ពេលខ្លះអ្នកគួរស្តាប់ម្តាយប្រសិនបើគាត់ប្រាប់ថាមិនចូលចិត្តមិត្តប្រុសរបស់អ្នក ក៏ព្រោះវាអាចមានមូលហេតុនៅពីក្រោយនោះ! នៅពេលដែលអ្នកស្រលាញ់នរណាម្នាក់ហើយត្រូវម្តាយរបស់អ្នកបដិសេធ វាពិតជារឿងដែលខូចចិត្តបំផុត ហើយអ្នកអាចគិតថាម្តាយរបស់អ្នកមិនខ្វល់ពីក្តីសុខ ឫយល់ពីអ្នកសោះ ក៏ប៉ុន្តែប្រសិនបើអ្នកគិតឱ្យស៊ីជម្រៅបន្តិចទៀតអ្នកនឹងដឹងថាពួកគាត់ស្រលាញ់និងខ្វល់ពីអ្នកជាងនរណាៗទាំងអស់នៅក្នុងលោក។ ថ្ងៃនេះវេបសាយសុខភាព (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នឹងបង្ហាញពីមូលហេតុដែលអ្នកគួរពិចារណាស្តាប់តាមសម្តីម្តាយនៅពេលដែលគាត់មិនគាំទ្រក្នុងទំនាក់ទំនងស្នេហាអ្នកនិងសង្សារ៖
១. ពេលអ្នកធ្លាក់ក្នុងអន្លង់ស្នេហ៍ ការគិតរបស់អ្នក គឺពុំសូវវែងឆ្ងាយឡើយ
នៅពេលដែលយើងងប់ងល់ស្នេហាពេកវានឹងអាចនាំឱ្យមានការសម្រេចចិត្តខុសជាមិនខាន។ ធ្លាប់ដឹងទេថាការវិនិច្ឆ័យនិងការគិតរបស់អ្នកដែលមានស្នេហាច្រើនតែមិនសូវច្បាស់និងវែងឆ្ងាយឡើយ? ដូច្នេះទើបពេលខ្លះអ្នកគួរស្ដាប់ហេតុផលរបស់ម្ដាយខ្លួន។ លើសពីនេះទៅទៀតម្តាយរបស់អ្នក គឺជាមនុស្សដែលស្និទ្ធស្នាលនិងស្គាល់ពីអ្នកជាងគេ ហើយគាត់អាចមានសមត្ថភាពដឹងថាអ្នកកំពុងស្ថិតនៅក្នុងស្ថានភាពគ្រោះថ្នាក់ ឬអត់។
២. ព្យាយាមស្វែងយល់ពីគំនិតរបស់ម្តាយ ប្រសើរជាងការឈ្លោះប្រកែកជាមួយគាត់
ត្រូវចាំថាក្រៅពីផ្តល់កំណើតដល់អ្នក ហើយចិញ្ចឹមបីបាច់អ្នកយ៉ាងល្អបំផុតហើយនោះម្ដាយរបស់អ្នកក៏នៅតែជួយគាំទ្រនិងចង់ឱ្យអ្នកទទួលបានអ្វីដែលល្អបំផុត ជានិច្ច។ ដឹងទេ? គាត់តែងខ្លាចថាអ្នកអាចនឹងជួបជាមួយមនុស្សមិនល្អដែលធ្វើឱ្យអ្នកខូចចិត្ត ហើយត្រូវយំធ្វើបាបខ្លួនឯង! ដូច្នេះហើយទើបគាត់ព្យាយាមធ្វើគ្រប់បែបយ៉ាងនិងប្រាប់អ្នកថាគួរ ឬមិនគួរសេពគប់អ្នកណាដើម្បីការពារអ្នកពីរឿងទាំងអស់នេះ។
៣. ញ្ញាណរបស់ម្តាយ គឺវិសេសវិសាលបំផុត
ប្រសិនបើម្តាយរបស់អ្នកប្រាប់ថាគាត់មានអារម្មណ៍មិនស្រួល ឬមិនល្អចំពោះមនុស្សដែលអ្នកទាក់ទង គឺវាអាចមកពីញ្ញាណរបស់គាត់ជាអ្នកប្រាប់! ហើយជាញឹកញយច្រើនតែត្រូវ។ លើសពីនេះទៅទៀតអ្នកត្រូវចាំថា ម្តាយរបស់អ្នកក៏ធ្លាប់ជាក្មេងស្រីម្នាក់ដែរ ហើយគាត់ប្រហែលជាធ្លាប់ឆ្លងកាត់រឿងរ៉ាវខូចចិត្ត បែកបាក់ស្នេហាច្រើន ដូច្នេះទើបគាត់មិនចង់ឱ្យជួបរឿងរ៉ាវរញ៉េរញ៉ៃដូចគាត់។
៤. គាត់គិតថាអ្នកគួរទទួលបាន ឬជួបមនុស្សល្អជាងនេះ
សម្រាប់ម្តាយ កូនៗរបស់ពួកគាត់ គឺជាកាដូដ៏វិសេសវិសាលនិងមិនអាចកាត់ថ្លៃបានឡើយ! អ្នកខ្លួនឯងប្រហែលជាមិនដឹងទេថាខ្លួនឯងមានតម្លៃនិង អស្ចារ្យប៉ុណ្ណា ប៉ុន្តែម្ដាយរបស់អ្នកដឹង។ មូលហេតុដែលគាត់បដិសេធមិនឱ្យអ្នកទាក់ទងស្នេហាជាមួយមិត្តប្រុសអាចមកពីគាត់គិតថាអ្នកសមនឹងទទួលបាន ឬជួបមនុស្សដែលល្អជាងនេះ។ ប្រសិនបើអ្នកច្បាស់ថាមិត្តប្រុសរបស់អ្នកគឺល្អត្រឹមត្រូវសម្រាប់អ្នកហើយនោះ ចូរស្ងប់អារម្មណ៍និងព្យាយាមពន្យល់ប្រាប់ម្ដាយរបស់អ្នកថាគេល្អដូចម្ដេចខ្លះ ឬបែបណា? ហើយគេអាចធ្វើឱ្យអ្នកសប្បាយចិត្តបានយ៉ាងណា ឬប៉ុណ្ណា? ប្រសិនបើម្ដាយអ្នកគាត់មើលឃើញបែបនោះដែរ គាត់នឹងមិនប្រកែកធ្វើឱ្យអ្នកពិបាកចិត្ត ឬត្រូវជួបរឿងមិនល្អក្នុងជីវិតឡើយ៕