យោងទៅតាមការសិក្សាមួយដែលធ្វើឡើងដោយអ្នកស្រាវជ្រាវជនជាតិចិនបានឲ្យដឹងថា ភាគច្រើនអ្នកដែលឆ្លងវីរុសបង្កជំងឺរលាកសួតថ្មី COVID-19 គឺមានអាការៈតិចតួចទេ ខណៈពេលដែលមនុស្សចាស់ និងអ្នកមានជំងឺក្នុងខ្លួនមានការប្រឈមមុខនឹងជំងឺនេះខ្លាំងបំផុត។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)មកដល់ពេលនេះ ជំងឺនេះបានសម្លាប់មនុស្សជាង ១៩០០នាក់ទៅហើយ និងមានអត្រាអ្នកផ្ទុកជំងឺនេះកើនដល់ច្រើនជាង ៧២០០០នាក់ឯណោះក្នុងប្រទេសចិនចាប់តាំងពីវាត្រូវបានផ្ទុះដំបូងចេញពីកណ្តាលទីក្រុងវូហានកាលពីចុងឆ្នាំមុន។
សេចក្តីរាយការណ៍មួយដែលបានចុះផ្សាយក្នុងសារព័ត៌មានចិន Chinese Journal of Epidemiology បានពិនិត្យទៅលើមនុស្សប្រមាណ ៧២៣១៤នាក់ដែលសង្ស័យថាមានអាការៈរបស់ជំងឺ COVID-19 ត្រូវបានគេកំណត់ច្បាស់ហើយនៅក្នុងប្រទេសចិនកាលពីថ្ងៃទី ១១ខែកុម្ភៈនេះ។ វាគឺជាការការសិក្សាដ៏ធំបំផុតទៅលើអ្នកជំងឺផ្ទុកវីរុស កូរ៉ូណា ចាប់តាំងពីមានការផ្ទុះដំបូងបំផុតក្នុងចុងខែធ្នូ ឆ្នាំទៅ។ ខាងក្រោមនេះគឺជាការរកឃើញសំខាន់ៗបានមកពីការចុះផ្សាយរបស់ Chinese Centre of Disease Control and Prevention (CCDC)៖
អ្នកជំងឺប្រមាណ ៨០.៩ភាគរយត្រូវបានចាត់ទុកថាមានអាការៈជំងឺនេះកម្រិតស្រាល ១៣.៨ភាគរយធ្ងន់ធ្ងរ និង ៤.៧ភាគរយប៉ុណ្ណោះដែលចាត់ទុកថាគ្រោះថ្នាក់។ អត្រានៃការស្លាប់ខ្ពស់បំផុតនោះគឺកើតឡើងលើមនុស្សអាយុចាប់ពី ៨០ឆ្នាំឡើងទៅ ដែលមាន ១៤.៨ភាគរយ។ ការសិក្សាបានរកឃើញថា អ្នកជំងឺដែលមានជំងឺបេះដូងសរសៃឈាមទំនងជាងាយនឹងស្លាប់ដោយសារផលវិបាករបស់វីរុសកូរ៉ូណានេះ បន្ទាប់មកជំងឺទឹកនោមផ្អែម ជំងឺផ្លូវដង្ហើមរ៉ាំរ៉ៃ និងលើសសម្ពាធឈាម។
យ៉ាងណាមិញមិនមានការស្លាប់លើកុមារអាយុចាប់ពី ៩ឆ្នាំទៅទេថ្វីបើមានពីរករណីនៃទារកទើបនឹងកើតបានឆ្លងវីរុសនេះពីម្តាយគេ។ មនុស្សអាយុរហូតដល់ ៣៩ឆ្នាំ គឺមានអត្រានៃការស្លាប់ទាបត្រឹមតែ ០.២ភាគរយប៉ុណ្ណោះ។ អត្រានៃការស្លាប់នឹងកើនឡើងបន្តិចម្តងៗតាមអាយុ
- អាយុខ្ទង់ ៤០ឆ្នាំ មាន ០.៤ភាគរយ
- អាយុខ្ទង់ ៥០ឆ្នាំ មាន ១.៣ភាគរយ
- អាយុខ្ទង់ ៦០ឆ្នាំ មាន ៣.៦ភាគរយ
- អាយុខ្ទង់ ៧០ឆ្នាំ មាន ៨.០ភាគរយ
បុរសទំនងជាងាយនឹងស្លាប់ (២.៨ភាគរយ) ជាងស្រ្តី (១.៧ភាគរយ)។ អត្រានៃការស្លាប់សរុបដោយសារតែវីរុសនេះស្ថិតត្រឹមតែ ២.៣ភាគរយទេ។
ស្ទើតែ ៨៦ភាគរយនៃអ្នកឆ្លងជំងឺដោយសារតែវីរុសនេះ គឺបានរស់នៅ ឬធ្វើដំណើរទៅទីក្រុងវ៉ូហាន ជាពិសេសកន្លែងផ្សារលក់អាហារសមុទ្រមួយកន្លែងដែលលក់សាច់សត្វព្រៃ ហើយក៏ត្រូវបានគេជឿថាជាប្រភពដើមដែលផ្ទុះវីរុសនេះដែរ។
ចំនួនបុគ្គលិកសុខាភិបាលសរុប ៣០១៩នាក់ ត្រូវបានកំណត់រោគវិនិច្ឆ័យថាមានជំងឺនេះ ១៧១៦នាក់ត្រូវបានបញ្ជាក់ថាមានពិត និង ៥នាក់បានស្លាប់គិតត្រឹមថ្ងៃទី១១ ខែកុម្ភៈនេះ។ ក្នុងការវិភាគមួយដែលមានករណីធ្ងន់ធ្ងរ ១៦៨៨នាក់ លើបុគ្គលិកពេទ្យបានបង្ហាញថា ៦៤ភាគរយនៃពួកគេទាំងអស់បានកំពុងតែធ្វើការក្នុងទីក្រុងវ៉ូហាន។ យោងទៅតាមសេចក្តីរាយការណ៍បានឲ្យដឹងថា ភាគរយនៃករណីធ្ងន់ធ្ងរលើបុគ្គលិកពេទ្យនៅទីក្រុងវ៉ូហានមានការថយចុះបន្តិចម្តងៗហើយ ចាប់ពី ៣៨.៩ភាគរយដែលស្ថិតក្នុងកម្រិតខ្ពស់បំផុត (កាលពីថ្ងៃ ២៨ ខែមករា) ធ្លាក់មក ១២.៧ភាគរយ កាលពីដើមខែកុម្ភៈនេះ។
យ៉ាងណាមិញ នាយកមន្ទីរពេទ្យម្នាក់ក្នុងទីក្រុងវ៉ូហានបានស្លាប់ដោយសារតែជំងឺនេះកាលពីថ្ងៃអង្គារនេះដែរ។ (អាន:ថ្នាំងងុយគេង ពេលអ្នកគួរប្រើ)កាលពីដើមខែនេះ គ្រូពេទ្យជំនាញចក្ខុរោគ Li Wenliang ក៏បានស្លាប់ដោយសារតែជំងឺនេះដែរ៕