Join with Health.com.kh on Telegram

ភាគច្រើននៃពួកយើងប្រហែលជាមិនធ្លាប់ដឹងទេថាវីតាមីន b12 ក្រៅពីល្អសម្រាប់សុខភាពខួរក្បាលហើយនោះក៏ចាំបាច់សម្រាប់សុខភាពរាងកាយទាំងមូលផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើវីតាមីននេះអាចផ្ដល់អត្ថប្រយោជន៍យ៉ាងណាខ្លះចំពោះសុខភាព? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីឥទ្ធិពលល្អៗនៃវីតាមីន b12 ចំពោះសុខភាព ៖

  • ប្រភពដ៏ប្រសើរនៃវីតាមីន B12

១. ត្រីសាឌីន

ការទទួលទានត្រីសាឌីនត្រឹមជាង ៩០ ក្រាមអាចផ្ដល់ឱ្យរាងកាយនូវវីតាមីន B12 ប្រចាំថ្ងៃដល់ទៅ ៣៣៨ភាគរយ។ ត្រីសាឌីនក៏ជាប្រភពដ៏ប្រសើរនៃសេលេញ៉ូម ផូស្វ័រ វីតាមីន D ប្រូតេអ៊ីន និងអាស៊ីតខ្លាញ់អូមេហ្កា ៣ ផងដែរ។ ត្រីសាឌីនកំប៉ុងអាចទទួលទានបានទាំងឆ្អឹងដូច្នេះវាក៏អាចផ្ដល់ជាតិកាល់ស្យូមខ្ពស់ដល់រាងកាយគួរឱ្យកត់សម្គាល់។

២. ត្រីសាលម៉ុន

រាងកាយអាចទទួលបានវីតាមីន b12 ប្រចាំថ្ងៃដល់ទៅ ២៣៦ ភាគរយពីការទទួលទានត្រីសាលម៉ុនប្រមាណ ១១៣ ក្រាម។ ត្រីសម្បូរខ្លាញ់នេះក៏មានផ្ទុកសម្បូរទៅដោយប្រូតេអ៊ីន អាស៊ីតខ្លាញ់អូមេហ្កា ៣ សេលេញ៉ូម អ៊ីយ៉ូដ ផូស្វ័រ វីតាមីន b3 វីតាមីន b6 និងវីតាមីន D ផងដែរ។

៣. ត្រីធូណា

ការទទួលទានត្រីធូណាប្រមាណ ១១៣ ក្រាមអាចផ្ដល់ឱ្យរាងកាយនូវវីតាមីន b12 ប្រចាំថ្ងៃដល់ទៅ ១១១ភាគរយ។ វាក៏ជាប្រភពដ៏ប្រសើរនៃសេលេញ៉ូមដែលសំខាន់សម្រាប់សុខភាពក្រពេញទីរ៉ូអ៊ីដនិងជួយពង្រឹងប្រព័ន្ធភាពស៊ាំរាងកាយ។ ធូណាក៏មានផ្ទុកសម្បូរទៅដោយប្រូតេអ៊ីន ផូស្វ័រ សារធាតុ choline ប៉ូតាស្យូម អាស៊ីតខ្លាញ់អូមេហ្កា ៣ វីតាមីន b1 វីតាមីន b3 វីតាមីន b6 និងវីតាមីន D។

៤. សាច់ចៀម

ប្រមាណត្រឹម ១១៣ ក្រាមនៃសាច់ចៀមអាចផ្ដល់ឱ្យរាងកាយនូវតម្រូវការវីតាមីន b12 ប្រចាំថ្ងៃដល់ទៅ ១០៥ ភាគរយ។ សាច់ចៀមក៏ជាប្រភពដ៏ល្អបំផុតមួយនៃប្រូតេអ៊ីន សេលេញ៉ូម ស័ង្កសី ផូស្វ័រ និងវីតាមីន b3 ដែលមានលក្ខណៈសម្បត្តិប្រឆាំងអុកស៊ីតកម្មនិងចាំបាច់សម្រាប់ការផលិតថាមពល។

៥. បង្គា

ប្រភពដ៏ប្រសើរមួយទៀតនៃវីតាមីន b12 គឺបង្គា។ ការទទួលទានបង្គាប្រមាណ ១១៣ ក្រាមអាចផ្ដល់ឱ្យរាងកាយនូវតម្រូវការវីតាមីន b12 ចាំបាច់ប្រចាំថ្ងៃដល់ទៅ ៧៨ ភាគរយ។ អាហារសមុទ្រនេះក៏មានផ្ទុកសម្បូរទៅដោយផូស្វ័រ ទង់ដែង អ៊ីយ៉ូដ ប្រូតេអ៊ីន វីតាមីន b3 b6 និងវីតាមីន E ផងដែរ។ លើសពីនេះទៅបង្គាក៏ជាប្រភពដ៏ល្អនៃវីតាមីន A ដែលសំខាន់សម្រាប់សុខភាពភ្នែកគួរឱ្យកត់សម្គាល់។

៦. សាច់គោ

រាងកាយអាចទទួលបាននូវវីតាមីន B12 ចាំបាច់ប្រចាំថ្ងៃដល់ទៅ ៦០ ភាគរយពីការទទួលទានសាច់គោប្រមាណ ១១៣ ក្រាម។ សាច់គោក៏ជាប្រភពដ៏ល្អនៃប្រូតេអ៊ីននិងជាតិដែកដែលជួយកាត់បន្ថយហានិភ័យនៃជំងឺខ្វះគ្រាប់ឈាមក្រហម។

