Join with Health.com.kh on Telegram

តែផ្កាម្លិះ គឺជាតែមួយប្រភេទដែលមានក្លិនក្រអូបដោយសារផ្កាម្លិះ។ ភាពក្រអូបរបស់ផ្កាម្លិះនេះអាចប្រើជាមួយស្លឹកតែដើម្បីរក្សាទុក ឬកិនវាជាមួយតែបាន។ ដោយសារតែតែផ្កាម្លិះត្រូវបានបង្កើតឡើងដោយស្លឹកតែបៃតង ដូច្នេះវានឹងអាចផ្តល់ជាប្រយោជន៍ចំពោះសុខភាពច្រើនដូចគ្នានឹងការញ៉ាំតែបៃតងដែរ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ខាងក្រោមនេះគឺជាប្រយោជន៍ធំៗនៃការញ៉ាំតែផ្កាម្លិះ៖

សម្បូរអង់ទីអុកស៊ីដង់

តែផ្កាម្លិះផ្ទុកទៅដោយសារធាតុ Polyphenols ដ៏ខ្លាំងក្លា ដែលវាជាអង់ទីអុកស៊ីដង់មួយប្រភេទសម្រាប់ការពារកោសិកាពីរ៉ាឌីកាលសេរី។ ការសិក្សាជាច្រើនបានរកឃើញថា វាអាចជួយការពារជំងឺបេះដូង និងមហារីកច្រើនប្រភេទ។ Polyphenols ដ៏ច្រើនរបស់តែផ្កាម្លិះមានឈ្មោះថា Catechins។ វាក៏អាចជួយសម្រកទម្ងន់ ពង្រឹងដល់ការគ្រប់គ្រងជាតិស្ករក្នុងឈាម សុខភាពបេះដូង និងមាត់ធ្មេញ។ 

ជំនួយដល់ការសម្រកទម្ងន់

ការញ៉ាំតែផ្កាម្លិះប្រហែលជាជួយសម្រកទម្ងន់តាមរយៈការបង្កើនល្បឿននៃការរំលាយអាហារ។ ការសិក្សាជាច្រើននិយាយថា តែបៃតង ដែលផ្សំជាមួយតែផ្កាម្លិះនោះ ប្រហែលជាអាចបង្កើនការរំលាយអាហារបាន ៤ ទៅ ៥ភាគរយ ហើយបង្កើនការរំលាយជាតិខ្លាញ់បាន ១០ ទៅ ១៦ភាគរយឯណោះ។ ដូច្នេះវាអាចរំលាយខ្លាញ់បានពី ៧០ ទៅ ១០០កាឡូរីក្នុងមួយថ្ងៃ។ 

ការពារសុខភាពបេះដូង

តែផ្កាម្លិះសម្បូរសារធាតុ Polyphenols ដែលអាចការពារជំងឺបេះដូងបាន។ សារធាតុ Polyphenol នេះត្រូវបានគេបង្ហាញថា អាចការពារកុំឲ្យកូឡេស្តេរ៉ុលអាក្រក់ធ្វើអុកស៊ីតកម្ម ដើម្បីបង្កើនការប្រឈមនឹងជំងឺបេះដូងបាន។ ក្នុងការសិក្សាមួយ ថ្នាំបំប៉នមានជាតិ Polyphenols របស់តែផ្កាម្លិះ អាចបន្ថយការកើតជាកំណកក្នុងសរសៃឈាមបាន ៦៨ភាគរយ។ ដូច្នេះវាក៏អាចបន្ថយការប្រឈមនឹងជំងឺបេះដូងបានយ៉ាងល្អ។ ការសិក្សាមួយផ្សេងទៀតបានរកឃើញថា អ្នកដែលញ៉ាំតែផ្កាម្លិះ ២៣៧ ទៅ ៧១០មីលីលីត្រក្នុងមួយថ្ងៃ អាចបន្ថយការប្រឈមនឹងជំងឺគាំងបេះដូង ១៩ភាគរយ និងដាច់សរសៃឈាមខួរក្បាលបាន ៣៦ភាគរយ បើប្រៀបធៀបនឹងអ្នកញ៉ាំតិចជាង ២៣៧មីលីលីត្រ។ 

ជំរុញដល់សុខភាពមាត់ធ្មេញ

តែផ្កាម្លិះជាធម្មតាគឺមានសារធាតុ Catechins ដែលអាចការពារពីបញ្ហាធ្មេញពុកបាន តាមរយៈការសម្លាប់បាក់តេរីដែលបង្កជាកំណកនៅធ្មេញជាពិសេស ពពួកបាក់តេរី Streptococcus Mutans។ ការសិក្សាមួយដែលធ្វើលើមនុស្សប្រមាណ ៣០នាក់ បានសង្កេតឃើញថា ការប្រើប្រាស់ទឹកខ្ពុរមាត់មានសាធាតុ Catechin រយៈពេល ១សប្តាហ៍ ឃើញថា មានប្រសិទ្ធភាពបន្ថយការកើតជាកំណកជាប់ធ្មេញបានយ៉ាងមានប្រសិទ្ធភាពដូចទឹកខ្ពុរមាត់សម្លាប់មេរោគដែរ។ 

បង្កើនមុខងាររបស់ខួរក្បាល

តែផ្កាម្លិះមានប្រយោជន៍ច្រើនដែលអាចជួយបង្កើនមុខងាររបស់ខួរក្បាល។ ក្នុងតែមួយពែង (២៣៧មីលីលីត្រ) មានជាតិកាហ្វេអ៊ីន ១៥ ទៅ៦០មីលីក្រាម ដូច្នេះវាអាចភ្ញោចដល់ប្រព័ន្ធសរសៃប្រសាទ តាមរយៈការទប់ស្កាត់សារធាតុចម្លងសរសៃប្រសាទ Adenosine រវាងខួរក្បាល និងរាងកាយ។ ជាធម្មតា Adenosine នឹងជួយរាងកាយឲ្យសម្រាក។ (អាន:ថ្នាំងងុយគេង ពេលអ្នកគួរប្រើ)ចំណែកឯជាតិកាហ្វេអ៊ីននឹងជំរុញដល់សកម្មភាពខួរក្បាលនិងជំនួយដល់ការបញ្ចេញអ័រម៉ូនធ្វើឲ្យមានអារម្មណ៍ល្អទៀតផង៕