នៅពេលដែលអ្នកដឹងថា អ្នកកំពុងតែបែកទឹកភ្លោះហើយ អ្នកគួរតែអនុវត្តតាមវិធីខាងក្រោមនេះ ដើម្បីចៀសពីគ្រោះថ្នាក់។ តើមានអ្វីខ្លះ?
1. នៅពេលដែលអ្នកបែកទឹកភ្លោះភ្លាម មិនថាអ្នកផ្ទះ ឬក៏អ្នកម្តាយទេ គួរតែរក្សាចិត្តឲ្យស្ងប់ ដោយមិនភិតភ័យ ហើយរក្សាសតិឲ្យនឹងនរ។ បន្ទាប់មក ដើម្បីកុំឲ្យទងសុកកូនធ្លាក់ចុះ អ្នកគួរតែឲ្យអ្នកម្តាយគេង ហើយយកខ្នើយ ឬខោអាវមកទ្រពីក្រោមគូថ។
2. បន្ទាប់មកទៀត ដើម្បីរក្សាកុំឲ្យមេរោគចូលទៅក្នុងរាងកាយ អ្នកម្តាយគួរតែយកសម្លីអនាម័យទ្រពីក្រោម។ ប៉ុន្តែបើទឹកភ្លោះចេញខ្លាំង អ្នកគួរតែរកកន្សែងមួយដែលស្អាត ហើយសម្លាប់មេរោគរួច យកមកទ្រពីក្រោមយោនី ដើម្បីការពារមេរោគកុំឲ្យជ្រាតចូលឲ្យសោះ។ ជាពិសេស អ្នកមិនគួរចូលទៅងូតទឹកទៀតទេ។
3. នៅពេលដែលអ្នកកើតមានអាការៈបែកទឹកភ្លោះ អ្នកគួរតែដឹកអ្នកម្តាយទៅមន្ទីរពេទ្យភ្លាម ទោះជាមិនទាន់ដល់ខែ ឬស្បូនមិនទាន់បើកក៏ដោយ ក៏អ្នកគួរតែទៅមន្ទីរពេទ្យជាបន្ទាន់ដែរ។ មិនថាអ្នកហៅឡានពេទ្យ ឬប្រើឡានខ្លួនឯងទេ អ្នកគួរតែឲ្យអ្នកម្តាយគេង ហើយដាក់អីទ្រពីក្រោមគូថ ទើបមិនធ្វើឲ្យទឹកភ្លោះនោះហូរអស់មុនទៅដល់មន្ទីរពេទ្យ៕