៧. យ៉ាអួរ

ប្រសិនបើអ្នកចូលចិត្តទទួលទានយ៉ាអួរជាប្រចាំនោះគ្មានអ្វីដែលត្រូវខ្វាយខ្វល់ពីបញ្ហាខ្វះវីតាមីន b12 ឡើយ។ ត្រឹម ១ ពែងនៃយ៉ាអួរអាចផ្ដល់ឱ្យរាងកាយនូវវីតាមីន b12 ចាំបាច់ប្រចាំថ្ងៃដល់ទៅ ៣៨ ភាគរយ។

៨. ទឹកដោះគោ

ត្រឹមប្រមាណ ១១៨ មីលីលីត្រនៃទឹកដោះគោសុទ្ធផ្ដល់ឱ្យរាងកាយនូវវីតាមីន b12 ចាំបាច់ប្រចាំថ្ងៃដល់ទៅ ២៣ ភាគរយ។ ទឹកដោះគោក៏ជាប្រភពដ៏ប្រសើរនៃអ៊ីយ៉ូដ សេលេញ៉ូម ប្រូតេអ៊ីន កាល់ស្យូម និងវីតាមីន D ដែលសំខាន់សម្រាប់ការស្រូបយកជាតិកាល់ស្យូមបានត្រឹមត្រូវផងដែរ។

  • អត្ថប្រយោជន៍នៃវីតាមីន B12

១. ផ្ដល់ថាមពលបន្ថែម

វីតាមីន b12 ជួយបំលែងអាហារទៅជាថាមពល។ ដូច្នេះហើយទើបការទទួលទានអាហារមានផ្ទុកសម្បូរទៅដោយវីតាមីន b12 គ្រប់គ្រាន់ជួយកាត់បន្ថយភាពអស់កម្លាំងដែលនឹងធ្វើឱ្យអ្នកមានថាមពលប្រសើរជាងមុន។ វីតាមីននេះក៏ជួយធ្វើឱ្យដំណើរការនៃការដុតរំលាយអាហារក្នុងរាងកាយមានលក្ខណៈកាន់តែប្រសើរឡើងដែលអាចបង្កើននិងរក្សាថាមពលផងដែរ។

២. លើកកម្ពស់អារម្មណ៍ល្អប្រសើរ

ធ្លាប់ដឹងទេថាកង្វះវីតាមីន b12 អាចបណ្ដាលឱ្យមានបញ្ហាអារម្មណ៍មិនល្អ? នោះក៏ព្រោះតែវីតាមីន b12 មានប្រសិទ្ធិភាពគ្រប់គ្រងអារម្មណ៍ល្អប្រសើរជួយរក្សាសុខភាពផ្លូវចិត្ត។ ម្យ៉ាងវិញទៀត វីតាមីន b12 ក៏ជួយរក្សាថាមពលខួរក្បាលទប់ទល់នឹងភាពអស់កម្លាំងដោយសារបញ្ហាស្ត្រេសផងដែរ។ ហេតុនេះប្រសិនបើអ្នកចង់ចៀសផុត ឬទប់ទល់ជាមួយបញ្ហាធ្លាក់ទឹកចិត្ត (depression) និងថប់បារម្ភ ចូរព្យាយាមរួមបញ្ចូលអាហារមានផ្ទុកសម្បូរទៅដោយវីតាមីន b12 ក្នុងរបបអាហារប្រចាំថ្ងៃ។

៣. ពង្រឹងសុខភាពខួរក្បាល

វីតាមីន b12 ជួយការពារកោសិកាខួរក្បាលដែលធ្វើឱ្យមុខងារនៃខួរក្បាលកាន់តែមានលក្ខណៈប្រសើរឡើង។ ប្រសិនបើអ្នកមានអារម្មណ៍ថាខ្សោយការចងចាំ ឬសមត្ថភាពនៃការចងចាំមានលក្ខណៈអន់ថយជាងមុន ចូរព្យាយាមទទួលទានអាហារមានផ្ទុកសម្បូរទៅដោយវីតាមីន b12។

៤. ពង្រឹងសុខភាពបេះដូង

នោះក៏ព្រោះតែវីតាមីន b12 ជួយកាត់បន្ថយអាស៊ីតអាមីណូ homocystein ក្នុងឈាម។ ការកើនឡើងខ្ពស់នៃ homocystein បង្កើនហានិភ័យនៃជំងឺបេះដូង។ អ្នកជំនាញផ្នែកសុខភាពច្រើនបាននិយាយថាវីតាមីន b12 ក៏ជួយទប់ស្កាត់ការកើនឡើងនៃកូឡេស្តេរ៉ូលមិនល្អ រួមទាំងបញ្ហាសម្ពាធឈាមឡើងខ្ពស់ដែលជួយរក្សាសុខភាពបេះដូងល្អប្រសើរផងដែរ។

៥. បង្កើនសុខភាពស្បែកនិងសក់

ដើម្បីរក្សាបាននូវស្បែកនិងសក់ស្រស់ស្អាតមានសុខភាពល្អនោះត្រូវប្រាកដថាអ្នកបានរួមបញ្ចូលអាហារមានផ្ទុកសម្បូរទៅដោយវីតាមីន b12 ក្នុងរបបអាហារប្រចាំថ្ងៃរួចហើយ។ នោះក៏ព្រោះតែវីតាមីន b12 គឺចាំបាច់សម្រាប់សុខភាពស្បែកនិងសក់៕