មានមធ្យោបាយញឹកញាប់ និងងាយស្រួលច្រើនណាស់ដែលអាចបង្ការជំងឺដាច់សរសៃឈាមខួរក្បាលបាន ហើយក៏ពង្រឹងដល់សុខភាពទាំងមូលបានថែមទៀត។ ការញ៉ាំអាហារ និងទម្លាប់ប្រចាំថ្ងៃដើរតួនាទីសំខាន់ណាស់ក្នុងការកំណត់ថា អ្នកកំពុងតែប្រឈមនឹងជំងឺគ្រោះថ្នាក់សរសៃឈាមខួរក្បាលឬអត់។ ខាងក្រោមនេះ ខ្ញុំសូមណែនាំវិធី ៥យ៉ាងដែលអ្នកជំនាញខាងអាហារូបត្ថម្ភបានណែនាំក្នុងការបង្ការជំងឺគ្រោះថ្នាក់សរសៃឈាមខួរក្បាល៖
ជ្រើសរើសកាបូអ៊ីដ្រាតដែលត្រឹមត្រូវ
មិនមែនកាបូអ៊ីដ្រាតទាំងអស់សុទ្ធតែមានលក្ខណៈល្អដូចគ្នាដែលអាចបង្ការជំងឺបេះដូងសរសៃឈាម និងគ្រោះថ្នាក់សរសៃឈាមខួរក្បាលទាំងអស់ឡើយ។ អាហារដែលផ្ទុកទៅដោយជាតិសសៃ បន្លែស្រស់ៗ គ្រាប់ធញ្ញជាតិ និងបន្លែ គឺជាឧទាហរណ៍ដ៏ល្អហើយដែលផ្តល់សុខភាពល្អ ព្រមទាំងកាបូអ៊ីដ្រាតមិនកៃឆ្នៃផងដែរ។ យកល្អគួរតែព្យាយាមចៀសវាងការញ៉ាំអាហារណាដែលធ្វើពីកាបូអ៊ីដ្រាតកៃឆ្នៃដូចជា ស្ករគ្រាប់ ភេសជ្ជៈ ការ៉េម សូកូឡា និងនំដុតមានជាតិផ្អែមជាដើម ព្រោះអាហារទាំងនេះនឹងធ្វើឲ្យជាតិស្ករក្នុងឈាមឡើងខ្ពស់ រហូតដល់បង្កគ្រោះថ្នាក់ដល់សរសៃឈាមអាក់ទែរបស់បេះដូង និងខួរក្បាលបាន។
ញ៉ាំអាហារផ្តល់សុខភាព
ការញ៉ាំបន្លែ និងផ្លែឈើស្រស់ៗច្រើនមានជាប់ទាក់ទងនឹងការថយចុះការប្រឈមនឹងជំងឺសរសៃឈាមបេះដូង និងគ្រោះថ្នាក់សរសៃឈាមខួរក្បាលបាន។ រុក្ខជាតិសម្បូរថាមពលទាំងនេះគឺជាប្រភពនៃជីវជាតិសំខាន់ៗដូចជា ជាតិរ៉ែ (ម៉ាញ៉េស្យូម និងប៉ូតាស្យូម) វីតាមីន ជាតិសរសៃ និង Phytonutrients (សារធាតុបំពាក់ពណ៌ដល់បន្លែនិងផ្លែឈើ ដែលដើរតួនាទីជាអង់ទីអុកស៊ីដង់)។ អាហារទាំងនេះមានជាតិខ្លាញ់ទាប និងមិនមានជាតិប្រៃ និងស្ករអ្វីច្រើនឡើយ។
ហាត់ប្រាណទៀងទាត់
ការដែលមិនបានហាត់ប្រាណគ្រប់គ្រាន់មានជាប់ទាក់ទងនឹងបញ្ហាសុខភាពជាច្រើនដោយក្នុងនោះមានតែគ្រោះថ្នាក់សរសៃឈាមខួរក្បាលថែមទៀតផង។ ការហាត់ប្រាណប្រហែលជាជួយបង្ការជំងឺគ្រោះថ្នាក់សរសៃឈាមខួរក្បាលបានតាមរយៈជួយបន្ថយកត្តាប្រឈមមុខរួមទាំង ការធាត់ជ្រុល និងលើសសម្ពាធឈាមទៀត។ យោងទៅតាមការណែនាំលើការបង្ការជំងឺគ្រោះថ្នាក់សរសៃឈាមខួរក្បាលចុងក្រោយបំផុតបានឲ្យដឹងថា មនុស្សវ័យកណ្តាលមានសុខភាពល្អ គួរតែព្យាយាមហាត់ប្រាណកម្រិតមធ្យមទៅខ្លាំងក្លាយ៉ាងហោចណាស់ ៤០នាទី រយៈពេល ៣ ទៅ ៤ថ្ងៃក្នុងមួយសប្តាហ៍។
សម្រកទម្ងន់
ការធាត់ជ្រុល និងមានផលវិបាកទាក់ទងនឹងរឿងនេះ (ជំងឺទឹកនោមផ្អែម និងលើសសម្ពាធឈាម) អាចធ្វើឲ្យប្រឈមនឹងជំងឺគ្រោះថ្នាក់សរសៃឈាមខួរក្បាលបាន។ ដូច្នេះ បើសិនជាអ្នកធាត់ហើយ ការសម្រកទម្ងន់តិចតួចត្រឹម ៥គីឡូក្រាម ក៏អាចបន្ថយការប្រឈមមុខនេះបានដែរ។
ពិនិត្យមើលកម្រិតកូឡេស្តេរ៉ុលក្នុងឈាម
ការដែលមានកូឡេស្តេរ៉ុលក្នុងឈាមច្រើនពេកអាចបណ្តាលឲ្យស្ទះក្នុងសរសៃឈាមអាក់ទែ និងនាំឲ្យកើតជំងឺគ្រោះថ្នាក់សរសៃឈាមខួរក្បាល និងគាំងបេះដូងបាន។ ចូរតាមដានកូឡេស្តេរ៉ុលក្នុងឈាមដូចខាងក្រោមនេះ៖
- កូឡេស្តេរ៉ុលសរុប៖ ត្រូវក្រោម ២០០mg/dL
- កូឡេស្តេរ៉ុលអាក្រក់ LDL៖ ត្រូវក្រោម ១០០mg/dL
- កូឡេស្តេរ៉ុលល្អ LDL៖ ត្រូវលើសពី ៦០mg/dL
បើសិនជារបបអាហារផ្តល់សុខភាព និងការហាត់ប្រាណមិនគ្រប់គ្រាន់ក្នុងការថែរក្សាកម្រិតកូឡេស្តេរ៉ុលនេះទេ ចូរពិគ្រោះជាមួយគ្រូពេទ្យអំពីការប្រើប្រាស់ថ្នាំដែលត្រឹមត្រូវផង៕