រឿងនេះនឹងធ្វើឲ្យឈឺក្បាលកាន់តែខ្លាំង ថប់អារម្មណ៍ និងប៉ះពាល់ដល់ប្រព័ន្ធសរសៃប្រសាទកណ្តាល។ ការយកចិត្តទុកដាក់ ភាពឆ្លាតវ៉ៃ និងអាកប្បកិរិយាទំនងជារងការប៉ះពាល់ដោយខ្យល់បំពុលបរិយាកាសដែរ៕