ឧក្រិដ្ឋកម្មអ៊ីនធើណិត ឬចោរបច្ចេកវិទ្យា បានហេគ(Hack)ចូលទៅប្រព័ន្ធរបស់ធនាគារ India’s Cosmo Bank ហើយបានលួចយកទឹកប្រាក់អស់ប្រមាណជា ៩៤៤ លានរ៉ូពី ស្មើនឹង ១៣,៥ លានដុល្លារអាមេរិក តាមរយៈការដកប្រាក់តំណាលគ្នាពេលតែមួយ កាលពីពេលថ្មីៗនេះ។
កាលពីថ្ងៃទី ១១ ខែសីហាកន្លងទៅ លោក Milind Kale ប្រធានធនាគារបានរាយការណ៍ទៅកាន់សមត្ថកិច្ចថា Hacker មិនស្គាល់ប្រភពបានលួចយកព័ត៌មានអតិថិជនតាមរយៈការវាយប្រហារដោយមេរោគមួយឈ្មោះថា malware attack នៅលើម៉ាស៊ីនមេរបស់ទូ ATM ហើយបានលួចដកសាច់ប្រាក់បានប្រមាណ ៨០៥ លានរ៉ូពី នៅក្នុងប្រតិបត្តិការចំនួន ១៤ ៨៤៩ ដងក្នុងពេលតែ ២ ម៉ោងប៉ុណ្ណោះ។
ក្រៅពីការលួចដកសាច់ប្រាក់ពីម៉ាស៊ីន ATM ជនមិនស្គាល់មុខបានបង្វែរទឹកប្រាក់ចំនួន ១៣៩ លានរ៉ូពី ទៅកាន់គណនីក្រុមហ៊ុនមួយទៀតដែលមានមូលដ្ឋាននៅទីក្រុងហុងកុង ដោយការចេញប្រតិបតិ្តការមិនមានការអនុញ្ញាតិចំនួន ៣ ដងតាមរយៈប្រព័ន្ធ SWIFT network។
ចំពោះ SWIFT មិនបានបញ្ចេញយោបល់ពាក់ព័ន្ធទៅនឹងករណីអង្គភាពមួយៗឡើយទាក់ទិននឹងករណីនេះ។
Cosmo Bank ដែលមានមូលដ្ឋាននៅក្នុងទីក្រុង Pune ប្រទេសឥណ្ឌាបាននិយាយនៅក្នុងសេចក្តីថ្លែងការណ៍របស់ខ្លួនថា កម្មវិធីធនាគារ(Banking Software) ទទួលបានការបញ្ជាចំណាយ(debit card payment request) តាមរយៈ Switching System ប៉ុន្តែត្រូវបាន bypassed នៅក្នុងការលួចយកនេះ។ ជាងនេះទៀត Hacker បានបង្កើត proxy Switch ហើយរាល់ករឯកភាពទៅលើ fraudulent payment ទាំងអស់ត្រូវបានបញ្ជូនមកដោយ proxy Switching System។
ខាងសមត្ថកិច្ចបានឲ្យដឹងថា កំពុងតែធ្វើការស៊ីបអង្កេតពីបញ្ហានេះ ហើយខ្លួនមានជំនួយពីអ្នកជំនាញដើម្បីតាមរកមូលហេតុនិងជនល្មើសយកមកផ្តន្ទាទោស៕
ប្រភព៖ sabay.com.kh
