តើអ្នកធ្លាប់គិតថា ជ្រើសរើសយកការដើរគឺជាផ្នែកមួយនៃទម្លាប់ពេលព្រឹកដែរទេ? តើអ្នកមានគិតថា ចង់យកការដើរជំនួសឲ្យការជិះរថយន្តទៅធ្វើការដែរទេ? អ្នកប្រហែលជាមិនបានយល់ថា ការដើរគឺជាការហាត់ប្រាណឡើយ ប៉ុន្តែវាពិតជាមានប្រយោជន៍របស់វាណាស់។ គ្រាន់តែការដើរធម្មតាៗរយៈពេល ៣០នាទីក្នុងមួយថ្ងៃ គឺអាចជួយឲ្យអ្នកទទួលបានប្រយោជន៍ជាច្រើនលើសពីការរំពឹងទុកទៅទៀត។ តើវាមានអ្វីខ្លះទៅ?
បង្កើនការរំលាយអាហារ
នៅពេលអ្នកដើររាល់ថ្ងៃ អ្នកនឹងធ្វើឲ្យការរំលាយអាហារក្នុងខ្លួនកាន់តែល្អ ដែលមានន័យថា ជាតិខ្លាញ់ក្នុងខ្លួនកាន់តែច្រើនត្រូវបានរំលាយចេញ។ ការដើរញ៉ាប់អាចជួយឲ្យចង្វាក់បេះដូងកើនឡើង ដូច្នេះវា នឹងធ្វើឲ្យខ្លាញ់កាន់តែច្រើនរំលាយដើម្បីបង្កើតជាថាមពល។ សម្រាប់អ្នកដែលចំណាយពេល ៣០នាទីលើការដើរ ពិតជាមានប្រយោជន៍ចំពោះការថែរក្សាទម្ងន់។
បន្ថយការកើតជំងឺបេះដូង
អត្ថប្រយោជន៍ផ្សេងមួយទៀតគឺថា អ្នកអាចរីករាយនឹងការដើរ ដោយសារតែវាជួយបន្ថយការប្រឈមនឹងជំងឺបេះដូងដូចជា ជំងឺដាច់សរសៃឈាមខួរក្បាល និងលើសសម្ពាធឈាមបាន។ ការដើរនឹងជួយសម្រួលដល់សម្ពាធឈាម តាមរយៈបង្កើនរបត់ឈាមរត់។ វាអាចជួយឲ្យកូឡេស្តេរ៉ុលអាក្រក់ក្នុងឈាមថយចុះ និងបង្កើនកូឡេស្តេរ៉ុលល្អវិញ។
បង្ការជំងឺពុកឆ្អឹង
អត្ថប្រយោជន៍មួយទៀតនៃការដើរ ៣០នាទីក្នុងមួយថ្ងៃ គឺអាចជួយបង្ការជំងឺពុកឆ្អឹង។ នៅពេលអ្នកដើរ អ្នកនឹងភ្ញោច និងពង្រឹងដល់ឆ្អឹងដើម្បីជួយបង្កើនកំហាប់របស់ឆ្អឹង។ ការដើរគឺជារឿងដ៏ល្អណាស់សម្រាប់ស្រ្តីដែលមានបញ្ហាពុកឆ្អឹងនៅពេលរ៉ាំងរដូវ ហើយវាក៏ជាការប្រឈមនឹងជំងឺពុកឆ្អឹងដែរ។
បន្ថយការប្រឈមនឹងជំងឺជាច្រើនប្រភេទ
ការសិក្សាជាច្រើនបានបង្ហាញថា អ្នកដែលដើរយ៉ាងហោចណាស់ ៣០នាទីក្នុងមួយថ្ងៃទំនងជាមិនងាយកើតជំងឺទឹកនោមផ្អែម មហារីកច្រើនប្រភេទ និងជំងឺហឺតឡើយ។ បើសិនជាអ្នកមានទម្លាប់ហាត់ប្រាណ ចូរប្រើប្រាស់ការដើផងទៅ នោះ អ្នកនឹងកាន់តែអាចទប់ស្កាត់ជំងឺមហារីកជាច្រើនដូចជា មហារីកសុដន់ ពោះវៀនធំ នោងស្បូនជាដើម៕