ខាងក្រោមនេះ យើងខ្ញុំនឹងបង្ហាញអ្នកពីវិធីដែលអាចជួយអ្នកបានក្រោយពេលដែលធូលីចូលភ្នែក ឬសត្វចូលភ្នែក។ តើមានវិធីសង្គ្រោះបែបណាទៅ?

នៅពេលដែលមានរបស់អ្វីមួយចូលភ្នែក នោះភ្នែកអ្នកនឹងអាចប្រតិកម្មយ៉ាងលឿន ដោយអាចការពារខ្លួនឯង។ ដូចនេះ នៅពេលដែលមានរបស់ចូលភ្នែក អ្នកមិនគួរយកដៃអ្នកទៅញីភ្នែកភ្លាមនោះទេ ព្រោះវាអាចបំផ្លាញភ្នែកអ្នកយ៉ាងងាយ។ វិធីដ៏ល្អ អ្នកគួរតែបិទភ្នែកជាមុនសិន ដោយទុកឲ្យទឹកភ្នែកចាប់ផ្តើមចេញ ទើបអ្នកអាចបើកភ្នែកសន្សឹមៗឡើងវិញ។ ក្រោយពេលដែលបើកសន្សឹមៗរួច អ្នកអាចព្រិចភ្នែកប៉ុន្មានដង ដើម្បីឲ្យទឹកភ្នែកសម្អាតរបស់ទាំងនោះ ឲ្យហូរចេញមកពីភ្នែក។ ប៉ុន្តែបើរបស់ទាំងនោះនៅតែមិនទាន់ចេញពីភ្នែក អ្នកអាចរកគ្រូពេទ្យដើម្បីជួយអ្នកបាន ព្រោះបើទុកយូរពេក អាចប៉ះពាល់ដល់សុខភាពភ្នែករបស់អ្នកបានយ៉ាងងាយ៕