Join with Health.com.kh on Telegram

ការងូតទឹក គឺសំខាន់ណាស់ដើម្បីជួយពួកយើងឱ្យមានភាពស្អាតនិងទទួលបានការការពារ ហើយចៀសផុតបញ្ហាក្លិនខ្លួនមិនល្អ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាក៏ដោយ មានពេលខ្លះយើងមិនអាចឆ្លៀតពេលងូតទឹកបាន ឧទាហរណ៍កំឡុងពេលធ្វើដំណើរឆ្ងាយ។ ដូច្នេះថាតើធ្វើយ៉ាងណាទើបអាចរក្សាក្លិនខ្លួនប្រសើរពេលមិនបានងូតទឹក? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីទម្លាប់មួយចំនួនដែលជួយការពាររាងកាយពីក្លិនអាក្រក់ ៖

​១. ប្រើប្រាស់ប្រេង ឬឡេក្រអូប ​

ការប្រើប្រាស់ប្រេងក្រអូប ឬឡេក្រអូប គឺប្រសើរជាងការបាញ់ទឹកអប់ក្នុងករណីមិនអាចមានពេលងូតទឹក! នេះក៏ព្រោះតែប្រេង ឬឡេក្រអូបអាចជាប់ក្លិនលើស្បែកបានយូរជាង។ អ្នកក៏គួរចេះជ្រើសរើសប្រភេទនៃឡេ ឬប្រេងក្រអូនដែលមានក្លិនសមស្របមិនឈួលខ្លាំងពេកខុសក្លិនធម្មជាតិ។ ចូរព្យាយាមលាបឱ្យចូលសព្វនឹងស្បែក។

​២. ប្រើប្រាស់ក្រដាសសើមសម្រាប់ជូតកូនក្មេង ​

ក្រដាសសើមសម្រាប់ជូតកូនក្មេង គឺជាជម្រើសប្រសើរដែលអាចជួយឱ្យអ្នកមានអារម្មណ៍ថាស្អាតស្បែកនិងស្រស់ស្រាយ! នេះក៏ព្រោះតែក្រដាសសើមសម្រាប់ជូតក្មេងមានប្រសិទ្ធភាពកម្ចាត់បាក់តេរីនិងក្លិនមិនល្អ។ ​

៣. ប្រើប្រាស់ផលិតផលបំបាត់ក្លិនខ្លួនច្រើនស្រទាប់ ឬទ្វេដង

ការប្រើប្រាស់ផលិតផលបំបាត់ក្លិនខ្លួននឹងជួយកម្ចាត់ក្លិនញើស។ ហើយនៅពេលប្រើប្រាស់ច្រើនស្រទាប់ ឬទ្វេដងវាអាចបង្កើនប្រសិទ្ធភាពនិងកម្ចាត់បាក់តេរីបានប្រសើរជាងធម្មតា។

៤. ផ្លាស់ប្តូរខោអាវក្នុង

ការផ្លាស់ប្ដូរខោអាវក្នុងក៏អាចកាត់បន្ថយក្លិនមិនល្អដែលកើតមានចេញពីការបែកញើសច្រើនផងដែរ។

៥. ផ្លាស់ប្ដូរស្រោមជើង ​

ជើង គឺជាផ្នែកមួយនៃរាងកាយដែលងាយនឹងបែកញើសនាំឱ្យកើតមានក្លិនមិនល្អ។ ការផ្លាស់ប្ដូរស្រោមជើងទៀងទាត់នឹងជួយកាត់បន្ថយ ឬទប់ស្កាត់ក្លិនមិនល្អគួរឱ្យកត់សម្គាល់។ ដើម្បីជាការប្រសើរអ្នកគួររោយម្សៅបំបាត់ក្លិនខ្លះក្នុងស្បែកជើងមុននឹងពាក់។

៦. ចៀសវាងអាហារដែលមានខ្ទឹមស ខ្ទឹមបារាំង និងគ្រឿងទេសហឹរ

អាហារក៏ជះឥទ្ធិពលលើក្លិនខ្លួនផងដែរ! ដូច្នេះដើម្បីជាការប្រសើរចូរចៀសវាងទទួលទានអាហារដែលមានក្លិនខ្លាំងដូចជាខ្ទឹមស ខ្ទឹមបារាំង និងគ្រឿងទេសហឹរជាដើមកំឡុងពេលធ្វើដំណើរឆ្ងាយមិនអាចងូតទឹកបាន។ ចូរព្យាយាមទទួលទានបន្លែនិងផ្លែឈើជំនួសវិញ។

៧. ចៀសវាងស្លៀកពាក់រឹបតឹងពេក

សម្លៀកបំពាក់រឹបតឹងងាយនឹងធ្វើឱ្យបែកញើសត្រង់ផ្នែកខ្លះនៃរាងកាយដែលបង្កជាក្លិនមិនល្អ។ ដូច្នេះគួរជ្រើសរើសស្លៀកពាក់សម្លៀកបំពាក់រលុងៗ។

៨. រក្សាសំណើមនៃស្បែក ​

ការផ្ដល់សំណើមដល់ស្បែកក៏អាចជួយឱ្យរាងកាយមានក្លិនល្អស្រស់ស្រាយផងដែរ។ អ្នកគួរព្យាយាមទទួលទានទឹកឱ្យបានច្រើនគ្រប់គ្រាន់ ហើយកុំភ្លេចប្រើប្រាស់ក្រែមផ្ដល់សំណើមដល់ស្បែកផង៕