បន្ទាប់ពីដំណើរកម្សាន្តក្នុងពេលឈប់សម្រាកជាច្រើនថ្ងៃ ប្រិយមិត្តមួយចំនួនខ្លះប្រាកដជាចំណាយស្ទើរអស់ពីខ្លួន ឬ អស់លុយរលីង រហូតដល់ថ្នាក់ញ៉ាំមីកំប៉ុង ហើយត្រូវវិលមកធ្វើការចំពេលពាក់កណ្ដាលខែ ខណៈប្រាក់ខែមិនទាន់បើក។ ថ្ងៃនេះ Sabay សូមចែករំលែកវិធីសាស្ត្រពីអ្នកមានបទពិសោធន៍ក្នុងការចាយលុយត្បិតត្បៀត ស្របពេលដាច់លុយ។
១. មានលេសសមហេតុផល
លោក សិលា បុគ្គលិក Part-time ហាងកាហ្វេមួយសល់លុយតែ ៣០ដុល្លារ ក្រោយដំណើរកម្សាន្តពីកំពតរួច បានប្រាប់ ខ្លួនសំបូរមិត្តភក្តិហៅទៅញ៉ាំអីក្រៅ ដើរលេងញឹកញាប់ តែពេលដាច់លុយម្ដងៗ គេតែងប្រាប់មិត្តភក្តិថារវល់ជូនម៉ាក់ទៅនេះទៅនោះ ខកខានមិនអាចជួបបានទេ ឬម្យ៉ាងអាចបិទទូរស័ព្ទចោលមួយរយៈសិន ឬអាចលើកពេលណាត់ជួបក៏បាន។
២. បើចាំបាច់ខ្លាំង អាចខ្ចីលុយគេខ្លះ ប៉ុន្តែកុំលើសពី ៥០ដុល្លារ
ប្អូនស្រី មិនា ជាបុគ្គលិកក្រុមហ៊ុនឯកជនមួយលើកឡើងថាក្នុងខែឧសភានេះសំបូរថ្ងៃឈប់សម្រាក ចឹងមិនអាចទប់អារម្មណ៍មិនឲ្យដើរលេងបានទេ ស្របពេលដែលត្រឡប់មកវិញ ត្រូវទៅចូលរួមមង្គលការមិត្តជិតស្និទ្ធិទៀត ហេតុនេះត្រូវគិតទុកមុនឲ្យហើយថាត្រូវខ្ចីលុយគេសាកួរបន្ថែមប៉ុន្មាន តែមិនត្រូវលើសពី ៥០ដុល្លារទេ ព្រោះអាចមិនសល់លុយនៅខែបន្ទាប់ទៀត។
៣. លុបចោលរាល់ការចំណាយមិនចាំបាច់
សិលា ខាងលើ បន្ថែមថា ត្រូវវិភាគមើលទំហំទឹកប្រាក់ និងរយៈពេលដែលត្រូវបន្តដង្ហើមចង្រិត បើវិភាគទៅឃើញថា លុយដែលនៅសល់ទាំងប៉ុន្មាន អាចចាយមិនគ្រប់ រាល់ការចំណាយមិនចាំបាច់ផ្សេងៗត្រូវលប់ចោលទាំងអស់។ ការចំណាយមិនចាំបាច់ទាំងនោះរួមមាន ទម្លាប់ញ៉ាំបាយក្រៅផ្ទះ មើលកុន ទិញសំលៀកបំពាក់ សម្ភារៈនិយម សេវាអ៊ីនធើណេត ទាំងនេះត្រូវលុបបំបាត់ទាំងអស់។ ដូច្នេះអាចបន្តដង្ហើមចង្រិត ចាំដល់ថ្ងៃបើកលុយតទៅទៀត។
៤. ទិញអាហារសំខាន់ៗទុក
ចំណែក រមនា និស្សិតបញ្ចប់ការសិក្សានៅសាកលវិទ្យាល័យបៀលប្រាយ វិញលើកឡើងថា អាហារសំខាន់ៗ ត្រូវចាំបាច់ស្ដុកទុក ពេលដឹងជិតដាច់លុយនោះ មានដូចជា សាច់ប្រឡាក់ ត្រីប្រឡាក់ ទិញត្រីខ និងបន្លែខ្លះទុក។ ដូច្នេះពេលជិតដាច់លុយក៏មិនសូវព្រួយបារម្ភដាច់បាយដែរ ម្ហូបនៅផ្ទះមានស្រាប់ហើយ ឱ្យតែមានអង្ករច្រកឆ្នាំង។ ក្រៅពីនោះលុយសល់តិចតួចទុកចាក់សាំង ទៅធ្វើការបានហើយ កុំទៅចំណាយអ្វីក្រៅពីនឹងទៀតដាច់ខាត។
៥. បែកចែកលុយចាយនៅសល់
ដោយឡែក កញ្ញា មិនា ប្រាប់ថា ត្រូវបែងចែកកញ្ចប់លុយសម្រាប់ចំណាយឱ្យច្បាស់លាស់ ត្រូវយកចំនួនលុយ ទៅចែកនឹងថ្ងៃដែលនៅសល់។ ប្រសិនបើលុយសល់ ២០ម៉ឺនរៀល ចំណែកថ្ងៃដែលត្រូវចាយគឺ ២០ថ្ងៃ។ ដូច្នេះធ្វើយ៉ាងម៉េច កុំឱ្យចាយលើសពី ១ម៉ឺនរៀលឱ្យក្នុងមួយថ្ងៃ បើមិនដូច្នោះទេ ប្រាកដជាអត់លិឍហើយ។
៦. កុំតាមដានអាហារលើអនឡាញ
កញ្ញា មិនា ដដែលបន្តថា ស្របពេលដាច់លុយ ប្អូនតែងតែអូសរំលងអាហារនៅលើ បណ្ដាញសង្គម Facebook ព្រោះបើមិនអញ្ចឹងទេ វាអាចទាក់ទាញអារម្មណ៍ឲ្យចង់ញ៉ាំ និងស្វែងរកកន្លែងញាំឲ្យទាល់តែបាន៕
ប្រភព៖ sabay.com.kh