ស្ត្រីអាយុ ២១ ឆ្នាំម្នាក់បានក្លាយជាមនុស្សវ័យក្មេងជាងគេបំផុតនៅសហរដ្ឋអាមេរិកដែលទទួលការវះកាត់ប្តូរមុខមាត់ ពោលគឺ៣ឆ្នាំបន្ទាប់ពីនាងបានបាញ់សម្លាប់ខ្លួនឯងចំផ្ទៃមុខ តែមិនស្លាប់។
នាង កាធី ស្តាប់បលហ្វៀល (Katie Stubblefield) មិនចាំថ្ងៃដែលនាងព្យាយាមយកជីវិតខ្លួនឯងនៅក្នុងបន្ទប់ទឹកនៅឯផ្ទះបងប្រុសរបស់នាងនៅរដ្ឋមីស៊ីស៊ីពីនៅថ្ងៃទី ២៥ ខែមីនាឆ្នាំ ២០១៤ នោះទេហើយក៏មិនចាំអ្វីច្រើននោះដែរនៅប៉ុន្មានខែក្រោយមកទៀតនោះ។
នាងត្រូវបានបញ្ជូនពីមន្ទីរពេទ្យក្នុងទីក្រុងអក់ស្វតក្នុងរដ្ឋមីស៊ីស៊ីពី ទៅទីក្រុងម៉េមហ្វីស រដ្ឋថេនណេសស៊ី បន្ទាប់មកបញ្ជូនទៅទីក្រុងក្លេវើលែន រដ្ឋអូហៃយ៉ូ ក្នុងបំណងជួយសង្គ្រោះជីវិតរបស់នាង។
នៅដើមឆ្នាំ ២០១៦ នាងត្រូវបានគេប្រកាសថាមានស្ថានភាពនឹងនរ ហើយនៅថ្ងៃទី ៤ ខែឧសភាឆ្នាំ ២០១៧ នាងបានបង្កើតប្រវត្តិសាស្ត្រដោយទទួលការវះកាត់ប្តូរមុខមាត់រយៈពេល ៣១ ម៉ោងនៅមន្ទីរពេទ្យ Cleveland Clinic ដើម្បីស្តារទ្រង់ទ្រាយមុខមាត់របស់នាងឡើងវិញ និងអនុញ្ញាតឱ្យនាងទំពារនិងដកដង្ហើមបានធម្មតាជាលើកដំបូងក្នុងរយៈពេលជាច្រើនឆ្នាំមកនេះ។
នាង កាធី ឥឡូវអាយុ ២២ ឆ្នាំបាននិយាយនៅក្នុងភាពយន្តឯកសារមួយរបស់ទូរទស្សន៍ National Geographic ដែលបានបញ្ចាំងកាលពីថ្ងៃអង្គារទី១៤សីហាគាប់ជួននឹងសាច់រឿងមួយចំណងជើងថា “រឿងរ៉ាវអំពីផ្ទៃមុខ” ដោយលាតត្រដាងអំពីការតស៊ូរបស់នាង យ៉ាងដូច្នេះ “ឥឡូវនេះ ខ្ញុំទទួលបានឱកាសជាលើកទី២នៅក្នុងជីវិត”។
នាងកាធីគឺជាមនុស្សទី ៤០ នៅលើពិភពលោកដែលទទួលការវះកាត់ប្តូរមុខ និងជាមនុស្សទី ៣ នៅឯមន្ទីរពេទ្យ Cleveland Clinic ដែលគេចាត់ទុកថាជាមន្ទីរពេទ្យឈានមុខដំបូងគេក្នុងការស្តារមុខមាត់របស់មនុស្សឡើងវិញនៅសហរដ្ឋអាមេរិក។
ទោះយ៉ាងណា ករណីរបស់នាងគឺខុសប្លែកពីអ្នកមុនៗបន្តិចបន្តួច គឺថានាងមិនត្រឹមតែជាមនុស្សវ័យក្មេងជាងគេប៉ុណ្ណោះទេ តែគេថែមទាំងត្រូវចំណាយពេលយូរបំផុតមិនធ្លាប់មានពីមុនដើម្បីវះកាត់ប្តូរមុខរបស់នាង ដោយរុញក្រុមវះកាត់ទៅដល់កម្រិតថ្មីមួយទៀត៕
ប្រភព៖ rasmeinews.com