ភ្នំពេញ៖ មានការភ្ញាក់ផ្អើលមួយដោយមហាជននិងអ្នកគាំទ្រជាច្រើនឃើញវត្តមានលោក ព្រាប សុវត្ថិ តារាចម្រៀងកំពូលប្រចាំផលិតកម្មហង្សមាស នៅក្នុងក្លឹបកម្សាន្ត 2ND ទើបតែបើកថ្មី មួយក្បែរវិមានឯករាជ្យ ខណៈភរិយាក៏មានមុខតាមទាន់លោកនៅក្នុងនោះដែរបង្កការងើយឆ្ងល់។
អ្នកគាំទ្រនិងក្រុមអ្នកសារព័ត៌មាន ស្មានតែភរិយាលោកតាមមើលប្តីដើរលេង ការពិតប្រពន្ធលោក ព្រាប សុវត្ថិ មកជូនប្តីនិងមើលថែកូន ដែលមកច្រៀងអបអរពិធីសម្ពោធបើកក្លឹបកម្សាន្ត 2 ND សោះ ខណៈមហាជនងឿយឆ្ងល់ ពីព្រោះលោក មានទម្លាប់មិនទទួលច្រៀងឬបង្ហាញក្នុងក្លឹបកម្សាន្តរាត្រី អស់រយៈពេលជាច្រើនមកហើយ។
ជាមួយគ្នានោះអ្នកនាង ឡុង ស្រីមុំ បង្ហាញមុខចំពោះអ្នកកាសែតឱ្យដឹងថា អ្នកនាងមិនមែនប្រច័ណ្ឌ ឬ ហួងហែងលោក ព្រាប សុវត្ថិ នោះទេ ប៉ុន្តែវត្តមានរបស់អ្នកនាងដើម្បីស្វាមី និងផ្តល់ភាពកក់ក្តៅជូនកូនៗ ដោយសារតែសម្លៀកបំពាក់ គ្រឿងតុបតែងខ្លួន គឺអ្នកនាងជាអ្នករៀបចំទាំងអស់ទាំងមុនច្រៀង និងក្រោយច្រៀងចប់។ ម្យ៉ាងអ្នកនាងត្រូវតែមើលការងារកូនប្រុសទាំងបីអ្នកនាង ឱ្យបានល្អពេលចេញច្រៀងជាមួយឪពុក ខណៈកូនប្រុសអ្នកនាងកាន់តែមានប្រជាប្រិយភាពចូលក្នុងវិស័យសិល្បៈដែរនោះ។ ដូច្នេះសម្លៀកបំពាក់ និងគ្រឿងតុបតែងខ្លួនរបស់អ្នកទាំងកូន ៣ និងស្វាមីអ្នកនាង ត្រូវសមនិងល្អ។ នេះហើយដែលជាហេតុផលនាំឱ្យអ្នកនាងដែលជាភរិយា និង ជាម្តាយ តែងតែដើរតាមលោកព្រាប សុវត្ថិ បើទោះបីជាចូលក្លឹបកម្សាន្តទាំងកណ្តាលយប់ក៏ដោយ។
សូមបញ្ជាក់ថា លោក ព្រាប សុវត្ថិ ត្រូវគេឃើញច្រៀងកូរក្នុងក្លិប បន្ទាប់ពីបង្ហាញវត្តមានឈរកាត់ខ្សែបូរណ៍ ខណៈដែលពេលដែលលោកបកស្រាយបទចម្រៀង គឺទោះជាបទទាំងនោះត្រូវបានគេស្ដាប់ឡើងស៊ាំត្រចៀកទៅហើយក្ដី ក៏អ្នកគាំទ្រនៅតែកញ្ជ្រោលនឹងការគាំទ្រចំពោះលោករហូតដល់ចប់។
លោកបានឱ្យក្រុមអ្នកសារព័ត៌មានឱ្យដឹងថា ខ្លួនលោកមិនសូវមានចំណូលចិត្តក្នុងការបង្ហាញខ្លួនចេញច្រៀងតាំងក្លិបរាត្រីនោះទេ ប៉ុន្តែបណ្ដាលមកពីម្ចាស់ក្លិបសុទ្ធតែមានទំនាក់ទំនងស្គាល់លោកជាយូរមកហើយ ទើបលោកទទួលច្រៀង។ ប៉ុន្តែ លោកទទួលស្គាល់ថាចំពោះតម្លៃក៏ត្រូវតែខ្ពស់ផងដែរ ដោយសារតែពេលលោកចេញច្រៀងបែបនេះម្ដងៗ ក៏ត្រូវចំណាយលើក្រុមការងារ ក្រុមរាំ និងត្រូវទទួលបាននូវកម្រៃអោយសមនឹងតម្លៃដែលលោកគឺជាតារាចម្រៀងម្នាក់របស់ហង្សមាស។
លោក ចេង វណ្ណា ម្ចាស់ភាគហ៊ុននធំមួយប្រចាំក្លិប 2ND បានអះអាងថា ការបង្ហាញខ្លួនរបស់លោក ព្រាប សុវត្ថិ ក្នុងពិធីបើកសម្ពោធផ្លូវការរបស់ក្លិបនោះ មានតម្លៃមិនថោកនោះទេ តែលោកបដិសេធទម្លាយអោយដឹងពីតួលេខនៃទឹកប្រាក់ ដោយលោកបញ្ជាក់ថាជាកិច្ចព្រមព្រៀង និងថាអាចប្រាប់បានត្រឹមច្រើនពាន់ដុល្លារ ដោយគ្រាន់តែបង្ហាញខ្លួនមិនដល់មួយម៉ោងនោះ។ លោកថាព្រាប សុវត្ថិ ត្រូវបានអញ្ជើញអោយចូលរួមក្នុងពិធីកាត់ខ្សែបូរ និងច្រៀងរាំប្រមាណជា៤បទប៉ុណ្ណោះ ដើម្បីជាកិត្តិយសរបស់ក្លិប តែដោយសារតែលោកគឺជាតារាល្បី ហើយក៏បានដឹកនាំក្រុមរាំអោយមកច្រៀងឡើងកក្រើកក្នុងរាត្រីនោះផង ទើបស័ក្ដសមនឹងខ្ទង់ពាន់ដុល្លារដែលលោកត្រូវបាន។
ម្ចាស់ភាគហ៊ុននធំមួយប្រចាំក្លិប 2ND បានបញ្ជាក់ថា លោកនៅតែចាត់ទុកថាវត្តមានរបស់លោកព្រាប សុវត្ថិ គឺជាមុខមាត់របស់ក្លិបដ៏ធំ ដោយសារតែតារាចម្រៀងរូបនេះ កម្រទទួលច្រៀងតាមក្លិបរាត្រីខ្លាំងណាស់ ចាប់តាំងពីលោកឡើងកូដ និងមានទីផ្សារវ៉ាដាច់តារាចម្រៀងលំបាប់ប្រទេសផ្សេងទៀត។ នៅក្នុងពិធីសម្ពោធទ្រង់ទ្រាយធំនោះ លោកថាបានអញ្ជើញតារាសិល្បៈច្រើននាក់ ហើយលោកក៏មានអារម្មណ៍សប្បាយចិត្តណាស់ដែរ ដែលឃើញវត្តមានតារាសិល្បៈយ៉ាងច្រើនកុះករចូលរួមក្នុងពិធីសម្ពោធនាយប់នោះ៕
ប្រភព៖ rasmeinews.com