បុរសដែលជាប់ចោទពីបទសម្លាប់ប្រពន្ធមានផ្ទៃពោះ និងកូនស្រីពីរនាក់របស់ខ្លួន ហើយបន្ទាប់ មកធ្វើពុតជាអំពាវនាវយ៉ាងរំជួលចិត្តតាមទូរទស្សន៍បួងសួងសុំឱ្យពួកគេត្រឡប់មកវិញដោយសុវត្ថិភាព បានចូលខ្លួនទៅតុលាការជាលើកដំបូង។
ជនជាប់ចោទ គ្រីស្តូហ្វើ វែតស៍ (Christopher Watts) អាយុ ៣៣ឆ្នាំត្រូវបាននាំខ្លួនចូល សាលសវនាការនៅតំបន់វែល (Weld) រដ្ឋខូឡូរ៉ាដូ សហរដ្ឋអាម៉េរិក កាលពីថ្ងៃព្រហស្បតិ៍ ទី១៦ ខែសីហា។ សំណើសុំនៅក្រៅឃុំបណ្តោះអាសន្នរបស់ជននេះត្រូវបានច្រានចោលអំឡុងពេលចូល ខ្លួន។
សាកសពស្ត្រីជាប្រពន្ធឈ្មោះ ស្សាណាន់ វែតស៍ (Shanann Watts) អាយុ ៣៤ ឆ្នាំត្រូវបាន រកឃើញកាលពីព្រឹកថ្ងៃព្រហស្បតិ៍នៅការដ្ឋានប្រេងនិងឧស្ម័នជាកន្លែងដែលជនសង្ស័យធ្វើការក្បែរផ្ទះរបស់ពួកគេនៅក្រុងហ្វ្រេដឺរីក(Frederick)។ចំណែកឯសាកសពកូនស្រីទាំងពីរឈ្មោះ បេឡា (Bella) អាយុ បួនឆ្នាំ និង សេឡេស (Celeste) អាយុ បី ឆ្នាំត្រូវបានរកឃើញនៅរសៀល ថ្ងៃដដែលកកន្លែងតែមួយ។
ជនសង្ស័យមិនបាននិយាយអ្វីឡើយពេលសមត្ថកិច្ចនាំខ្លួនចូលសាលសវនាការដោយភាគច្រើនឱនមុខចាំស្តាប់។
ថ្វីដ្បិតមិនទាន់មានការចោទប្រកាន់ផ្លូវការក្តី ក៏ជននេះអាចនឹងប្រឈមបទចោទប្រកាន់បីករណី ពីបទមនុស្សឃាតនិងបីករណីទៀតពីបទបំភាន់ភ័ស្តុតាង។ ចៅក្រម ម៉ាសេឡូ ខបខូវ (Marcelo Kopcow) បានប្រាប់ឱ្យរដ្ឋអាជ្ញាដាក់ការចោទប្រកាន់ជាផ្លូវការនៅថ្ងៃច័ន្ទ ទី២០ ខែសីហា ហើយកំណត់បើកសវនាការនៅថ្ងៃអង្គារ ទី២១ ខែដដែលដើម្បីពិនិត្យមើលបទចោទប្រកាន់ លើជនសង្ស័យ។
រដ្ឋអាជ្ញានិយាយថា ពួកគេជឿថា ស្ត្រីជាម្តាយ និងកូនៗត្រូវបានឃាតករសម្លាប់នៅក្នុងផ្ទះ របស់ពួកគេ ហើយសាកសពត្រូវបានយកចេញពីផ្ទះជាក្រោយ។ ទោះជាយ៉ាងណាមូលហេតុ នៃឃាតកម្មដ៏រន្ធត់នេះមិនទាន់លាតត្រដាងជាសាធារណៈនៅឡើយទេ។
សូមបញ្ជាក់ថា ជននេះត្រូវបានសមត្ថកិច្ចចាប់ខ្លួនប៉ុន្មានម៉ោងក្រោយពីប្រកាសស្វែងរកប្រពន្ធកូន តាមទូរទស្សន៍៕
ប្រភព៖ rasmeinews.com